به‌ره‌ف باشبوونێ
ئحسان ئامێدی
خوشبوونه‌ك د ره‌وشا هه‌رێما كوردستانێ دا هه‌یه، بتایبه‌تی ل ئاستێ ده‌رڤه، ئه‌ڤ گه‌ریان و گفتوگویێن سه‌روك و كاربده‌ستێن هه‌رێما كوردستانێ بۆ وه‌لاتێن بیانی كو جه‌مسه‌رێن جیهانێ نه، ژ ئه‌مریكا بگره بۆ روسیایێ و به‌رێتانیا و فه‌ره‌نسا و چینێ و توركیا و ئیرانێ و گه‌له‌ك وه‌لاتێن دی، بۆ كوربه‌ندێن جیهانێ، ل داڤۆسێ بۆ مونشن و دوبه‌ی و سانپترسبۆرگ، و ئه‌و پێشوازیا گه‌رم و كۆمبوونێن تایبه‌ت دگه‌ل مه‌زنه سه‌رۆك و كاربده‌ستان وێ نیشادده‌ت كو هه‌رێما كوردستانێ پێگه‌یه‌كێ گرنگ هه‌یه و ل جهێ پیته‌دانا ده‌وله‌تێن هه‌رێمایه‌تی و جیهانی یه و هه‌میان وه‌سا نیشادایه كو پشته‌ڤانین هه‌رێمه‌كا سه‌قامگیرن و دڤین په‌یوه‌ندیێن باش دگه‌ل هه‌رێمێ هه‌بن و هه‌رێم بشێت كێشه و گرفتێن خوه ل نافخوه و ل گه‌ل ئیراقێ چاره‌سه‌ركه‌ت، ئه‌ڤه ژی گه‌شبینیه‌كێ چێدكه‌ت كو سه‌نگا هه‌رێمێ گرانه و جهێ پیته‌دانا نێده‌وله‌تییه و خواسته‌ك هه‌یه ئارامی و سه‌قامگیری ل ده‌ڤه‌رێ جێگیربیت، ئه‌ڤه هه‌ستكرنێ ب به‌رپسیاریێ پتر لێدكه‌ت كو به‌ره‌ف باشكرنا بارودۆخێ ناڤخوه‌یی و ئیراقێ بچین.
زیره‌كیا سه‌رۆك و كاربده‌ستێن كوردان كو خوه د كه‌ساتیا سه‌رۆك بارزانی و هه‌ڤرێبازا وی دا دبینه‌ڤه د وێدایه كو دشێن دگه‌ل هه‌ڤدژ و هه‌ڤڕكا كۆمببن و راكێشنه گفتوگو و دانوستاندن و لێكتیگه‌هشتن و ریككه‌فتنان.
ڤان سه‌رۆك و سه‌ركرده‌یان وه‌كریه كو ل ئاستێ سه‌رۆك ده‌وله‌ت و حوكمه‌تان سه‌ره‌ده‌ری و پێشوازی لێ بهێته‌كرن و دانوستاندن دگه‌ل دا بهێته‌كرن، ئه‌ڤه نیشانا هێز و پێگه‌یێ هه‌رێمێ و كه‌ساتیا ڤان سه‌رۆك و كاربده‌ستانه و ده‌ستكه‌فتیێن دیتر ل دویڤدانه.
ده‌مێ سه‌رۆكێن هه‌رێمێ ل ئاستێ سه‌رۆكێن ده‌وله‌تێن مه‌زنێن جیهانێ رێز لی بهێته‌كرن و سه‌ره‌ده‌ری دگه‌لدا بهێته‌كرن ئه‌ڤه نیشانا پێشڤه‌چوونا دۆزا كوردستانێ یه.
ده‌ڤه‌را روژهه‌لاتا ناڤین وه‌كو ده‌ریایه‌كا پر پێله و له‌هیێن خوه ب هه‌می لاڤه‌به‌لاڤ دكه‌ت، د ناڤ ڤێ گێله‌شۆكێن هه‌ڤدژیێ و هه‌ڤڕكیێ ل هه‌ڤهاتنا چێدبن و هه‌رێما كوردستانێ ب هونه‌رێ ڤان سه‌رۆك و كاربده‌ستان رێكا خوه دشه‌قینیت و ڤه‌دكه‌ت.
وه‌لاتێن ئێكگرتیێن ئه‌مریكا دوسته‌كا هه‌رێمێ یه، جه‌مسه‌رێ جیهانیه هه‌ڤدژه دگه‌ل ئیرانێ و گه‌له‌ك هێزێن دی ل ده‌ڤه‌رێ، هه‌روكو هه‌ڤڕكه دگه‌ل رۆسیا و چینێ و هنده‌ك ده‌وله‌تێن دی ل دنێ. هه‌مان ده‌مدا رۆسیا و چین و به‌رێتانیا و فه‌ره‌نسا ژی ژی هه‌ڤڕكێن هه‌ڤن و دگه‌ل گه‌له‌ك هێزێن ده‌ڤه‌رێ دژن و دناكۆكن. خوه هه‌ڤركی و ناكۆكیێن ده‌وله‌تێن هه‌رێمایه‌تی توركیا و ئیران و كۆمبه‌ستا عه‌ره‌بی و سیاسه‌تێن وان هه‌مبه‌ری هه‌ڤ و هه‌مبه‌ری كوردستانێ د مێژوویێ نه و دكویرن، ئه‌ڤجا ژی ئه‌ڤ هه‌می هه‌ڤرك و هه‌ڤدژ و هه‌ڤ ناكۆكه گفتوگویان دكه‌ن و به‌رژه‌وه‌ندیێن خوه دهاژون!.
