بمخابنی ڤە گەلەك سەرا كێشەكا دی زیندان بووینە و ئەڤرۆ هاتینە هژمارتن زیندانیێن سیاسی
دیدار، سالار محەمەد دۆسكی:
زیندانیەكێ سیاسی بەحسێ رۆژێن ژیانا خوە دكەت دەمێ رێكخستنێن نهێنی و دەمێ شانا وان هاتیە ئاشكراكرن و دووڤ دا هاتیە دەستەسەركرن و هاتیە رەوانەكرن بۆ زیندانا ئەبو غورێب و پشتی پتر ژ سالان ب واستە هاتیە ئازادكرن.
زیندانیێ سیاسی، عەبدولمجید عەبدولحمید ئیبراهیم یێ بەیناس شێخ مەجید ل سالا 1953ێ ل گوندێ بامەرنێ ژ دایك بوویە، هەتا پولا سیێ سەرەتایی ل بامەرنێ و چارێ و پێنجێ و شەشێ ل قوتابخانا دهۆك ئولا تمام كریە
زیندانیێ سیاسی شێخ مەجید، د دیدارەكێ دا ل گەل رۆژناما ئەڤرۆ بەحسێ ژیانا خوە یا زارۆكینیێ دكەت و گۆت: بابێ من ل گەل خودێ ژێ رازی (محەمەد عەلی یونس) بارەگایێ خەبات ل بامەرنێ ڤەكرربوو، وی دەمی ئەم زارۆك بووین چووینە وی بارەگایی و پاتێن زەر ب ملێت مە ڤەدكرن كو ئەڤە سەر ب خودێ ژێ رازی مەلا مستەفا بارزانی نە و هەمان دەم شوعی ژی هەبوون و ئەوا پاتێ صور هەبوو، ل سالا 1961ێ دەمێ رەحمەتی مەلا مستەفا بارزانی هاتیە دەڤەرێ شەڤەكێ بابێ من هاتە مال دەرسوكەكا سۆر ل سەری بوو و دەمێ من دەرگەه ڤەكری من گازیكەرە دایكا خوە من گۆتێ بابێ منێ بوویە ئێزدی چونكە دەمێ دهاتینە دهۆكێ بتنێ مە ئێزدی دیتن دەرسوكێن سۆر ل سەری بوون، بابێ من گۆتە من ئەڤە یا مەلا مستەفایە و مەزنێ كوردانە و دێ دەست ب شورەشێ كەت و ئەم یێن چووینە بنێ گیزیا لبنێ چیایێ مەتینی و مە كومبوون كریە و دێ دەست ب شۆڕەشێ هێتەكرن وی دەمی كوردینی كەفتیە دەماغێ من دا.
شێخ مەجید زێدەتر گۆت: ل سالا 1968ێ ل گوندێ گەلناسكێ ئەز و (حسێن هەدێنی وحسێن سەعید سەرەرویی) مە خواست پەیوەندیێ ب پێشمەرگەی بكەین لێ نە وەرگرتین ماوێ هەیڤەكێ ماینە دناڤ پێشمەرگەی چونكە ژیێ منێ بچووك بوو و خواست خواندنا خوە تەمام بكەم و بتنێ گۆتن مە ناڤێن خوە نڤێسین وەك ئەندامێن ئێكەتیا قوتابیێن كوردستانێ هوون هەرن خواندنا خوە تەمام بكەن، زڤرینە باژێری و مە دەست ب خواندنا خوە یا ناڤنجی كر.
