به‌رسڤه‌ك بۆ گۆتارا ل سه‌ر ئه‌وقافێ
د هژمارا (1593) رۆژا پێنج شه‌مبی رێكه‌فتی (19/2/2015) بابه‌ته‌ك ب ناڤێ (وه‌زاره‌تا ئه‌وقافێ نه د خزمه‌تا گه‌لێ كورد دایه) د رۆژناما ئه‌ڤرۆ دا ژ لایێ (ئه‌حمه‌د بالایی) ڤه هاتیه به‌لاڤكرن، د ڤێ نڤیسانێ دا ب توندی هێرش كریه سه‌ر وه‌زاره‌تا ئه‌وقافێ و ته‌ر و هشك پێكڤه سۆتینه و ب شێوه‌كێ ره‌ها هه‌می تشت ره‌ش دیتیه، ب تنێ چه‌ند تێبینیه‌ك ل سه‌ر ڤێ نڤیسانێ وه‌ك به‌رسڤ پێشكێش دكه‌ین.
سه‌باره‌ت ناڤونیشانێن گۆتارا ناڤبری (وه‌زاره‌تا ئه‌وقافێ نه د خزمه‌تا گه‌لێ كورد دایه) جارێ ته چ پیڤه‌ره‌كێ به‌رهۆش نه‌دایه دیاركرن كا ئه‌ڤ وه‌زاره‌ته دژایه‌تیه بۆ گه‌لێ كورد یان نه، لێ من دڤێت بێژم كو ئه‌و خزمه‌تا گۆتاربێژێن مامۆستایایێن ئاینی پێشكێشی گه‌لێ كورد دكه‌ن، د كێم واران دا ئه‌و خزمه‌ت دهێته پێشكێش كرن، بگره ژ تێگه‌هاندنا گوهدارێن گۆتارێن رۆژێن ئه‌ینی و تێگه‌هاندنا خه‌لكی ب گرنگیدانا پاراستنا ئه‌من و ئاسایشا نه‌ته‌وه‌یی و وێره‌كیا پاراستنا ئاخا وه‌لاتی، وه‌كی ژ نڤیسانا ته دیاره تو گوهداریا گۆتاربێژێن ئاینی ناكه‌ی هه‌كه دا باش و ب رۆهنی زانی كا چه‌ند مامۆستایێن ئاینی مینبه‌را مزگه‌فتێ خستیه د خزمه‌تا نه‌ته‌وه‌یی دا ب تایبه‌ت ل ڤێ دووماهیێ كو رێژه‌كا هه‌ره زۆرا مامۆستایێن ئاینێ ئیسلامێ هانا خه‌لكی دده‌ن پشته‌ڤانێن پێشمه‌رگه‌ی بن و ب هه‌ر رێكه‌كا هه‌بیت هاریكاربن بۆ هێزێن به‌رگری كار ژ ئاخا كوردستانێ و ئارامی و ته‌حه‌ملا ڤی كاودانێ ب سه‌ر هه‌رێمێ دا دهێت بكه‌ن، له‌ورا بلا رۆلێ دیرۆكی و یێ نوكه یێ مامۆستایێن ئاینی ژ بیرا خوه نه‌به‌ین، ئه‌ڤه سه‌باره‌ت وان خزمه‌تێن ناڤخوه‌یی پێشكێشی گه‌لێ كورد دكه‌ن ژ لایێ ئاریشێن جڤاكی و ئارامیا ده‌روونی و گه‌له‌ك بابه‌تێن دی. سه‌باره‌ت رۆلێ وه‌زاره‌تا ئه‌وقافێ د بلندكرنا ده‌نگێ گه‌لێ كورد دا دیسا یا به‌رچاڤه، بگره ژ وان شاندێن ژ هه‌رێمێ سه‌ره‌دانا وه‌لاتێن ده‌رڤه دكه‌ن و ئه‌و شاندێن ژ ده‌رڤه قه‌ستا كوردستانێ دكه‌ن، نموونه: سه‌ره‌دانا (شێخێ ئه‌زهه‌رێ) بۆ كوردستانێ و دانا دیاركرنا وێ زولم و بێبه‌هركرنا ملله‌تێ كورد تووش بوویێ، دیسا ب رێیا حه‌جیێن كو ب ئالا و درووشمێن كوردستانی قه‌ستا وه‌لاتێ سعوودیێ دكه‌ن كو بۆ ئه‌گه‌رێ وێ چه‌ندێ چه‌ندین ملله‌تێن دی كوردان وه‌ك نه‌ته‌وه بنیاسن هه‌تا گه‌هشتیه وی راده‌ی پێشنڤێژێ مزگه‌فتا پێغه‌مبه‌ری (س) دعایان بۆ پێشمه‌رگه‌ی بكه‌ت و سه‌ركه‌فتنێ بۆ ملله‌تێ كورد بخوازیت.
