به‌ری نشته‌رگه‌ریا زارۆبوونێ پێدڤیه هژماره‌ك ده‌رمانان بهێنه راوه‌ستاندن
د. ئیمان یونس ئه‌سوه‌د، تایبه‌تمه‌ندا نه‌خۆشیێن ژنان و زارۆبوونێ دیاركر نشته‌رگه‌ریا زاڕۆكبوونێ حه‌فتیا 39 یا دوگیانیێ دهێته ئه‌نجامدان و پێدڤیه ده‌رزیا نه‌فه‌سا زاڕۆكی به‌ری ده‌مێ نشته‌رگه‌ریێ ب 24 ده‌مژمێرا بهێته‌دان و گۆت: گه‌له‌ك ژن پسیاردكه‌ن كیش جورێ به‌نجێ یێ باشه بو بهێته بكارئینان، دو جۆرێن به‌نجێ بو ڤێ نشته‌رگه‌ریێ دهێنه ب كارئینان، جورێ ئێكێ به‌نجا گشتی، هه‌روه‌سا به‌نجا خوجه (نصفی)، ده‌مێ به‌نجا گشتی دهێته ب كارئینان هنده‌ك ژ وێ به‌نجێ بو زاڕۆكی دچیت و كاریگه‌ریێ ل سه‌ر هه‌ناسا زاڕۆكی دكه‌ت پشتی زاڕۆك ژدایك دبیت، هه‌روه‌سا پشتی ئه‌نجامدانا نشته‌رگه‌ریێ دایك هه‌ست ب ئازاره‌كا زور دكه‌ت بنێ زكی، هه‌روه‌سا به‌نجا خوجه ب رێكا ده‌رزیكه‌كا زراڤ دهێته دانان و چ ئازار دگه‌ل نینن و ژ باشیێن ڤێ به‌نجێ بو زاڕۆكی ناچیت و ده‌مێ نشته‌رگه‌ریێ دا ته ئاگه‌ه ژ هه‌موو تشتا هه‌یه ده‌مێ ژدایكبوونا زارۆكی.
تایبه‌تمه‌ندا نه‌خۆشیێن ژنان و زارۆكبوونێ خویاكر به‌ری ئه‌نجامدانا نشته‌رگه‌ریێ ئه‌گه‌ر ژن حه‌بێن ئه‌سپڕین ب كار بینیت پێدڤیه به‌ری نشته‌رگه‌ریێ سێ روژان ب راوه‌ستینیت، هه‌روه‌سا ده‌رمان دهێنه راوه‌ستاندن ل دووڤ ئاموژگاریێن نوشداری.
د.ئیمانێ، ئه‌وژی دیاركر جهێ برینا نشته‌رگه‌ریێ دووڤ راوه‌ستان و قه‌بارێ زاڕۆكی دمینیت و پتریا جاران دوازده هه‌تا پازده سه‌نتیمان دهێته ڤه‌كرن، هه‌روه‌سا ده‌مێ نشته‌رگه‌ریا زاڕۆكبوونێ جارا دوێ یان پتر بیت ل سه‌ر هه‌مان جهێ ده‌ستپێكێ نشته‌رگه‌ری دهێته ئه‌نجامدان.
ل دووماهیێ د. ئیمان یونس، تایبه‌تمه‌ندا نه‌خۆشیێن ژنان و زارۆكبوونێ ئاماژه دا كو ده‌مێ دایك دزڤریته مال پشتی ئه‌نجامدانا نشته‌رگه‌ریا زارۆكبوونێ ئه‌گه‌ر جهێ نشته‌رگه‌ریێ ئاڤه خوین یان ئاڤا زه‌ر ژێ هات یان تا هاتنێ پێدڤیه سه‌ره‌دانا نۆشدارا خوه بكه‌ت داكو چ سه‌ربارك بو دروست نه‌بن.
