به‌رهه‌ڤبوونا سه‌رۆكێ حوكمه‌تێ ل په‌رله‌مانی و چه‌ند تێبینیه‌ك
به‌درخان زاویته‌ی
به‌رهه‌ڤبوونا سه‌رۆكێ حوكمه‌تێ ل روونشتا په‌رله‌مانی ل رۆژا ٥-١٠-٢٠٢٠ و پێشكێشكرنا راپۆرته‌كا تێروته‌سه‌ل ل سه‌ر كارێ حوكمه‌تێ و ئه‌و قه‌یران و گرفتێن روو ب رووى حوكمه‌تێ و هه‌رێمێ بووین و كارتێكرنا وان ل سه‌ر ژیانا خه‌لكی و پتری ١٠ ده‌مژمێران به‌رسڤا پسیارێن په‌رله‌مانتاران دا، بێی چ كێشه و فه‌وزا و شكاندن و دلمان دروست ببن، كو راستی ژی پێنگاڤ و روودانه‌كا بێ وێنه بوو، نه‌ك ل سه‌ر ئاستێ عیراقێ و ناڤچێ، به‌لكو ل سه‌ر ئاستێ جیهانێ ژی.
حوكمه‌ته‌ك ل بن ڤان هه‌می فشاران بیت و د بارودۆخه‌كێ دژواردا و تووشی چه‌ندین قه‌یرانا بووی و حازربن ل په‌رله‌مانی و هه‌ر تشته‌كی رۆن و ئاشكرا بكه‌ن، بۆ خه‌لكی و به‌رسڤا هه‌می لایه‌نان بده‌ن ئه‌ڤه گۆپیتكا راستگۆیێ یه ل گه‌ل خه‌لكی و پێنگاڤه‌ك بوو، ژبۆ سه‌راستكرنا كارێ په‌رله‌مانی كو دروست ببیته چاڤدێر و پشته‌ڤانا حوكمه‌تێ داكو ڤێ قووناغێ بكێمترین زیان ده‌رباسكه‌ن.
لێ تشت سرنجراكێش، ئه‌وه پتریا پسیاران ل دۆر مووچه‌ی و گه‌نده‌لیێ بوون، ئه‌ڤه ل ده‌مه‌كی قانوونا چاكسازیێ هه‌ر ژ په‌رله‌مانی ده‌ركه‌فتیه و په‌رله‌مان و په‌رله‌مانتار ب خوه باش دزانن بابه‌تێ مووچه‌ی ب چ ره‌نگه!! و راگه‌هاندنا كوردی ل ئاستێ ڤی بابه‌تێ هنده مه‌زن نه‌بوو و ب دروستی ل سه‌ر نه راوه‌ستیان، به‌لكو هه‌ر لایه‌نه‌كێ سیاسی و هه‌ر په‌رله‌مانتاره‌كی وه‌كی خوه بابه‌ت شرۆڤه‌كر و به‌لاڤكر!
خۆیابوو زۆربه‌یا هه‌را زۆرا پسیاران بۆ سه‌رۆكێ حوكمه‌تێ بوون، وه‌ك پارتی نه وه‌ك حوكمه‌ت!! و وه‌ك تۆمه‌ت دانه پال پارتی و دیاره ئه‌و لایه‌ن كینه و مه‌ره‌من وان چنه! و هه‌ر ئه‌ڤ لایه‌نه‌نه هۆسا بۆ خه‌لكی دیاركریه كو دڤێت:ـ
پارتی!!
پارتی ناڤمالا كوردی رێكبێخیت!
پارتی ئێكرێزیێ دروست كه‌ت!
پارتی به‌ره‌ڤانیێ ژ هه‌رێمێ بكه‌ت!
پارتی خزمه‌تگوزاریا دابین كه‌ت!
پارتی كێشه و قه‌یرانان چاره‌كه‌ت!
پارتی گه‌نده‌لا سزابده‌ت و چاكسازیان بكه‌ت!
پارتی به‌رامبه‌ر فشار و پیلانن به‌غدا و حه‌شدێ راوه‌ستیت!
پارتی رێ ل ده‌ست تێوه‌ردانێن ده‌ركی بگریت و لوغمێن وان یێن سیاسی و ئه‌منی ژ ناڤ ببه‌ت!
پارتی پشته‌ڤانیا پارچێن دی یێن كوردستانێ بكه‌ت!
پارتی كوردستانێ پارێزیت ژ هه‌می مه‌ترسیان!
پارتی كار بر سه‌ربه‌خوه‌یێ بكه‌ت!
پارتی و پارتی و پارتی!
ئه‌و بخو دان پێدانێ دكه‌ن كو ئه‌گه‌ر پارتی نه‌بیت چ هه‌رێم و كوردستان نامینن!
به‌لێ خه‌لك ب خوه دزانیت داخوازی و گله و گازندێن خوه ئاراسته‌ی كێ دكه‌ت و پشتی روودانێن 16 ئوكتوبه‌رێ هه‌می تشت بوو رۆهن و ئاشكرا بووینه، لێ به‌رامبه‌ر ڤێ باوه‌ریێ و دانپێدانا ڤان لایه‌نان دڤێت پارتی هه‌می هه‌ولان بده‌ت كو ل ئاست ڤێ ڤیان و باوه‌ریا خه‌لكی بیت و ژده‌ست نه‌ده‌ت!
به‌رامبه‌ر ڤێ بارگرانیا پارتی دڤێت ئه‌م ژی هاریكار بین ورێ ل خائین و خاكفرۆش و گه‌نده‌لا بگرین و كوردستانێ ژ پیلان و فه‌سادا وان پارێزین!
