به‌رێ بنیاتی بۆ هه‌ژماره‌كا پڕۆژێن ساخله‌میێ هاته دانان
دهۆك، له‌زگین جوقی:
ب ئاماده‌بوونا د. عه‌لی ته‌ته‌ر، پارێزگاری دهۆكێ و د. سیروان محه‌مه‌د، نوونه‌رێ رێڤه‌به‌رێ گشتی یێ ساخله‌میا پارێزگه‌ها دهۆكێ به‌رێ بنیاتی ب گوژمێ پتر ژ هه‌شت ملیار دیناران بۆ هه‌ژماره‌كا پرۆژه‌یێن ساخله‌میێ هاته كرن و ئاڤاهیه‌ك ژی هاته ڤه‌كرن.
د. عه‌لی ته‌ته‌ر، پارێزگاری دهۆكێ د كۆنگره‌كێ رۆژنامه‌ڤانی دا دیار كر كو د به‌رده‌وامیا پرۆژه‌یێن خزمه‌تگوزاری و ئاڤه‌دانكرنێ دا یێن ژلایێ حكومه‌تا هه‌رێما كوردستانێ ڤه دهێنه پێشكیشكرن ل دهۆكێ به‌رێ بنیاتی بۆ سێ پرۆژان هاته دانان و پرۆژه‌ك ژی هاته ڤه‌كرن و گۆت: “ئه‌ڤ پرۆژه ب گوژمێ پتر ژ هه‌شت ملیار دیناران دهێنه بجهئینان، ب گوژمێ نێزیكی شه‌ش ملیار دیناران به‌رێ بنیاتی بۆ پرۆژێ ئاڤاكرنا سه‌نته‌رێ نه‌خۆشیێن په‌نجه‌شێرێ و چاندنا مه‌ژیێ هه‌ستی هاته دانان و بڕیاره پرۆژه د ده‌مێ 810 رۆژان دا ب دووماهی بهێت، هه‌روه‌سا ل نه‌خۆشخانا هیڤی ژی به‌رێ بنیاتی بۆ به‌رفره‌هكرنا نه‌خۆشخانا هیڤی یا زارۆكان و سه‌نته‌رێ گه‌لاڤێژ یێ په‌نجه‌شێرا زارۆكان ب گوژمێ 560 هزار و 440 دۆلاران هاته دانان و پرۆژه د ده‌مێ 210 رۆژان دا دێ ب دووماهی هێت، ل نه‌خۆشخانا ئازادی یا فێركرنی ژی به‌رێ بنیاتی ژلایێ خێرخوازه‌كی ڤه بۆ چاڤدێریا چڕ ب گوژمێ 450 هزار دۆلاران هاته دانان”.
پارێزگاری دهۆكێ د وی كۆنگرێ رۆژنامه‌ڤانی دا گۆتژی: “ب ئاماده‌بوونا قۆنسلێ وه‌لاتێ ئیتالیا و ب پشته‌ڤانیا رێكخراوێن ئیتالی، ب تایبه‌ت ژی رێكخراوا ئایسپۆ كو ئه‌ڤه چه‌ندین ساله هاریكاریا دهۆكێ د بیاڤێ ساخله‌میێ دا دكه‌ت و ل نه‌خۆشخانا ژن و زارۆكبوونێ كلینیكه‌كا ژ ده‌رڤه هاته ڤه‌كرن كو دێ شێت خزمه‌ته‌كا باش پێشكێشی وه‌لاتیان كه‌ت، ل سپێده‌هی و ئێڤاریان دێ د خزمه‌تا ژنێن دوگیان دا بیت”.
