به‌درخان ئه‌مین: نوكه خه‌لك حه‌ز ژ سترانێن سه‌مایێ دكه‌ت
ئه‌ڤرۆ، شاهۆ فه‌رید:
سترانبێژ (به‌درخان ئه‌مین) د دیداره‌كێ دا بۆ به‌رپه‌رێ هونه‌ریێ رۆژناما ئه‌ڤرۆ گۆت:” ئه‌ڤه ده‌مه‌كه ژ به‌ر هاتنا په‌ژیكا كۆرۆنایێ كارتێكرن ل سه‌ر كارێن هونه‌ری یێن سترانبێژان هاتیه‌كرن و گه‌له‌ك سترانبێژێن دی د به‌رزه‌نه و چه‌ند كار ل به‌رده‌ستێ من هه‌نه و پێڤه مژوولم و هاتینه تۆماركرن و هه‌كه ده‌لیڤه و پشته‌ڤانی هه‌بیت دێ كلیپ كه‌م، به‌لێ ده‌زگه‌هێن راگه‌هاندنێ وه‌كو به‌رێ هاریكاریا سترانبێژان ناكه‌ن و خوه ل كارێن مه ناكه‌نه خودان، سوشیال ژی نوكه لایه‌كێ گرنگه بۆ سترانبێژی، لێ دڤێت گه‌له‌ك ده‌مێ خوه بده‌یێ یان ژی كه‌سه‌كێ دی برێڤه‌ببه‌ت و نوكه خه‌لك حه‌ز ژ شێوه‌یێ سترانا سه‌مایێ دكه‌ن، به‌لێ چو تام خوه‌شی تێدا نینه و كارێن باش یێن هونه‌ری و كلیپان سه‌نگا خوه یا به‌رێ نه‌مایه سترانبێژ دشێت قه‌فته‌كا سترانا تۆماركه‌ت و وێنه‌كێ خوه دانیته سه‌ر و دێ زووتر به‌ربه‌لاڤ بیت”.
ناڤهاتی زێده‌تر گۆت ژی چوونا من بۆ ئاهه‌نگ و روونشتنان یا به‌رده‌وامه و ل دووڤ داخوازیێ دچم و نوكه هه‌ر ستایله‌كێ هه‌بیت یێ باشه، به‌لێ بهایێ خوه ژ ده‌ست نه‌ده‌ت وه‌كو تاما خوه بمینن و نووژه‌نكرن هنده‌ك جاران یا باشه ب تایبه‌ت په‌یڤێن بێ په‌رده بهێنه گوهۆڕین بۆ جوانیه‌كێ و سه‌ندیكا ژی وه‌كو پێدڤی هاریكار نینه و خه‌لك دبینیت ئه‌و هونه‌رمه‌ندێ دچیته داوه‌تا ئه‌و یێ د ناڤ هونه‌ری دا، لێ ده‌فمن ئه‌وێ كارێن جوان ئه‌نجام بده‌ت ئه‌و هونه‌رمه‌نده و ئه‌كادیمی ژی گه‌له‌كا گرنگه ژ به‌ر دا هه‌ر كاره‌كێ ئه‌نجامێن باش هه‌بن.
