به‌فرێ كار بۆ سامانی و چه‌ندین كه‌سێن دی په‌یداكریه
دهۆك، نه‌وزاد هلۆری:
سامان و نێزیكی (25) گه‌نجێن دی، ژ گوندێن سپیندارێ و به‌رئاشێ و ئه‌و گوندێن دكه‌ڤنه سه‌ر رێیا چیایێ گاره‌ی هه‌رسال ل گه‌ل بارینا به‌فرێ كارێ فرۆتنا باقلك و ڤه‌خوارنێن گه‌رم دكه‌ن.
سامان مه‌جید، ئێك ژوان گه‌نجانه كو ل چیایێ گاره‌ی باقلك و ڤه‌خوارنێن گه‌رم دفرۆشیت، د دیداره‌كێ دا بۆ رۆژناما ئه‌ڤرۆ دیاركر كو سالانه ده‌مێ به‌فرێ دهێت ئه‌و دهێنه چیایێ گاره‌ی و باقلك و چاو شیر و نسكافیێ دفرۆشن و داهاته‌ك دگه‌هیته وان كو بۆ مالێن خوه ب مه‌زێخن.
زێده‌تر گۆت: ئه‌و كه‌سێن دهێنه سه‌رێ چیای بۆ بۆراندنا ده‌مه‌كێ خۆش دناڤ به‌فرێ دا و گرتنا وێنا و ئه‌نجامدانا یاریان، پتریا وان خه‌لكێ دهۆكێ و ده‌وروبه‌رێن وێ نه، هه‌روه‌سا گه‌شتیارێن عه‌ره‌ب ژی كو ژهه‌موو پارێزگه‌هێن عیراقێ نه دهێن، هه‌رده‌م شیره‌تا مه بۆ وان ئه‌وه ژینگه‌هێ ب پارێزن، هه‌روه‌سا به‌ری ببیته شه‌ڤ بزڤڕنه مالێن خوه دا تووشی چو روودانێن هاتن و چوونێ نه‌بن، چنكو ل ده‌مێ شه‌ڤێ به‌ستی چێدبیت و ئه‌گه‌رێن روودانان پترتر لێ دهێن، بۆ زانین كه‌سێن دهێنه ڤێره بۆ كاری هنده‌ك ژوان ده‌رچۆیێن زانكۆ و په‌یمانگه‌هانه.
