بنگەهێ لالشێ: ب پشتەڤانیا حكومەتا هەرێمێ دێ كار و خەباتا خۆ بـەردەوام كـەین
دهۆك، لەزگین جوقی:
بنگەهێ لالشێ ئاشكرا كر، ل ژێر درووشمێ لالش كانیەكا زەلالە د هۆرتە د رووبارێ رەوشەنبیریا كوردی دا و ژ بۆ ب دەستڤەئینانا ئارمانجێن بنگەهێ لالشێ و بلندكرنا ئاستێ رەوشەنبیری و زانینێ و پاراستنا كلتوورێ ئێزدیاتیێ و خرڤەكرنا قەول و قەسیدێن مە د ناڤ جڤاكێ مە دا دێ بەردەوام بین.
خویا ژی كریە كو ب سایا هەبوونا پێشمەرگەهێ قارەمان و ب پشتەڤانیا حكومەتا هەرێما كوردستانێ، دێ كار و خەباتا خۆ بەردەوام كەین، ژ بۆ گەشەكرنا ئێزدیاتیێ و ناساندنا ڤێ ئۆلا كەڤنار و رەسەن ل سەرانسەری كوردستانێ و جیهانێ، دیسا ب هەلكەفتا 32 سالیا دامەزراندنا بنگەهێ لالشێ، ب دلەكێ پڕی شانازی و رێزگرتن، ئەم پیرۆزباهیێن خۆ یێن گەرم و ژ دل پێشكێشی تەڤایا ئەندام و لایەنگر و مجێور و كەسایەتیێن ئایینی و جڤاكێ ئێزدیان دكەین.
بنگەهێ لالشێ تەكەز كر كو خەونا دامەزراندنا بنگەهێ لالشێ، پشتی سەرهلدانا پیرۆزا سالا 1991ێ هاتە جهـ ب پشتەڤانیا سەركردایەتیا هەرێما كوردستانێ و ل رێكەفتی 12/5/1993 هاتە دامەزراندن و هەتا ئیرۆ ژی، پشتەڤانیا حكومەتا هەرێما كوردستانێ بۆ ڤی بنگەهی یا بەردەوامە.
بنگەهێ لالشێ نوكە ئێكە ژ مەزنترین ناڤەندێن ڕەوشەنبیری ل كوردستانێ و ئیراقێ و هژمارەكا زۆر یا ئەندامان هەنە، كو نێزیكی حەفت هزارانە، د نوكە دا هەشت تا (لق) ل سەر دەڤەرێن شێخان و شنگال و دەڤەرا باشیك و بەحزانێ و شاریا و خانكێ و چەندین نڤیسینگەهـ ل گوند و كۆمەلگەهێن ئێزدیان هەنە، دیسا بنگەهێ لالشێ خودان پرتووكخانەیەكا زەنگینە.
