بهایێ نان و سەموونان دێ ئەرزان بیت
رێڤەبەرێ گشتیێ بازرگانی ل هەرێما كوردستانێ دیار كر، ئەو نوكە یێ كار دكەن هەر 10 نان یان سەموون ب هزار دیناران بهێنە فرۆتن.
نەوزاد شێخ كامل، رێڤەبەرێ گشتیێ بازرگانی ل هەرێما كوردستانێ گۆت: «نوكە شەش نان ب هزار دیناران دهێنە فرۆتن و سەنگا هەڤیری ژی هەمبەری بەری نوكە كێمترە و بهایێ ئاری ئەرزان بوویە، لەو ئەم نوكە كار دكەین، كو هندەك كۆمپانی بهایێ پشتەڤانیكرنێ بۆ ئاری دابین بكەن و ژ ئالیێ حوكمەتێ ڤە سۆتەمەنی بۆ بهێتە دابینكرن، داكو بهایێ نانی و سەموونان ئەرزان ببیت و هەر 10 نان یان سەموون ب هزار دیناران بهێنە فرۆتن».
ناڤهاتی ئاشكرا كر، جڤاتا وەزیران پشتەڤانیا ڤێ یەكێ كریە و د خوازیت بهایێ نان و سەموونان ئەرزان ببیت.
ل سنوورێ پارێزگەها دهۆكێ دو جۆرێن نانی دهێنە فرۆتن نانێ مەزن چار ب هزار دینارانە و یێ بچووك ژی هەشت ب هزار دیناران، هەروەسا سەموون ژی شەش ب هزار دینارانە و ل هندەك جهان ژی هەشت و ل گۆرەی قەبارەیی د مینیت.
