به‌رشه‌لۆنا چاڤ ل سه‌ركه‌فتنا ئێكێ یه د چامپیۆنزێ دا
ئه‌ڤرۆ
دهێته چاڤه‌ڕێ كرن ئه‌ڤرۆ هه‌شت یاریێن دی ژ گه‌ڕا سێیێ یا قۆناغا كۆما د چارچووڤێ قاره‌مانیا یانێن ئۆرۆپا قاره‌مانێن خولا یا ته‌پا پێی چامپیۆنز لیگ بهێنه كرن پشتی دوهی هه‌ر چار كۆمێن ئێكێ هه‌تا چارێ یاریێن خوه ئه‌نجامداین.
كۆما پێنجێ.
د ئێكه‌م یاریێن ئه‌ڤرۆ دا ل ده‌مژمێر 7:45 شه‌ڤ یانا به‌رشه‌لۆنا یا ئسپانی ل یاریگه‌ها خوه كامب نو دێ مێڤانداریا دێنامۆكێڤ یا ئۆكراین كه‌ت، بۆ خودانێن ئه‌ردی دێ یاریێ بۆ ڤه‌گه‌ڕیانا ناڤ هه‌ڤڕكیێن قاره‌مانیێ دا بیت و بزاڤا سه‌ركه‌فتنا ئێكێ كه‌ت، به‌رشه‌لۆنا د ئاریشه‌كا مه‌زن دایه ژبه‌ركو بێی سه‌ركه‌فتن و چو خال كوم نه‌كرینه ل رێزا دووماهیێ دهێت، لێ راهێنه‌رێ وێ یێ هوله‌ندی رۆنالد كۆمان گه‌شبینه یاریا ئه‌ڤرۆ ڤه‌گه‌ڕیانا بهێزبیت تایبه‌ت پشتی ئاستێ بلند یێ فاتی، ممفیس،دیمبلی و ئه‌گۆێرویی كو هێزا یانا كاته‌لۆنی یه، هه‌مبه‌ری وێ دێنامۆكێف ب خاله‌كێ رێزا سێیێ دهێت، ژلایه‌كێ دووڤه بایرن میونخ یا ئه‌لمانی ئێك ژ به‌ربژارێن هێز بۆ ناسناڤی دێ بیته مێڤانا پۆرتۆ یا پورتۆگالی، یانا ئه‌لمانی ب شه‌ش خالان سه‌رێ لیستێ دهێت و یا پورتۆگالی ب چار خالان رێزا دویێ دهێت ئانكۆ ئه‌ڤ یاریه دێ یا هه‌ڤڕكیێ بیت بۆ سه‌رێ لیستێ، بایرن ب پێكهاتیه‌كێ رێكخستی و خودان سه‌ربۆر دێ هه‌مبه‌ری یاریزانێن گه‌نج ژ پورتۆگالێ بن، ئه‌ڤ یاریه ده‌مژمێر ده‌هی شه‌ڤ هێته ئه‌نجامدان.
كۆما شه‌شێ.
یاریگه‌ها ئۆلد ترافۆرد دێ بیته جهێ ئێك ژ هێزترین یاریێن دێ یێن ئه‌ڤ شه‌ڤه دهێنه ئه‌نجامدان ده‌مێ یانا مانچسته‌ر یۆنایتد یا ئنگلێزی مێڤانداریا هه‌ڤڕكا خوه ئه‌تلانتا یا ئیتالی دكه‌ت، هه‌ردو تیم دێ بزاڤێ كه‌ن سه‌رێ لیستێ وه‌ربگرن و جه‌ماوه‌رێ خوه ئاشت بكه‌ن، یانا ئنگلێزی ئه‌وا سێ خال ژ دو یاریا ده‌ستڤه‌ئیناین رێزا دویێ دهێت لێ دڤێت كریستیانۆ رۆنالدو و هه‌ڤالێن خوه باوه‌ریا جه‌ماوه‌رێ خوه ڤه‌گه‌ڕینن پشتی ئه‌نجامێن لاواز د خولا ئنگلیزێ دا، هه‌مبه‌ری وێ یانا ئیتالی ئه‌وا ب چار خالان سه‌رێ لیستێ دهێت بزاڤا سه‌ره‌كی پاراستنا رێزبه‌ندیێ بیت ژبۆ گه‌شكرنا هیڤیێن ده‌ربازبوونێ بۆ قۆناغا شانزدێ، ژلایه‌كێ دووڤه ڤیاریال یا ئسپانی دێ بیته مێڤانا یۆنگ بۆیز یا سویسرایێ، خودانێن ئه‌رد و یا جه‌ماوه‌ری ب سێ خالان رێزا سێیێ دهێت كو تنێ سه‌ركه‌فتنه‌ك تۆماركربوو ل سه‌ر مان یۆنایتدێ، ڤیاریال ب ئێك خال رێزا چارێ و دووماهیێ دهێت و ئه‌ڤ یاریه دێ چاره‌نڤیسێ وان دیاركه‌ت، هه‌ردو یاری دێ ل ده‌مژمێر 10ی شه‌ڤ هێنه ئه‌نجامدان.
