بهایێ دۆلاری هەمبەر دینارێ ئیراقی دێ داكەڤیت
شیرەتكارێ ئابووریێ پەرلەمانێ كوردستانێ خویا كر، پشتی قانوونا بودجا ئیراقێ دكەڤیتە د بیاڤێ بجهئینانێ دا بهایێ دۆلاری هەمبەر دینارێ ئیراقی دێ داكەڤیت و بهایێ نوكە هەی نامینیت.
دكتۆر ئەرشەد تەها، شیرەتكارێ ئابووریێ پەرلەمانێ كوردستانێ بۆ رۆژناما ئەڤرۆ دیار كر، چو ئەگەر نینن بۆ بلندبوونا بهایێ دۆلاری د بازاڕێن فەرمی و رەش دا، بەلێ هندەك گەندەلی ل بەنكا ناڤەندیا ئیراقێ هەنە، هندەك كەس مفاداربووینە ژ جوداهیا بهایێ دۆلاری و گۆت: «رۆژانە زێدەتری 200 ملیار دۆلار دهێنە د ناڤ بازاڕی دا، بەلێ 10% جوداهی د ناڤبەرا بهایێ فەرمی و یێ بازاڕێ رەش دا هەیە، دڤێت حوكمەتا ئیراقێ گڤاشتنان بكەتە سەر بەنكا ناڤەندی بۆ نەهێلانا جوداهیا بهایێ دۆلاری».
دكتۆر ئەرشەد تەها گۆتژی: «پشتی قانوونا بودجەی دكەڤیتە د بیاڤێ بجهئینانێ دا دێ دۆلارەكێ زێدەتر كەڤیتە د ناڤ بازاڕی دا، چونكی داهاتێ ئیراقێ دی زێدەبیت و رێژەكا زۆرا دۆلاری دێ كەڤیتە د ناڤ بازاڕی دا، لەوڕا ژی پێدڤیە بهایێ دۆلاری ڤەگەڕیتە بهایێ خوە یێ فەرمی و 100 دۆلار ل بازاڕی هەمبەری 132 هزار دیناران بهێنە گوهۆڕین، ئەز پێشبینی دكەم بهایێ دۆلاری ل رۆژێن داهاتی دا داكەڤیت».
