بههدینی دێ بههدینی بن یان ژی دێ سۆرانیێ سهپینن و ئامهدیێ قهركهن!
ئهڤه چهند رۆژه مژارا ئهزمانێ ستاندهر كهتیه بهر بهحسوخهبهرا، ههكه ئێكێ نهشههرهزابیت دێ وهسا هزركهت كو ئاریشا مه یا سهرپشك ئهزمانه، دبیت ژی ئهزمان بیت، بهلێ چاوا!، مژارا ئهزمانی مژارهكا ئالۆز و ژێك بژكیه. تاگرێن ئهزمانێ ستاندهر ژی یێ دگههشتینه وێ راستیێ كو ئێدی ئهو خیال و گۆتنێن وان یێ دبووینه تڤهنگێن داوهتیان. ب دیتنا من نه خهلكی و نهژی تێگههشتیا باوهری ب وێ كریارێ نینه، نهژی سهردگریت، ڤێجا بۆچیه ئهم خوه ب تشتهكیڤه ب وهستینین كو چ ئارمانج و پاشهرۆژ نهبن. ل ڤێرێ دێ ل سهر دو ناڤبڕا راوهستم كو یێن بووینه دهستۆدانێ بههدینیا، ئهز وهكی دهڤهرپهرێسهك نا ئاخڤم، بهلكی پێتر وهكی شههرهزایهك د بیاڤێ ئهزمانێن كهڤن دا دێ ئاخڤم.
ئهزمانێ بههدینی ئهزمانهكێ گهلهك كهڤنه، كهسینیا بههدینیا و ههتا دێ بێژم كوردا یا تێدا ههی، سهدان پهیڤێن كهڤن یێن سوومهری و ئۆرارتی و میتانی دناڤ دا ههنه، بهحسێ خهبهری: پهیڤا ههلامهت یا كوردی كو ل شوینا (تمپال) یا عهرهبی دهێته بكارئینان، پهیڤهكا سوومهریه و پێنچ هزار سالا بهری نۆكه هاتیه بكارئینان. پهیڤا گرگرا ئهڤرا ئهو ژی پهیڤهكا سوومهریه و بهری نۆكه هاتیه بكارئینان، ب سهدان پهیڤێن بڤی رهنگی سپههی و دلخاز و تژی فهلسهفه دناڤ ئهزمانێ بههدینی دا ههنه. ب دیتنا من د ناڤ چ دهڤۆكێن دی دا ناهێنه دیتن. بژلی ڤێ ژی ئهزمانێ بههدینی یێ تژی زاراڤ و ههڤۆكێن فهلسهفیه، نۆكه ئهم دشێین ڤهكۆلینێن ئهكادمی ل سهر ڤی ئهزمانێ زهنگین دارێژین و ڤههینین. دیسا ب سهدان پهیڤێن مری كو نۆكه ل گوندا دهێنه بكارئینان گهلهك دتازه و سپههینه، تژی رامان و فهلسهفهنه، ڤێجا چاوا دێ بهحسێ ئهزمانێ ستاندهر كهین و ڤان سالۆخا ههموویا پشتگۆهڤه هاڤێژین، كو یێ شتی ئهحمهدێ خانێ و فهقێ تهیرا و مهلایێ جزیری شعر و فهلسهفێن خوه ل سهر دارێتینه.
ژلایهكێ دیڤه، نزانم مه ئهزمانێ خوه كوشت و پشتگۆهڤه هاڤێت یان ژی پێلا سۆرانیێ خوه ب سهر دادا یان ژی ئهم شهرم دكهین پێ باخڤین و مه پهیڤ ژ ئامهدیێ قهركرن. بۆ من گهلهكا غهریبه بۆچی ئهڤه ب سهرێ مه دهێت، ئهرێ ئهو نڤیسینێن ژ سالا 1991ێ وهره هاتینه نڤیسان فهلسهفه و كهسنیا كوردا تێدا ههیه، من چ خش نینه كو چ ژ فهلسهفه و كهسینیا بههدینیا تێدا نینه، ههر ژ لایێ نڤیسهڤانێن وێڤه و پاشی خهلكێ دیترڤه بههدینی یا هاتیه ڤهچغاندن هندهك وهسا هزر دكهن كو شهرمه پهیڤێن بههدینی بكاربینن، هندهك ژی وهسا هزر دكهن كو هنده دبهرنیاسن ئێدی یێ ژ تخویبێ بههدینا دهركهڤتین و دڤێت بۆ پارچێن دی یێن كوردستانێ بنڤیسن!. بهلێ ئهو نزانن كو فهقێ تهیرا ب ئهزمانێ خوه یێ نڤیسی و ههموو كورد دخوینن و لهزهتێ ب شعرێن وی دبهن.
كورت و كرمانج: دڤێت ههر مرۆڤهك ب ئهزمانێ خوه باخڤیت و بنڤیسیت، ڤهبراندنا ئهزمانا تشتهكێ موستهحیله بهێته كرن، ئهڤرۆ یان سوبههی بیت ههموو تشت دێ كهڤنه سهر رێكێ، ئهڤه 100 ساله تورك و عهرهب یێ بزاڤێ دكهن بههدینیێ ژبیرا خهلكی ببهن، قهت نهشیاینه، بهلێ ئهزمانێ رهسهنێ جهێن دی یێن كوردستانێ یێن گوهۆڕین و بهرێ وان یێ دایه هاتوباتیێ.
