بهایێ غازێ دێ ئه‌رزان بیت
هه‌ولێر، قائید میرۆ:
پشتی كۆمبوونا لژنا سامانێن سرۆشتی دگه‌ل حوكمه‌تێ بڕیاره پێداچوون ب بهایێ غازێ دا بهێته كرن و ئه‌ندامه‌كێ لژنا سامانێن سرۆشتی ژی ئاشكرا كر، به‌رهه‌مێ غازێ دێ هێته زێده‌كرن و بهایێ وێ ژی دێ ئه‌رزان بیت.
رێبوار بابكه‌یی، ئه‌ندامێ لژنا سامانێن سرۆشتی ل په‌رمانێ كوردستانێ بۆ رۆژناما ئه‌ڤرۆ دیار كر، ئه‌و دگه‌ل وه‌زاره‌تا سامانێن سرۆشتی ل دۆر بابه‌تێ غاز و پانزینێ كۆمبووینه و گۆت: “ئه‌م وه‌كو لژنا سامانێن سرۆشتی ل په‌رمانێ كوردستانێ ل سه‌ر بزاڤێن خوه بۆ چاره‌سه‌ركرنا پرسا پانزین و غازێ دێ د به‌رده‌وام بین، چونكو نوكه هه‌ردو یێن بووینه قه‌یران ل هه‌رێما كوردستانێ، دیسا نوكه غاز ب بهایێ حوكمه‌تێ ب هه‌شت هزار و 500 دیناران ژلایێ بریكاران ڤه دهێته فرۆتن، به‌لێ غازا بازرگانی ل بازاڕی ب 15 هزار دیناران دهێته فرۆتن، چه‌ند ئه‌گه‌ره‌ك بۆ بلندبوونا بهایێ غازێ هه‌بوون، ژ وان ژی سه‌خبێركرن ژلایێ كۆمپانیێ و كێمبوونا به‌رهه‌مێ غازێ”.
رێبوار بابكه‌یی گۆتژی: “بڕیاره جاره‌كا دی ئه‌م وه‌كو لیژنه و وه‌زاره‌تا سامانێن سرۆشتی ل دۆر پرسا غاز و پانزینێ كۆم ببین و مه چه‌ند پێشنیاره‌ك ژی داینه حوكمه‌تێ، داكو كار ل سه‌ر بهێته كرن و ئاریشا غاز و پانزینێ بهێته چاره‌سه‌ركرن، وه‌زاره‌تێ ژی پلانا زێده‌كرنا به‌رهه‌مێ غازێ هه‌یه و دێ بهایێ غازێ ئه‌رزان بیت، رێككه‌فتنا د ناڤبه‌را هه‌رێم و به‌غدا دا بۆ هنارتنا پانزینێ كه‌فتیه د بیاڤێ بجهئینانێ دا و هه‌تا راده‌یه‌كی ئاریشه هاتیه چاره‌سه‌ركرن”.