كۆما حه‌فتێ.
دهێته هژمارتن كۆما نه دیار بۆ سه‌رێ لیستێ و ده‌ربازبوونا پێشوه‌خت ژبه‌ركو ئاست و نێزكبوونا خالان لێ دیاره، ده‌مژمێر 7:45 شه‌ڤ خودانا سه‌رێ لیستێ رێدبۆل سالزبۆرگ یا نه‌مسایی ب چار خالان دێ مێڤانداریا فۆلفسبۆرگ یا ئه‌لمانی كه‌ت ئه‌وا دو خال كۆمكرین و رێزا سێیێ دهێت، رێد بۆل دێ هه‌موو بزاڤان كه‌ت به‌رده‌وامیێ بده‌ته سه‌ركێشا كۆمێ، لێ هیڤیێن فۆلفسبۆرگێ ژی د مه‌زنن ودێ بزاڤا قه‌ره‌بوویا ژ ده‌ستدانا خالان كه‌ن پشتی دو وه‌كهه‌ڤیان د كۆمێ دا ئینایی، د یاریه‌كا دی دا یانا لیل یا فره‌نسی دێ مێڤانداریا سیڤییا یا ئسپانی دكه‌ت ژبۆ گه‌شتكرنا هیڤیێن خوه ئه‌وا نوكه ب خاله‌كێ رێزا چارێ دهێت لێ هه‌مبه‌ری وێ سیڤییا ب خه‌ونێن مه‌زن دێ شه‌ڕی بۆ سێ خالان كه‌ت تایبه‌ت پشتی دو وه‌كهه‌ڤیێن نه چاڤه‌ڕێكری كو دو خال هه‌نه و رێزا دویێ دهێت،ئه‌ڤ یاریه دێ ل ده‌مژمێر 10ی شه‌ڤ هێته كرن.
كۆما هه‌شتێ.
یانا یۆڤانتۆس یا ئیتالی ل وه‌لاتێ رۆسیا دێ بیته مێڤانا یانا زێنیت سانت پوترۆسبۆرگ یا روسیایێ بیت ژبۆ پاراستنا سه‌رێ لیستا ڤێ كۆمێ پشتی شیایی د دویاریێن بوری دا شه‌ش خالان كۆمبكه‌ت، هه‌مبه‌ری وێ زێنێت ژی ده‌لیڤه‌كا باش دایه بۆ هه‌ڤڕكیێ لسه‌ر پلێته‌كا ده‌ربازبوونێ هه‌كه‌ر شیا سێ خالان بده‌ستڤه بینت، ئه‌ڤچه‌نده ژی ب سانه‌هی نابیت ژبه‌ركو پێكهاتیێ ماسیملیانۆ ئه‌لگێری راهێنه‌رێ یۆڤانتۆس رژدن چو خالان ژده‌ست نه‌ده‌ن پێخه‌مه‌ت مسۆگه‌ركرنا ده‌ربازبوونێ، ژلایێ خوه‌ڤه چێلسی یا ئنگلێزی قاره‌مانا چامپیۆنزێ یا وه‌رزێ بوری دێ ل یاریگه‌ها خوه ستامفۆرد برێدچ مێڤانداریا مالمۆ یا سویدی كه‌ت، یانا ئنگلێزی ئه‌وا سێ خال كۆمكرین رێزا سێیێ دهێت چو بژارده نینن ژبلی سه‌ركه‌فتنێ ژبۆ به‌رده‌وامیا ئارمانجا خوه.
