بهایێ هژیرێ بازاڕی گەرم ناكەت
هەرهین محەمەد:
هژیر ژ وان فێقییایە ل هندەك دەڤەران ل دەستپێكا هەیڤا حەفت دگەهیت و دەمێ دهێتە د بازاری دا بهایێ وان گەلەك یێ گرانە و ژ هەموو خەلكی ناهێت بكڕن و خوە دگرن هەتا ئەرزان دبیت و ل دووڤ گۆتنێن ماموستایەكێ ئابووری ژی هژیر نە ژ خوارنێن سەرەكی یە و خەلك وان پێدڤیان دكریت یێن سەرەكی.
جاسم هروری، دوكاندارە ل بنداڤا فێقی و دبێژیت: ئەڤە دو حەفتییە هژیر هاتیە د بازاری دا و ل دەستپێكێ كیلویا هژیرا ب 15 هزار دیناران بوو، ئەڤە چەند رۆژە پیچەك ئەرزان بوویە هاتیە ب 12 هزار دیناران و ئەڤ هژیرە یا خومالی یە و یا رووبارێ دهۆكێ یە و د نوكە ژی دا هژیرا گرانە و دبیت ژ هەموویان نەهێت بكرن، چونكو بهایێ وان نێزیكی بهایێ گوشتی یە و د ئەڤرۆ دا من 57 كیلویێن هژیران كرینە ل سەر 10 هزار دیناران و هەتا ئێڤاری ب تنێ ژ دو سندوقا كێمتر ماینە و هژیرا مە نەچوویە ژ دەرڤە، ژبەر كو هژیر فێقیەكێ نازكە و نەشێن ب هنێرینە ژ دەرڤە دێ خرابیت و ئەڤە هژیر هاتیە د بازاری دا گەلەك خوەش دهێتە فرۆتن پتر ژ فێقێن دی، ئانكو بازارێ هژیرێ یێ تایبەتە.
ئابوورناس موستەفا عەبدولفەتاح دبێژیت: ل دەستپێكا هاتنا هەر بەرهەمەكی د بازاری دا یێ گرانە و پشتی ئەو بەرهەمە زێدە دبیت بهایێ وی دهێتە خوارێ، بۆ نموونە ل دەمێ هاتنا حلیكان دگران بوون و ب رێژەكا كێم هاتنە د بازاری دا و پشتی ب رێژەكا مەزن هاتینە د بازاری دا ئێكسەر بهایێ وان هاتە خوارێ و ئەرزان بوون.
زێدەتر خویاژی كر، گران بوونا هژیری ژی یا وەسایە و ل هندەك دەڤەران زوو چێدبیت و دەمێ دهێتە د بازاری دا یا گرانە و داخازی ژی یا ل سەر هەی، چونكو ئەڤە بۆ دەمەكێ درێژە خەلكی نەخاریە و گۆت: ژ كەڤن وەرە خەلكێ دهۆكێ حەزژێكەرێن هژیرێ نە و بۆ خارنێ بكاردئینن و دیسان دكەنە گەلەك تشتێن دی وەكو هشككرن و مرەبا و ب گشتی هژیر چو گوهورینا د بازاری دا ناكەت، ئانكو نەبازاری گەرم دكەت و نە دلڤینت، چونكو خەلك دزانیت چەند یا گران بیت دێ بهایێ وان هێتە خوارێ و پاشی دێ كرن و هژیر ژی نە ژ خوارنێن سەرەكی یە و خەلكێ مە نوكە وی تشتی دكریت یێ پێدڤی پێ هەی.
