به‌رى بگه‌هنه بازارى دهێنه فروتن
ئه‌ڤرۆ نیوز، نه‌وزاد هلۆرى:
جوتیاره‌كێ شێلادزێ رێژه‌یه‌كا زور یا باجانێن كوردى ل گوندێ بیاوێ یا سه‌ر ب ده‌ڤه‌را زێبارێ چاندینه، وه‌كو ئه‌و دده‌ت دیاركرن ژبه‌ر تام و ساخله‌میا باجانێن كوردى داخوازیه‌كا زور لسه‌ر هه‌یه، تا وى راده‌یى به‌رى بگه‌هنه بازارى هه‌موو دهێنه فروتن.
عه‌گید شاجى، ئه‌و جوتیاره بۆ ئه‌ڤرۆ نیوز گۆت: (چاندنا باجانان هونه‌ره و پێدڤى ب شاره‌زایه‌كا باش هه‌یه، هند د چاندن و سه‌خبێرى و ب رێڤه‌برنا وان، هند ژى ژ چاندنا جورێ ته‌ماته‌یان، ژبه‌ركو خه‌لكێ مه بدوڤ تشتێ باش و ساخله‌م و جورى دگه‌ریێت).
زێده‌تر گۆت: (من زه‌ڤیه‌كا مه‌زن یا چاندنا باجانێن كوردى ل گوندێ بیاوێ چاندیه و رۆژانه نێزیكێ 50 سندوقێن باجانێن نمره ئێك و ب تام و خوش و ساخله‌م به‌رهه‌م دئینم و ل بازارێن ده‌ڤه‌رێ دفروشم، زێده‌بارى كو سندوقا باجانێن خوه گران د فروشم به‌لێ ژبه‌ركو ب تام و ساخله‌م و خوشن به‌رى بگه‌هنه بازارى هه‌موو دهێنه فروتن، هنده‌ك وه‌لاتى وه‌كو سرا ب تێله‌فونێ به‌رى وه‌خت سندوقه‌كێ یان دو سندوقان بۆ خوه ده‌ستنیشان دكه‌ن ژبه‌ركو داخوازییه‌كا مه‌زن يا ل سه‌ر هه‌ی).
ناڤبرى دیاركر ژى كو سندوقا 10 كیلویى یا باجانێن كوردى ب بهایێ حه‌فت بۆ هه‌شت هزار دیناران د فروشیت و گۆت: (ئه‌م رۆژانه نێزیكێ پێنج كه‌سان د زه‌ڤیا باجانان دا كاردكه‌ین و به‌رده‌وام چاڤدێرى و سه‌خبێریێ بۆ دكه‌ین و ژیانا مه گرێدایه ب چاندنێ ڤه، ب دیتنا من هه‌كه جوتیارى بڤێت تشته‌كێ بفروشیت پێدڤىیه ب دووف تشتێ گرنگ و ژێهاتى بچیت و گرنگیێ بده‌ت چاندنێ و ب زانستێ سه‌رده‌م بچینیت و دوور ژ مادێن كێمیایى و نه‌خوه‌شیان).