سه‌رۆك و كاربده‌ستین كوردستانێ باش د ڤان دژاتیا و ناكۆكیا دگه‌هن و دزانن به‌رژه‌وه‌ندى د چ دانه و چاره‌سه‌ری ل كیڤه‌نه و هه‌ر ده‌وله‌ته‌ك ژ ڤان چه‌ند گرنگیا خوه هه‌یه بۆ هه‌رێمێ و ده‌ڤه‌رێ.
هونه‌ره‌ك و سه‌ركه‌فتنه‌ك مه‌زنه و جهێ شانازیێ یه سه‌رۆك و كاربده‌ستێن هه‌رێمێ دگه‌ل هه‌می لایه‌نێن هه‌ڤدژ و هه‌ڤرك ل ئیراقێ دا كۆمببن و چاره‌سه‌ریا بۆ گرێ و ئالۆزیان ببینن و دگه‌ل ده‌وله‌تێن هه‌رێمی دانوستاندنان بكه‌ن و لێكتێگه‌هشتنا پێك بینن، و دگه‌ل زلهێزێن جیهانێدا ئالوگورا دید و بۆچوونان بكه‌ن و پشته‌ڤانیا وان بۆ هه‌رێمێ دابینبكه‌ن، ئه‌ڤه پشتراستیه‌كێ چێدكه‌ت كو هه‌رێما كوردستانێ یا بخودانه و ب دوست و پشته‌ڤانه و پاراستیه. لێ به‌رپسیاریا وێ ژی گه‌له‌كه و مه‌زنه بۆ چاره‌سه‌ركرنا كێشه‌یێن ناڤخوه‌یی و ئیراقێ و ده‌وله‌تێن هه‌رێمایه‌تی.
نهو ته‌پك ل به‌رۆكا هه‌رێما كوردستانێ یه كو ل ئاستێ ڤێ بزاڤا سیاسی و دیبلوماسی د ناڤ هه‌رێمێ دا ژی كاربكه‌ن و ل هه‌ڤبهێن بۆ نه‌هێلانا ناكوكیان و ڤه‌كرنا گرێیان و چاره‌سه‌ركرنا كێشه‌یان، و به‌رپسیاریا مه‌زن ژی ل سه‌ر ملێن پارتیا دیموكراتی و یه‌كێتی نیشتیمانی یێن كوردسانێ نه، كو خۆ ل ئاستێ ڤان ریدان و پێشداچووناندا ببینن و ده‌ستپێشخه‌ریێن ئه‌رێنی بكه‌ن بۆ چاره‌سه‌ریێن بنره‌تی ژبوونا مان و به‌رده‌وامبوون و گه‌شه‌بوونا هه‌رێما كوردستانێ.
مرۆڤ یێ پشتراست و گه‌شبینه ئه‌وێن شیاین ڤان یاریا هه‌میان بكه‌ن دێ ل ئاستێ ناڤخوه ژی رۆلێ خوه گێرن و چاره‌سه‌ریان بینن.
سیناهیێن باشبوونێ یێن دیاردبن، ئه‌ڤ گه‌رێن گه‌ریانان و دانوستاندنان به‌لگه و بینه‌رن و د ئه‌رێنینه، و ئه‌وا دیار ده‌ستپێشخه‌ریێن سه‌رۆك و كاربده‌ستێن پارتی ژبۆ ده‌ربازبوونێ ژڤان گرێ و ئاسته‌نگان د به‌رده‌وامن و د به‌رژه‌وه‌ندا هه‌رێما كوردستانێ دانه و د گه‌شبینن كو دێ بارودوخ به‌ره‌ف ئاسایی بوونێ و باشیێ به‌ن، ب هیڤینه یه‌كێتی ژی ل وی ئاستی ب به‌رسڤ بهێت و پێكڤه هه‌رێمێ به‌ر ب قۆناغه‌كا باشتر پاژوون.
گه‌لێ هه‌رێما كوردستانێ گه‌له‌ك گوری و قوربانی داینه بۆ دامه‌زراندنا هه‌رێمێ وه‌كو كیانه‌كێ فیدرالیێ ده‌ستوری، چاڤه‌رێ یه پروسا وێ یاسیاسی بكه‌ڤیته سه‌ر رێبازا خۆ یا دروست و خزمه‌تێن باشتر بهێنه‌كرن و خه‌لك ب ئاسایش و خوشگوزه‌ران و سه‌رفراز بژیت.
