بهایێ پشكداریا هەیڤانە یا فەیسبۆك و ئینستگرامی دێ هێتە كێمكرن
كۆمپانیا مێتا پێشنیاز كریە بهایێ پشكدارییا هەیڤانە د فەیسبوك و ئینستاگرامی دا ژ 9.99 دۆلاران بۆ 5.99 دۆلاران بهێتە كێمكرن.
بەری نوكە مێتایێ پشكدارییا ب پارە بۆ بكارهینەرێن فەیسبوك و ئینستاگرامی ل ئورۆپا بەردەستكربوو كو ل گۆرەیی وێ ریكلام بۆ بكارهێنەران ناهێنە نیشاندان بەرامبەر دانا وان بۆ پارەیێ پشكدارییا هەیڤانە، ئەڤ چەندە ببوو ئەگەرێ رەخنەگرتنێ ل مێتایێ و هندەك كەسان گۆتن كو مێتا داخوازا پارەی ژ بكارهێنەران ژ بۆ گرەنتیكرنا پاراستنا تایبەتمەندییا وان دكەت.
مێتایێ ل هەیڤا چرییا دویێ یا سالا بۆری پشكدارییا ب پارە بۆ فەیسبوكی و ئینستاگرامی ل ئورۆپا بەردەستكربوو وەك پێگیری ب قانوونا بازارێن دیجیتال یا ئورۆپی ئەوا كو شیانێن مێتایێ بۆ بەرچاڤكرنا ریكلامان بۆ بكارهێنەران د فەیسبوك و ئینستاگرامی دا بێی رازیبوونا وان سنووردار دكەت و ئەڤ چەندە زیانێ دگەهینیتە داهاتێ مێتایێ.
تیم لامب پارێزەرێ مێتایێ ل هەمبەر كۆمیسیۆنا ئورۆپی گۆت: «مە پێشنیازا كێمكرنا بهایێ پشكدارییا هەیڤانە ژ 9.99 دۆلاران بۆ 5.99 دۆلاران بۆ ئەكاونتێ سەرەكی هەروەسا كێمكرنا ب بهایێ 4 یۆرۆیان بۆ هەر ئەكاونتەكێ زێدە كریە».
ئەگەر هەر كۆمپانییەك پێگیریێ ب قانوونا بازارێن دیجیتال یا ئورۆپی نەكەت رەنگە ب سزایێن دارایی یێن دگەهنە نزیكی رێژەیا 10% ژ داهاتێن وان یێن سالانە بهێنە سزادان.
