به‌غدا ترلیۆنه‌ك و 658 ملیارێن جۆتیاران خوارینه
ئه‌ڤرۆ نیو: ئه‌میر ئه‌ترووشى
په‌رله‌مانتاره‌كێ عیراقێ رادگه‌هاند، به‌غدا زۆلمه‌كا مه‌زن ل جۆتیارێن هه‌رێمێ دكه‌ت، چونكو سالانه پارێ جۆتیاران د بۆدجا ته‌كمیلى دهێته په‌سه‌ندكرن و ته‌رخانكرن و پاره ناهێته ره‌وانه‌كرن و ل هنده‌ك جهان دهێته خوارن.
نه‌جیبا نه‌جیب، ئه‌نداما په‌رله‌مانێ عیراقێ بۆ (ئه‌ڤرۆنیۆز) دیار كر، ئه‌ڤ زۆلم و ته‌عداریا ل جۆتیارێن هه‌رێما كوردستانێ دهێته كرن به‌رپرساتیا سه‌رۆكێ ئه‌نجوومه‌نێ وه‌زیرانه، چونكو پارێ وان هه‌مى د بۆدجا ته‌كمیلى دا هاتبوو په‌سه‌ندكرن ب كۆژمێ ترلیۆنه‌ك و 658 ملیار دینار هاتبوونه ته‌رخانكرن و مه‌زاختن و ژلایێ ده‌ستوورى و قانوونى ڤه هاتبوونه په‌سه‌ندكرن و گۆت: نه‌دانا وان ب تنێ فێلبازیه‌كه عیراق ل جۆتیارێن هه‌رێمێ دكه‌ت.
مه‌جید موسا ئێك ژ جۆتیارێن پارێزگه‌ها دهۆكێ یه بۆ (ئه‌ڤرۆنیۆز) دیار كر كو ئه‌ڤه چار ساله ئه‌و گه‌نمى دچینیت و بۆ به‌غدا دهنێریت و ب تنێ پارێن وى نێزیكى 30 ملیۆن دیناران ل ده‌ڤ حكوومه‌تا به‌غدا هه‌یه و هێشتا وه‌رنه‌گرتینه و گۆت: هه‌كه به‌غدا پاره نینن، بۆچى دێ گه‌نمى ژ مه‌كرن.
ژ سالا 2014 و هه‌تا نها، جۆتیارێن هه‌رێما كوردستانێ سالانه گه‌نمى دچینن و به‌رده‌وام ژ بۆ به‌غدا دهنێرن، چونكو بازارێ وان ل هه‌رێمێ یێ كێمه و هه‌مى ناهێته مه‌زاختن، به‌لێ سال بۆ سالێ پارێ گه‌نمى دكه‌فیته سه‌ر حكوومه‌تا به‌دا و پاره ناهێته مه‌زاختن و هنارتن. د سه‌ر هندێ را عیراقێ سالانه پێدڤى چار ملیۆن ته‌نێن گه‌نمى هه‌یه و جۆتیارێن هه‌رێمێ و عیراقێ سالانه دشێن سێ ملیۆن ته‌نان به‌رهه‌م دئینن و عیراق هه‌ر سال ملیۆن ته‌نان ژ ده‌رڤه دكڕیت.
