بهایێ نشته‌رگه‌ریێن نه‌خۆشخانێن تایبه‌ت دێ هێته رێكخستن
هه‌ولێر، قائید میرۆ:
بریكارێ وه‌زاره‌تا ساخله‌میێ ئاشكرا كر، لژنه‌یه‌ك بۆ رێكخستنا بهایێ نشته‌رگه‌ریان ل نه‌خۆشخانێن تایبه‌ت هاتیه پێكئینان و بڕیاره پێداچوون د بهایێ نشته‌رگه‌ریان دا بهێته كرن.
دكتۆر ره‌هێل فه‌ره‌یدون، بریكارێ وه‌زاره‌تا ساخله‌میێ بۆ رۆژناما ئه‌ڤرۆ دیار كر، ژ لایێ وه‌زاره‌تا ساخله‌میێ ڤه لژنه‌یه‌ك بۆ پێداچوونێ د بهایێ نشته‌رگه‌ریان دا ل نه‌خۆشخانێن ئه‌هلی هاتیه پێكئینان و گۆت: “نوكه ئه‌م مژوولی رێكخستنا بهایێ نشته‌رگه‌ریانین ل نه‌خۆشخانێن تایبه‌ت، ل گوره‌ی پلانا وه‌زاره‌تێ بهایێ هه‌موو نشته‌رگه‌ریه‌كێ دێ هێته دیاركرن و ل گوره‌ی بسپۆری و كوالێتیا هه‌ر نه‌خۆشخانه‌كا تایبه‌ت دێ بهایێ نشته‌رگه‌ریان دیاربیت، نابیت جوداهی د ناڤبه‌را بهایێ نشته‌رگه‌ریان هه‌بیت و چه‌ندین جۆرێن نشته‌رگه‌ریان هه‌نه و هه‌ر ئێكێ بهایێ وێ دێ هێته دیاركرن”.
دكتۆر ره‌هێل فه‌ره‌یدون گۆتژی: “ژبلی دیاركرنا بهایێ نشته‌رگه‌ریان، پشكا نۆشداران ژی ژ ئه‌نجامدانا هه‌ر نشته‌رگه‌ریه‌كێ دێ هێته دیاركرن و ل گوره‌ی كه‌لوپه‌لێن دهێنه بكارئینان بهایێ نشته‌رگه‌ریێ دێ هێته دیاركرن، هیچ نشته‌رگه‌ریه‌ك نامینیت هه‌كه بها ل سه‌ر نه‌بیت و نابیت جوداهی بمینیت و هه‌ر نه‌خۆشخانه‌ك بهایه‌كی بۆ خوه بدانیت”.
