بنگەهەكێ ئاگرڤەمراندنێ یێ پێشكەفتی ل تاخێ بەڕۆشكێ هاتە ڤەكرن
د. عەلی تەتەر، پارێزگارێ دهۆكێ ب بەرهەڤبوونا عەلی عەونی، بەرپرسێ لقێ ئێكێ پارتی و ماجد سەید سالح، جێگرێ پارێزگارێ دهۆكێ و چەندین رێڤەبەرێن پەیوەندیدار دوهی 12/6/2023 بنگەهەكێ ئاگرڤەمراندنێ یێ پێشكەفتی ل تاخێ بەڕۆشكێ ل رۆژهەلاتێ باژێڕێ دهۆكێ ڤەكر.
پارێزگارێ دهۆكێ د كۆنگرەكێ رۆژنامەڤانی دا گۆت: «ئەڤ بنگەهە دێ خزمەتا خەلكێ تاخێن سەرهلدان و بەڕۆشكێ و نزاری و ئێتیتێ و ئەڤریكێ كەت، دیسا ب پشتەڤانیا سەرۆكێ حوكمەتا هەرێما كوردستانێ و ب رێكا وەزارەتا ناڤخوە 10 ترۆمبێلێن نوو بۆ رێڤەبەریا بەرگریا شارستانی یا پارێزگەهێ هاتینە دابینكرن بۆ وێ یەكێ كار و ئەركێن رێڤەبەریا ناڤبری ب رەنگەكێ باشتر بهێنە ئەنجامدان و بلەزتر روودانێن ئاگربەربوونێ بهێنە كونترۆلكرن».
پارێزگارێ دهۆكێ گرنگیا كارێن خوەبەخشان بۆ پاراستنا ژینگەهێ و ئاگرڤەمراندنێ بەرچاڤكرن و خواست وەلاتی ژی پتر د هشیار بن و ب رەنگەكێ بەرپرسیارانە سەرەدەریێ ل گەل هەر بوویەرەكا ئاگری بكەن، نەخاسمە ئەڤ سالە گەلەك پووش پەلەخ پەیدابوویە.
