به‌هدینان و راده‌یه‌ك بۆ ئێكگرتوو یێن سلێمانیێ
پشكداری نه‌كرنا پێنج ئه‌ندامێن ئێكگرتوویا ئیسلامی د كومبوونا نه‌ئاسایی یا په‌رله‌مانێ كوردستانێ دا ل 19ی ته‌باخێ كو یا تایبه‌ت بۆ ب راستڤه‌كرنا قانوونا سه‌رۆكاتیا هه‌رێمێ، یا چاڤه‌رێكری بوو هه‌ر وه‌كو هێرشێن نه‌ره‌وا ژی بۆ سه‌ر وێ حزبێ ژلایێ ئه‌ندام و لایه‌نگرێن كومه‌لا ئیسلامی، گۆڕان و ئێكه‌تیێ ڤه د چاڤه‌رێكری بوون. لێ پرسیار ئه‌وه بۆچی ده‌مێ د كێشه‌یا هه‌لبژارتنا پارێزگارێ سلێمانیێ دا ئێكگرتوویا ئیسلامی بێ لایه‌نی هه‌لبژارتی و نه‌بوویه لایه‌ن د وێ باده‌كێ دا گۆڕان وه‌كو نوكه دژایه‌تیا ئێكگرتوو نه‌دكر، د ده‌مه‌كێ دا ل دووڤ ئه‌نجامێن هه‌لبژارتنان پۆستێ پارێزگاری به‌هرا گۆڕان بوو، لێ ب بێده‌نگیا ئێكگرتوو كێشه‌یا ده‌ستنیشانكرنا پارێزگارێ سلێمانیێ پتر ژ شه‌ش هه‌یڤان ڤه‌كێشا و ل دووماهیێ ژی ئێكه‌تیێ ده‌ست ژ وی پۆستی به‌رنه‌دا و گۆڕان ژی چ رێیێن دی ل به‌ر نه‌مان بتنێ كو دو سال ب دو سال قه‌بوول بكه‌ت.
ئێكگرتوو د كێشه‌یا پارێزگارێ سلێمانیێ دا نه‌بوو لایه‌ن دا كو سه‌قامگیریا وێ پارێزگه‌هێ تێك نه‌چیت ژ به‌ر كو دزانی ده‌رئه‌نجام دێ چ بن و ب باشی گوهداریا وان ده‌نگێن د ناڤ ئێكه‌تیێ دا دكر یێن د گۆتن هه‌لبژارتن دیار ناكه‌ن كی دێ بیته ده‌ستهه‌لادار ل ڤی باژێری به‌لكی ژمارا ده‌بابێن ئاراسێ شێخ جه‌نگی دیار دكه‌ن ده‌ستهه‌لات بۆ كێ یه. هه‌روه‌سا ئێكگرتوو ئاگه‌ه ژ لڤینێن گۆڕان ژی هه‌بوو كو د وی ماوه‌ی دا چه‌ك ل سه‌ر مه‌كویێن خو ل پاێزگه‌ها سلێمانیێ پارڤه دكر.
سه‌ركردایه‌تیا ئێكگرتوو یا سلێمانیێ یا كو نه‌خواستی ببنه پشكه‌ك ژ ململانێ یا پارێزگه‌ها سلێمانیێ و نه‌ساقامگیریا وی باژێری، د رژد بوون كو ببنه پشكه‌ك ژ ململانێیا گۆڕان و پارتی و نه‌سه‌قامگیریا هه‌رێما كوردستانێ بگشتی. هه‌ر ژ به‌ر ڤێ چه‌ندێ بوو سه‌ركردایه‌تیا ئێكگرتوو یا به‌هدینان رۆلێ خو دیت و ب گه‌فێن خو راده‌یه‌ك بۆ بالاده‌ستیا سه‌ركردایه‌تیا سلێمانیێ د بریارێن چاره‌نڤیسازێن ئێكگرتوو دا دانا و ئێكگرتوو ژ به‌ره‌یێ ململانێخواز و پۆپۆلیست دوور ئێخست.
هه‌كه بریارا پشكدارینه‌كرنا هنده‌ك ئه‌ندامێن ئێكگرتوو د كومبوونا نه‌ئاسایی یا په‌رله‌مانێ كوردستانێ دا پشكه‌ك ژێ بۆ وێ چه‌ندێ بیت كو لایه‌نێن سیاسی بگه‌هنه رێككه‌فتنێ و بارودوخ زێده‌تر ئالۆز نه‌بیت، زێده‌تر بۆ هندێ بوو كو ئێكگرتوو ب خو دابه‌ش نه‌بیت، ژ به‌ر كو پشكداریا ئێكگرتوو د روونشتنا په‌رله‌مانی و راستڤه‌كرنا وێ قانوونێ دا بیته ئه‌گه‌ر به‌شه‌كێ مه‌زن ژ سه‌ركردایه‌تیا ئێكگرتوو ل به‌هدینان ژ یا سلێمانیێ جودا ب بیت، هه‌ر وه‌كی چاوا پشتی پشكداریا په‌رله‌مانتارێن ئێكگرتوو د روونشتنا 23ی خزیرانێ دا، به‌رێز دیندار نه‌جمان دوسكی كو ئێك ژ دامه‌زرێنه‌رێن ئێكگرتوویه جودابوونا خو ژ وێ حزبێ راگه‌هاندی.