ژ لایه‌كێ دیڤه (بالایی) دبێژیت هزرا سه‌له‌فیا جیهادی به‌لاڤدكه‌ت، مه دڤێت بده‌ینه دیاركرن كو وه‌زاره‌تا ئه‌وقافێ بۆ كاروبارێن ئاینی یه نه‌كو بۆ كاروبارێن ئیسلامیه له‌ورا نه ب تنێ هزرا سه‌له‌فی د وه‌زاره‌تا ناڤبری دا هه‌یه به‌لكی چه‌ندین ئۆلێن دی د ڤێ وه‌زاره‌تێ دا هه‌نه و وه‌زاره‌تا ئه‌وقافێ نه پشته‌ڤانه بۆ ڤێ هزرێ، به‌لكی خه‌لكه‌ك ڤێ هزرێ ژ هنده‌ك ژێده‌رێن دی وه‌ردگرن. رێزداری ئاماژه دایه وێ خالێ كو (100) كه‌س ژ وه‌زاره‌تا ئه‌وقافێ گه‌هشتینه تیرۆرستێن داعش و ل دووڤ راگه‌هاندنێن حوكمه‌تا هه‌رێمێ پتر ژ (500) كه‌سان ژ كوردستانێ گه‌هشتینێ، ئه‌رێ ئه‌و (400) دی ژ كیڤه گه‌هشتینێ؟ ل دووڤ تێۆرا ته پێدڤی یه وزاره‌تا په‌روه‌ردێ و وه‌زاره‌تا خوێندنا بلند هه‌ر دو ژی بهێنه گرتن، چونكی ب تنێ ل زانكۆیا دهۆكێ چه‌ندین كه‌س و ل زانكۆیا پۆلی ته‌كنیك ژی ده‌نگویێ گه‌هشتنا قوتابیه‌كی هه‌یه كو گه‌هشتینه تیرۆرستێن داعش و ل قوتابخانه‌كێ ژی درووشمێن دژی گه‌لێ كورد هاتینه نڤیسین، ئه‌رێ ما وه‌زاره‌تێن ناڤبری ئه‌و هانداینه وه‌بكه‌ن؟
خالا دی سه‌باره‌ت گۆرستانه‌كا تایبه‌ت بۆ كوشتیێن تیرۆرستێن داعش بهێته دروستكرن، ب دیتنا من ژی ئه‌ڤه بریاره‌كا شاشه، به‌لێ پشتراست ئه‌و بریار یا هاتیه دان داكو گۆرستانێن شه‌هیدێن مه یێن پیرۆز ب پیساتیا له‌ش و گیانێ وان تیرۆرستان نه ئێته پیسكرن هه‌كه نه؛ نه وه‌زاره‌تا ئه‌وقافێ به‌لكی چ وه‌زاره‌تێن دی نه د به‌رهه‌ڤن ژ نوو كاره‌كێ وه‌سا بكه‌ن مه‌زارگه‌هێن دوژمنان جاره‌كا دی بۆ مه ببنه رووگه‌هـ و په‌رستنا وان بكه‌ین، سه‌باره‌ت پێشنیازا (بالایی) بۆ دروستكرنا گۆرستانه‌كا تایبه‌ت ب شه‌هیدێن پێشمه‌رگه ئه‌و ژی كاره‌كێ بزه‌حمه‌ته بۆ مالباتێن شه‌هیدان و سه‌ره‌دانا گۆرێن وان بكه‌ن، باشتر ئه‌وه ته پێشنیاز كربا بۆ شه‌هیدێن هه‌ر پارێزگه‌هه‌كێ گۆرستانه‌كا تایبه‌ت بهێته دروستكرن، هه‌كه نه ب تنێ ژ هه‌ژی دبینین گۆرستانه‌كا تایبه‌ت بۆ بهێته چێكرن به‌لكی گیانێ شه‌هیدان و ناڤێ وان یێ د دلێ مه دا.
