به‌هدین عه‌لی: هه‌تا دووماهی چركه‌ دێ شه‌ڕی بۆ ناسناڤی كه‌ین

به‌هدین عه‌لی: هه‌تا دووماهی چركه‌ دێ شه‌ڕی بۆ ناسناڤی كه‌ین

61

عەلی حاجی:

د داخویانیەکێ دا راهێنەرێ تیما تازە پێگەهشتیێن یانه‌یا زاخۆ ئەوا پشکدار د قارەمانیا کوردستانێ یا تەپا پێی دا بۆ رۆژنامه‌یا ئەڤرۆ دیار کر پشکداریا وان نە بتنێ ژبەر ئەنجامان بوو بەلکو وان ب شێوەیەکێ سەردەمیانە یاری دکر و ڕەنگەکێ دیتر یا هەڤرکیێ پەیدا کریە.
زێدەتر بەهدین عەلی گۆت: هه‌رچه‌نده‌ به‌ری دوحه‌فتییان ژ ده‌ستپێكرنا قاره‌مانیێ مە تیما خوە بەرهەڤکر، لێ ب رێیا ئەکادیمیا زاخۆ شیاین تیمەکا رێکوپێک و باش بەرهەڤبکەین، ژبەرکو ئەو دەمەکە ئەڤ یاریزانە راهێنانان دگەل ئێک ئەنجامدەن بتنێ چار یاریزانێن مە ژ دەرڤەیی ئەکادیمیێ بوون و دشێن بێژین یاریزانێن مە هەمی د ئەکادیمی نە، ژ سەرجەمێ سێ یاریان سێ سەرکەڤتن مه‌ ئینان بێ کو چو گول ل سەر تیمێ بن و وەکو قارەمانا گروپێ خوە دەربازبووینه‌ قوناغا هەشتێ، هەرچەندە تیمێن ب هێز ژی دناڤ گروپێ مە دا بون لێ شیانێن یاریزانێن مه‌ ترس ئێخستە دلێ گەلەک تیمان دا، پشکداریا مە د قارەمانیێ دا نەبتنێ ژبەر ئەنجامان بوو به‌لكو ژبەر پێشکێشکرنا یارییەکا جوان و سەردەمیانەو درۆستكرنا تیمێ بوویه‌.
ل دووماهیێ ناڤهاتی دیاركر سەروکێ یانێ سوز دایە هاریکاریا ماددی دگەل تیمێ بکەت و چاڤەرێنە و گۆت: قۆناغا هەشتێ دێ ب زەحمەت بیت ژبەرکو تیمێن ب هێز د رێکا مە دانە و ئه‌م دێ ژ تیمێن هەڤرک بین بۆ ناسناڤی و هەتا دووماهی چرکە ژی دێ ئارمانجا مە ناسناڤ بیت.

کۆمێنتا تە