بنگه‌هێ ده‌سته‌به‌ریا جڤاكی ل ئاكرێ دێ هێته ڤه‌كرن
ئاكرێ، ره‌مه‌زان هه‌رنی:
ب مه‌ره‌ما پتر خزمه‌تكرنا ته‌خا كرێكاران، وه‌زاره‌تا كار و كاروبارێن جڤاكی ل حوكمه‌تا هه‌رێمێ دێ بنگه‌هه‌كێ ده‌سته‌به‌را جڤاكی ل ئاكرێ ڤه‌كه‌ت.
غازی هه‌ركی، رێڤه‌به‌رێ چاڤدێری و گه‌شپێدانا جڤاكی ل ئاكرێ بۆ رۆژناما ئه‌ڤرۆ دیار كر، ل سنوورێ قه‌زا ئاكرێ و به‌رده‌ڕه‌ش گه‌له‌ك یێ به‌رفره‌هه، هژماره‌كا زۆرا كرێكاران ل ڤان هه‌ر دو ده‌ڤه‌ران هه‌نه، له‌و ب ڤه‌كرنا بنگه‌هێ ده‌سته‌به‌را جڤاكی هه‌موو مافێن كرێكاران ل دووڤ قانوونێ دێ هێنه پاراستن.
غازی گوت: “وه‌زاره‌تا كار و كاروبارێن جڤاكی به‌رهه‌ڤیان بۆ ڤه‌كرنا بنگه‌هێ ده‌سته‌به‌را جڤاكی بۆ ته‌خا كرێكاران ل ئاكرێ و به‌رده‌ڕه‌ش دكه‌ت، ئه‌ڤ بنگه‌هه دێ مفای گه‌هینیته هه‌موو كرێكاران و بیته ئه‌گه‌ر ژی كو كرێكار ب قانوونی بهێنه خانه‌نشینكرن و مافێن وان به‌رزه نه‌بن”.
ناڤهاتی ئاشكرا كر، به‌ری نوكه بۆ ڤێ مه‌ره‌مێ كرێكاران مه‌زاختن دكر هه‌تا دچوونه دهۆكێ بۆ ب رێڤه‌برنا مامه‌له‌یێن خوه، به‌لێ ب ڤه‌كرنا بنگه‌هێ ئاكرێ دێ كار بۆ كرێكاران ب ساناهیتر كه‌ڤیت بۆ ته‌مامكرن و بجهكرنا مافێن خوه ل دووڤ قانوونێ.