سه‌باره‌ت خالا دی كو ئاینی د خزمه‌تكرنا داگیركه‌ران دا بكاردئینن، ئه‌ز دبێژمه براده‌ری بلا دووڤچوونه‌كێ بكه‌ت و گۆتنێن خوه ل سه‌ر شه‌نگسته‌كێ مه‌نتقی بێژیت، پشتراست دێ بینیت كو رێژا هه‌ره زۆر كو د شیاندایه بێژین 90% ل دووڤ گۆتنا سه‌یدایێ (خانی) دچن ده‌مێ دبێژیت (ته‌كمیل بكه‌ن دین و ده‌وله‌ت) ئه‌ڤ رێژا دی ژی ئه‌گه‌ر دبیت هه‌بن دژی ملله‌تێ خوه بن به‌لێ پا نوونه‌راتیا وه‌زاره‌تا ئه‌و قافێ ناكه‌ن هه‌روه‌كی مه ل سه‌ری دایه دیار كرن مرۆڤێن خائین و نه‌باش ل هه‌می جهان یێن هه‌ین.
دیسا ناڤبری فه‌رمانبه‌رێن وه‌زاره‌تا ئه‌وقافێ تومه‌تباردكه‌ت كو ئه‌ندام و لایه‌نگرێن حزبێن ب ناڤ دیمۆكرات و لیبرالن، رامانا ڤێ چه‌ندێ ئه‌وه كو ته باوه‌ری ب حزبێن كوردستانی نینه و خه‌بات و شه‌هید و قوربانیدانێن وان ل ده‌ف ته سه‌خته‌نه، هه‌كه ته نه دگۆت ب (ناڤ دیمۆ‌كراتن) وه‌كی دی ژی ئه‌م هه‌می دزانین ئازادیا سیاسی یا ل كوردستانێ هه‌ی و فه‌رمانبه‌رێن ئه‌وقافێ ژی وه‌كی هه‌ر وه‌زاره‌ته‌كا دی د ئازادن لایه‌نێ خوه یێ سیاسی بهه‌لبژێرن، یێن هه‌ین ب ئاشكرایی ل گه‌ل حزبێن ئیسلاما سیاسی و یێن هه‌ین ل گه‌ل حزبێن دی یێن سیاسی، ئه‌و تۆمه‌تێن ته داینه پال وه‌زاره‌تا ئه‌وقافێ (دو رویی یه) و وه‌زاره‌تا ناڤبری نه ب وی ره‌نگی یه یێ ته دایه دیاركرن، هه‌كه شاشی هه‌بن ب گرتنا ده‌رۆكێ وه‌زاره‌ته‌كێ نائێنه چاره‌كرن، به‌لكی دڤێت ب رێیێن زانستی وان ئاریشان چاره‌بكه‌ین، و ئه‌وا ته پێشنیازكری كو وه‌ك وه‌زاره‌ت نه‌مینیت و ببیته رێڤه‌به‌ری یان كۆمه‌له‌ك، چ بهایان تێدا نابینم چونكی گوهۆرینا ناڤی چ نا گۆهۆریت چ وه‌زاره‌ت بیت ئان رێڤه‌به‌ری بیت ئان كومه‌له‌ك بیت.
ب تنێ تشتێ من مایی بێژمه (ئه‌حمه‌د بالایی) و گه‌له‌ك نڤیسه‌رێن مه ئه‌وه؛ نڤیسانا گۆتاران بلا ل سه‌ر شه‌نگسته‌كێ وه‌سا بیت خه‌لك و خوانده‌ڤان و گه‌لێ مه ب گشتی مفای ژێ وه‌رگرن،هه‌كه دارێتنا كه‌ربێ یه، رۆژنامه نه جهێ هندێ یه. هه‌كه دیاركرنا زه‌ڤله‌كانه، رێیێن دی یێن هه‌ین خوه پێ دیاربكه‌ین. خه‌لكێ مه یێ ب هیڤیا ره‌وشه‌نبیران ڤه كو ئاراستێ ژیانێ بۆ دیار بكه‌ن، ڤێجا بلا ب وژدان و میانره‌وی هزران د ناڤ خه‌لكی دا به‌لاڤ بكه‌ین. هه‌ڤركیا هزری بلا ب رێیێن ره‌وا بیت، هه‌كه تو نه‌شێی ب شیانێن خوه خه‌لكی به ب خوه ب كێشی یێ به‌رامبه‌ر نه‌شكێنه. گۆتارخوین و پێشنڤێژێ مزگه‌فتا كۆرا