سه‌ره‌رای وێ چه‌ندێ كو پشتی روونشتنا 19ی ته‌باخێ هێرشه‌كا نه‌ره‌وا ب گشتی ل سه‌ر ئێكگرتوو دهێته كرن، د ناڤ ئێكگرتوو دا ژی ب ره‌نگه‌كی ژ ره‌نگان بزاڤ دهێته كرن پتر سڤكاتی ب ئێكگرتوویێن به‌هدینان بهێته كرن، ژ به‌ر كو په‌رله‌مانتارێن به‌هدینان گوهداریا جڤاتا سه‌ركردایه‌تیا ئێكگرتوو یا به‌هدینان كر و ته‌كه‌زی ل سه‌ر چاره‌سه‌ركرنا قه‌یرانێ برێیا سازانێ كر و نه‌خواستن ببنه سه‌ربازێن لایه‌نه‌كێ دی كو ره‌نگه گرێیه‌كا ده‌روونی-مێژووی ل گه‌ل پارتی هه‌بیت.
ل لایێ دی هه‌می یێ به‌حسێ هندێ دكه‌ن كو هه‌ره‌شه یێ ل ئێكگرتوویێن به‌هدینان هاتیه كرن، له‌وما وان پشكداری د كومبوونا په‌رله‌مانی دا نه‌كریه. كه‌س ژ وان یێ ئاماده نینه گوهێ خو بده‌ته ده‌نگێن نه‌رازیێن ئێكگرتوویێن به‌هدینان ل دژی بریارێن كه‌له‌گای یێن سه‌ركردایه‌تیا سلێمانیێ د ناڤ ئێكگرتوو دا و پشتگوهخستنا به‌هدینان د بریارێن گرنگ و ستراتیژی دا. (ئه‌ڤه چه‌ند ساله‌كه ده‌نگێن نه‌رازیبوونێ ل به‌هدینان ل دژی ڤێ چه‌ندێ بلند بووین).
یا سه‌یر نینه كو كه‌س و لایه‌نێن زوونا سلێمانیێ یان هه‌ڤال و هه‌ڤچه‌په‌رێن وان ل سه‌رانسه‌ری كوردستانێ ره‌خنان ل ئێكگرتوویێن به‌هدینان بگرن یان سڤكاتیێ پێ بكه‌ن ژ به‌ر كو بریارا عه‌قلانه‌یا سه‌ركردایه‌تیا به‌هدینان گورزه‌كێ گه‌له‌كێ كوژه‌ك بوو ژ بۆ وی به‌رنامێ وان بو خو دانای، لێ خالا جهێ ل سه‌ر راوه‌ستانێ ئه‌وه كو داخویانی و ره‌خنه‌یێن هنده‌ك سه‌ركردێن ئێكگرتوو یێن سلێمانیێ ژی ب ره‌نگه‌كێ ژ ره‌نگان بچنه د چارچوڤێ وێ سڤكاتیێ دا.
مه‌كته‌ب سیاسیه‌كێ ئێكگرتوو یێ سلێمانیێ د داخویانیه‌كێ دا گۆت (مه د ڤیا هه‌ر ١٠ په‌رله‌مانتارێن مه پشكدار بن، لێ یێن به‌هدینان ل بن هه‌ره‌شان پشكدار نه‌بوون، لێ ئه‌و ٥ په‌رله‌مانتارێن ئێكگرتوو یێن پشكداری د كومبوونا په‌رله‌مانی دا كری نوونه‌راتیا ده‌نگێن راسته‌قینه یێن ئێكگرتوو دكه‌ن).
ئه‌ڤ داخویانیا وی مه‌كته‌ب سیاسیێ ئێكگرتوو ده‌ربرینێ ژ عه‌قلیه‌تا ئینكاركرنا یێ به‌رامبه‌ر دكه‌ت هه‌تا هه‌كه د ناڤ رێزێن حزبا وی ب خو دا ژی بیت ماده‌م وه‌كو وی هزر نه‌كه‌ت. ژ به‌ر كو هه‌كه ئه‌و داخویانی نیشانا كه‌له‌گای و خوسه‌پاندن و بێ حرمه‌تیێ به‌رامبه‌ر سه‌ركردایه‌تیا ئێكگرتوو یا به‌هدینان و 80 هزار ده‌نگێن وان نه‌بیت، مه‌عنا وێ ئه‌وه ده‌نگێن ئێكگرتوو ل به‌هدینان ئیناین د راسته‌قینه نینن.
