به‌ر ب كیڤه خۆشتڤیێ من…
كوسه‌ر شه‌وكه‌ت
تاڤ زه‌ركه‌كا شكه‌ستی؛شكه‌ستی.. د هه‌ناسێن عاشقان دا خوه دگه‌هینیته د ناڤ دێرێن تێكسته‌كێ خه‌مگین دا، ئه‌ورێن بارانان ئاگرێ ب زه‌ڤێن په‌یڤان ڤه دڤه‌مرینن…
سه‌رێ هه‌می سحاریان با چه‌قێ گوله‌كێ دهه‌ژینیت. د ناڤبه‌را من و ویچه ویچا چووچكان دا، ئه‌سمانه‌كێ بێ داوییه!
ته هزر د داوییێن تژی دیتن دا كریه!؟د چۆنێن بێ رێك دا؟
به‌ر ب كیڤه خۆشتڤیێ من؟
چووچكه‌ك، هه‌می سحاریان؛ ژ ده‌نگێ ڤه‌كرنا په‌نجه‌ره‌یێ دڕه‌ڤیت. چه‌قێ گوله‌كێ ل هه‌می سحاریان چاڤه‌ڕێ هاتنا شه‌ڤێیه!
د ناڤبه‌را من و ته دا، كه‌ڤاله‌ك ل به‌ندا ڕه‌نگێن ژیانێ یه! بێده‌نگیه‌كا تژی ڤالاهیه ژ ده‌نگێ بالنده‌یان..
ما ئه‌وا د ناڤبه‌را من و ته دا، به‌لگه‌كێ كه‌ڤتیه!؟ ڕه‌شه‌بایه‌كی ب سه‌ر باژاڕی دا گرت!
ته هزر د وێ داویێ دا كریه، ئه‌وا دبیته ڕه‌ڤین؟ ته ترس ژ ڕه‌نگێن عه‌شقێ ڕاكریه؟
به‌ر ب كیڤه خۆشتڤیێ من؟
ل وی جهی؛ زڤرینه‌ك ب ڕه‌نگێ ڕاده‌ستكرنا ته‌بوو! ئه‌و ب ڕه‌نگێ گه‌رماتیا ده‌نگێ هه‌ناسه‌یێن ته بوو..
پرتێن دیسمبرێ دێ بژاله بن. دبیت ئه‌ڤه بن داوی په‌یڤ، به‌ری داوی دیتنا ته. شه‌ڤه‌ك ناخوازیت خه‌ون ب ته ڤه بهێنه دیتن، ژانه‌كێ سه‌رێ خوه ده‌ركریه ل داویا ڕۆناهیێ دگه‌ڕیت. پێلن ئاڤه‌كێ ئاوازێن مرنێ دژه‌نن.
به‌ر ب كیڤه خۆشتڤیێ من؟
هه‌می وه‌غه‌ر هه‌لگرێن حه‌زا ڤه‌گه‌ڕێنه..
ئێڤاره‌كا پێنجشه‌نبیێ هه‌ستێن خوه نخافتبوون ل چاڤه‌رێ هاتنا پڕبێژیا ئه‌ینیێ! ئاها وێ ئه‌ینیێ باڕۆڤا چوونێ ب سه‌رداگرت.
