بهغدا و سهرسالهك خویناوى
رهمهزان نسردین كێڤلى
رهوشا عیراقێ رۆژ بۆ رۆژ بهر ب خرابتر ڤه لێ دهێته و ناهێته چاڤهرێ كرن كو ئهڤ رهوشه سهقامگیر بیت یانژى گهلێن عیراقێ ههست ب ئارامی و ئاشتیێ بكهن ل ڤى وهلاتى. كهفتنا ل سهرئێك یا ئاریشه و گازندێن خهلكى بووینه پرسگرێگێن زۆر مهزن و ئێدى ب ساناهى ناهێنه چارهسهركرن, و بیناتێ دورستبوونا عیراقێ ب شاشى هاتیه ئاڤاكرن بێ حهزا خهلكێ رهسهنێ عیراقێ وهلاتهك هاتیه دورستكرن ب ناڤێ عیراق، و خالا دی یا ههره بالكێش لایهنێن سیاسى ل عیراقێ بهردهوام ههڤچهپهرن و دژى ئێك و دو كاردكن و باوهرى د ناڤبهرا وان دا نهمایه و گههشتى یه رادهیهكێ ههمى ئالاڤێن نێزیكبوونا خهلكى و سیاسهمهتداران زۆر ژئێك دوورن.
بهغدا بوویه گۆرهپانا ناكۆكیێن ڤهكرى چ بۆ وهلاتێن ئهقلیمى تایبهت ئیران توركیا و سعوودیه و قهگر ژلایهكێ دی ڤه بوویه گۆرهپانهك ناكۆكیان بۆ ئهمریكا و ئیرانێ و لاوازیا حوكمهتا عیراقێ و نهبوونا دهستههلاتهك پاك كو بشێت بهرژوهندیێن وهلاتێ خوه بپارێزیت وهكریه كو بهردهوام ئهڤ ناكۆكى یه قوول ببن و ژلایێ سهروهریێ ڤه ژ ههمى رویهكێ ڤه سهروهریا عیراقێ یا دهێته بنپێكرن ژ لایێ گهلهك وهلاتان ڤه. و سیاسهتهك نینه ل بهغدا كو بشێت روى ب روى ئهڤێن سهرپیچیێن نێڤدهولهتى بیت ل عیراقێ.
دابهشبوونا لایهنێن سیاسى و نهبوونا سیاسهتهك ئێكگرتى و ههبوونا گهندهلیێ و ههبوونا میلیشایێن نهقانوونى و پهرلهمانهك دابهش بووى مللهتهك پرت و بهلاڤ چ ژێ دهێـته چاڤهرێكرن ژبلى خوین رێتنى و كوشتن و كارێن خراب, لێ زۆر ب داخ ڤه جڤاكێ نێڤدهولى بێدهنگه ههمبهرى ئهڤان ههمى بۆیهر و كارێن درندانه و ئهڤان سهرپێچیێن دهێنهكرن وهسا دیاره نهتهوهیێن ئێكگرتى ژى بوویه بازنهك ژ زنجیرا بێ سهروبهریا ئهڤى وهلاتى و ئهوانژى هیچ ئۆمیدهك پێ نهمایه بهلێ كهتوارهك تهعله.
زۆربهیێ لایهنێن شیعى ئهڤرۆ ههڤدژن بۆ دانانا كهسهكی بۆ سهرۆك وهزیران ل دهمهكێ جادا عیراقى ئهوان ههمیان رهت دكت، سهرۆك كۆمار ل بن فشارێن زۆرڤهیه و نهشێت ئهڤى بابهتى ئێكلا بكهت و دو جاران پهنا بریه ل بهر دادگهها فیدرالى لێ ئهنجام ب وى رهنگى نهبووینه كو بشێت ئهڤێ پرسێ ئێك لابكهت، ل جههكێ دى شهرێ ئهمریكا دژى میلیشایێن شیعى ل ناڤخوهیا عیراقێ دهستپێكریه، گومان تێدا نینه ژبلى دیمهنێن خویناوى ئهم چ ژ عیراقێ ناوهرگرن و نابینن.
گرنگه كوردان رۆل نهبیت ل دانانا عیراقهك ب هێز دا دوباره ببته مهترسى ل سهر ههرێما كوردستانێ سهرهراى ئهڤێ رهوشا نوكه عیراق تێدا دهرباز دبیت دژایهتیكرنا ههرێما كوردستانێ بهردهوام دهێته دیتن و بیهیستن ل راگههاندنا عیراقى دا و ههتا كو جادا عهربى ژى یا بێ لایهن نینه ههمبهرى پرسێن گرێدایێ كوردان بلا ل بیرا مهبیت دوور نینه ل سهر رازیكرنا پشكهك ژ خونیشاندهران ب دههان قانوون دژى كوردان تێپهرینن و نموونه ژى قانوون ههلبژارتنێن عیراقێ مهترسیهك مهزن ل سهر دهڤهرێن مادێ 140 ههیه و بێ كوردان ئهڤ قانوونه تێپهراندن و دوور نینه گهلهك بابهتێن دی ژى بێ كوردان دهرباز بكهن ب بههانا خونیشاندانان، لهورا مه كوردان پێدڤى ب هشیارهیهك سیاسى ههیه ههمبهرى ئهڤ شانۆگهریا ل عیراقێ ههیێ و ل جهێ ئهو ههول دانا بكهن ههولێرێ وهكو بهغدا تێكههلى یاریهكا مهترسى داربكهن پێدڤى یه ئهم ههولێرێ بكن پایتهختێ ئاشتیێ و ئارامیێ و چاكسازیێن بنهرتى ئهنجام بدهن خهلكێ كوردستانێ دلنیا بیت ژ پێنگاڤێن حوكمهتى وباوهرى و متمانه د ناڤبهرا خهلكى و حوكمهتا ههرێمێ دورست بیت، چونكو بۆ مه زۆرا ب زهحمهته تێكهلى باژیرهك خویناوى بن ل ئهڤێ رهوشێ دا.