شێخ مەجید زێدەتر گۆت: ل گەل بەیانا 11ی ئادارێ سالا 1970ێ بارەگایێن پارتی ب فەرمی هاتنەڤەكرن و مە پەیوەندی ب رێكخراوا ئاشتی كر سەر ب لژنا محلی ڤە بوو (عەبدولعەزیز تەیب) بەرپرسێ مەبوو و مە دەست بكارێ رێكخستنێ كر، پشتی دو سالان بوومە بەرپرسێ رێكخراوا ئاشتی هەتا سالا 1974ێ و دووڤ دا مە خواندن هێلا و گەهشتینە ناڤ رێزێن پێشمەرگێ كوردستانێ و پشتی مە راهێنانێن لەشكەری ل ئەترویش كرین بووینە كادر كو دگەریاین ل گوندان و مە سمینار دەنە خەلكی و گەلەك سمینار ل (شێخان و شنگال) مەداینە خەلكی .
شێخ مەجید زێدەتر گۆت: ل سالا 1974ێ بۆ لژنا دهۆك هاتینە ڤەگوهاستن وەك (پاراستن) و مەفرازا راكرنا مینان مە كار كر وی دەمی بارەگایێ مە ل مانگێشكێ بوو و چەندین هەڤالان ل گەل مە كار دكر.
زیندانیێ سیاسی شێخ مەجید، گۆت: ل سالا 1974ێ جارەكێ مە پوستەك ل گەل مە بوو و مە خوە دناڤا گورستانێ دا ڤەشارت ل نێزیك ئوتێلا سولاف یا نوكە و مزگەفتەك وێرێ بوو هەتا نڤێژا عەیشا خەلك دەركەفتین مە ژی خوە دا ل گەل وی خەلكی و مە قەستا مالا (رەشید ئێتیتی) كر كورێ وی ئەندام بوو ل گەل مە و مە خوە دانیاسین كو مە پوستەك ژ دەف (عەلی شنگالی) بۆ (دێوالیێ سەعید ئاغا)ی ئینایە وێ مالێ رەحمەتی (دێوالی ئاغا) ئاگەهداركر و زێرەڤانێن وی هاتنە دووڤ مە را و گەهاندینە (قەصرێ) و مە پوستێ خوە رادەستی خودێ ژێ رازی (دێوالی ئاغا)ی كر و مە ڤراڤین خوار و هەر ئێك ژ مە پێنچ دینار دانێ و مە ب ترۆمبێلێ گەهاندینە جهێ ژێ هاتین.
شێخ مەجید گۆتژی: پشتی نەكسویا 1975ێ هندەك خەلك هەبوون تەعن ل مەدان و دگۆتن (عائدون) مە هندەك هەڤالان هزرا خوە كر وەكی (رەمەزان سلێمان هەدێنەی، سلێمان عیسا، وەیسی هەدێنەی، سەعید ئیبراهیم، عابد، محەمەد عەلی) وی دەمی مە چ دەنگ و باسێ، سەركردایەتیێ و نەبوون و بتنێ مە ئاگەهداری رەحمەتی (صالح یوسفی) بووین كو هاتیە بەغدا خوە رادەست كریە و گەلەك عاجز بووین، 26/5/1975ێ ل ناڤ گورستانا نێزیك بارەگایێ پارێزگەهێ یێ نوكە مە سوزدا ئێك و دو و مە رێكخراوەك دروستكر بناڤێ (شەفەق) و مە پارە كومكرن و بەلاڤووك ب دەستی دروستكرن و مە دهەلاویستن و دهاڤێتن و بیرا من دهێت مەلایێ مزگەفتا مەزن ل دهۆكێ جارەكێ بەحسێ (جەیب ل عەمیل) كر ئانكو مەرەم خودێ ژێ رازی (مەلا مستەفا بارزانی) بوو مە ب شەڤ بەلاڤووك دانانە بن مینبرا وی و مە ئاگەهدار كر كو ئێك جارا دی بەحسێ سەركردەكێ كورد یان دوزا رەویا مللەتێ كورد بكەت دێ بۆ وی نەباش بیت وێ بەلاڤووكێ گەلەك دەنگ ل دهۆكێ ڤە دا سَ حەفتیان گەلەك كێم خەلك دچوونە مزگەفتێ و ئەمنێ چاڤدێریەكا هوویر دانا سەر ئەوان كەسێن دچنە مزگەڤتێ ڤە كر، مە بەردەوام كومبوونێن خوە كر و رێكخستنێن نهێنی ژی گاڤ بۆ گاڤێ مە خورتر لێكرن و رێكخستنێن مە گەهشتنە (زاخو و ئامێدی، مویسل،شێخان، اربیل، بەغدا) ژی چوون.
