به‌یانناما ئیرانێ ل دۆر هه‌لدانا ئالایێ كوردستانێ عوزرا ژ قه‌بحه‌تێ مه‌زنتر…
شڤان سالم گولى
پشتی مه‌راسیما ده‌ستبكاربوونا سه‌رۆك كۆمارێ نوی یێ ئیرانێ (ئیبراهیم ره‌ئیسی) ب ئاماده‌بوونا كۆمه‌كا سه‌رۆك وه‌لاتان كو ئێك ژ وان به‌رێز نێچیرڤان بارزانی سه‌رۆكێ هه‌رێما كوردستانێ، رویدانا هه‌ری مێژوویی بۆ كوردان ب گشتی و هه‌رێما كوردستانێ و ئیرانێ بخوه ژی هه‌لدانا ئالایێ پیرۆزێ كوردستانێ بوویه د ده‌ما پێشوازیكرنێ ل سه‌رۆكێ هه‌رێمێ دا، كو ئه‌ڤێ د میدیا و رایا گشتی یا هه‌ردو ولاتان دا ب گشتی ده‌نگڤه‌دا، ب تایبه‌ت ژی كو پشتی ژناڤبرا كۆمارا كوردستان ل مهابادێ هه‌تا نهو ب هیچ شێوه‌یه‌كێ ئه‌ڤ ئالایه ب فه‌رمی ل ئیرانێ نه‌هاتیه هه‌لدان و دان پێنه هاتیه دان، له‌وا ژی ئه‌ڤ پێشوازیكرنه و به‌رزكرنا ئالایی ل ته‌هرانا پایته‌ختێ ئیرانێ بۆ كوردان هه‌یه‌جانه‌كا زۆر ودوور نینه ژی نه‌ڕازیبوونه‌ك ژی د جاده‌یا سیاسی یا ئیرانێ دا په‌یدا كربیت، له‌وا ژی دوهی حوكمه‌تا ئیرانێ د راگه‌هاندنه‌ك فه‌رمی دا ئه‌ڤ چه‌نده ب شاشیه‌كا پرۆتوكۆلی ناساند بۆ هندێ كو خوه ژ فشارا جادىیا خوه یێ سیاسی قورتال بكت.
ژبه‌ر كو دوور نینه ئه‌ڤ پێنگاڤه ژلایێ حزبێن سیاسیێن ئیرانێ ڤه ب فشاره‌كا ب رژدى بۆ لاواز كرنا حوكمه‌تا ره‌ئیسی بهێت بكارئینان.
لێ یا جهێ پرسێ ناڤه‌رۆكا به‌یانناما ئیرانێ یه، (ل گۆڕ چه‌ندین كه‌نالێن راگه‌هاندنێ یێن نێزیك ژ وان و هێزێن سه‌ر ب وانڤه) كو ئه‌گه‌ر راستبت تنێ بۆ خوه قورتالكرن ژ فشارا جاده‌یا خوه یێ سیاسی په‌نا بریه به‌ر عوزرا ژ قه‌بحه‌تێ مه‌زنتر، كو ئه‌و ژی شاشیا پرۆتوكۆلی یه، گه‌لۆ چ لۆژیكه وه‌لاته‌ك وه‌ك ئیرانێ خودان مێژوو و سه‌روه‌ری و سه‌ربۆڕێن سیاسی كو مرۆڤ دشێت بێژیت پشتی دامه‌زراندنا ده‌وله‌تا سه‌فه‌ویان هه‌تا نها ناوازه‌یه تووشی شاشیه‌كا پرۆتوكۆلی هاتبیت، خێره د دانانا ئالایێ كوردستانێ بۆ پێشوازیكرنێ ل سه‌رۆكێ هه‌رێمێ دا تووشی ڤێ شاشیێ ببت؟ شه‌رمزاریا ژ وێ مه‌زنتر ئه‌وا هنده‌ك حزب و ده‌زگه‌هێن راگه‌هاندنێ یێن سه‌ر ب حزبێن سیاسی ڤه ل هه‌رێمێ هه‌ر زوى ئه‌ڤ رۆنكره كرنه سه‌ردێرێن كه‌نالێن خوه ب ئارمانجا كێمكرنا رۆلێ سه‌رۆكایه‌تیا هه‌رێمێ، لێ ئه‌وا گرنگ كو هه‌موو ئالی پێدڤیه بزانین ئه‌وا هاتیه‌كرن ژ ئه‌نجامێ سیاسه‌تا راست و دروست یا پاراستنا هه‌ڤسه‌نگی و سه‌ره‌ده‌ریێ یا حوكمه‌تا هه‌رێمێ یه كو شیایی ببیت ژیواره‌ك و خوه بسه‌پینیت، ژ ئالیه‌ك دیڤه ئاماژه‌یه بۆ سه‌ركه‌فتنا تیما پرۆتوكۆلی یا سه‌رۆكێ هه‌رێمێ و زیره‌كێ و شاره‌زایا وان، ب پێچه‌وانه هه‌ر تشته‌ك دویره ژ راستیێ.