شێخ مەجید گۆت: خودێ ژێ رازی (تارق حجی جەمیل) برازایێ حەجی مەلو، ئەندامێ سەركردایەتیا قوتابیێن عیراقێ بوو و بەرپرسێ شانا رێكخستا مە بوو و ب رێكا وی بەلاڤووك ل زانكۆیا بەغدا دهاتنە بەلاڤكرن.
هێشتا گۆت: ل سالا 1976ێ سەركردایەتیا بەروەخت هاتە دروستكرن و پەیوەندی ب هندەك كەسان هاتەكرن و پەیوەندی ب مەهاتەكرن و بڤی رەنگی شانا مە یا رێكخستنێ هاتە ئاشكراكرن، هندەك دی ژی هاتنە گۆتن و ناڤێن مە ئاشكراكرن وی دەمی باژێرڤانیێ من كاردكر و هاتمە دەستەسەركرن و دیاركر كو (121) دینار بۆ ئابوونا هاتینە خورتكرن و هەمی دەنگ و باسێن مە دزانین ئەمنێ و ئەفسەرەكێ گۆتە من هووون سەرا شەرفێ هاتینە گرتن نە سەرا دزیێ هاتینە گرتن و هشیاربن دانپیدانێ نەكە و دێ ناڤێن هندەك هەڤالێن تە بێژم نوكە رەڤینە…
هێشتا گۆت: هاتینە رەوانەكرن بۆ كەركووكێ و دووڤ دا بۆ بەغدا و سێ سال و هەیڤەكێ مامە ل زیندانا ئەبو غورێب دا و فەرمانا سێدارێ بوومن دەركەفت و دایك و بابێن من چوونە مالێت هندەك ئاغایێن(هەركی و گوران) خواست هاریكاریێ بۆ بكەن و ئەو بوونە واستە حوكمێ سێدارێ ل سەر من هاتە گوهورین بۆ هەتا هەتایێ .
شێخ مەجید ئەو ژی گۆت: مە هەڤالەك هەبوو بناڤێ (نزار ئەحمەد عوبێد) ل زیندانا ئەبو غورێب زیندانی بوو ل گەل مە رۆژەكێ دەركەت بوو پێش چاڤێن هەموو زێرەڤانان و كەسەكێ نەدیت بوو چوو بۆ بازاری و پشتی ئێڤاری ڤەگەریا هاتە دەستەسەركرن و گەلەك ئەشكەنجەدا و ڤەكولین ل گەل هاتەكرن و دووڤ دا چەند وەستە ب هاریكاریا هەڤالان بۆ هاتنەگرتن و هاتا قورتال بووی.
شێخ مەجید گۆتژی: داخازێ ژ سەركردایەتیا كوردستانی دكەین دەەمێ زیندانییێ، سیاسی بتنێ نەه سالان مووچە وەرگرتین و ل بەغدا بیست و پێنچ سالان مووچە و ئمتیازات وەرگرتینە و ئەو مووچێ دهاتەدان ژی گەلەكێ كێم بوون و بەغدا بۆ ماوێ 25 سالان وەردگرن و مخابن هەتا نوكە مە چ مفا نەدیتی یەو هندەك بەرپرسان مرۆڤێن خوە كرینە زیندانیێن سیاسی بەلكو سەرا كێشەكێ هاتینە دەستەسەركرن و گرنگە دیفچوونەك بهێتەكرن .
