بودجەیا 2023 یا ئیراقێ ب مەزنترین بودجە د دیرۆكا ئیراقێ دا دهاتە هەژمارتن
ئەمیر ئەترووشی:
بودجەیا سالا 2023 یا كو ژ لایێ پەرلەمانی ڤە هاتیە پەسەندكرن كو ب 199 ترلیۆن دیناران دهاتە خەملاندن، دگەل ب دووماهی هاتنا سالێ كێمتر ژ نیڤا وێ دێ هێتە خەرجكرن و ب مەزنترین بودجە د دیرۆكا ئیراقێ دا دهاتە هەژمارتن.
موعین كازمی، ئەندامێ لژنا دارایی یا پەرلەمانێ ئیراقێ راگەهاند، ئەو دگەل وەزارەتا دارایی كۆمبووینە و بۆ وانا دیار بوویە، پشكە بودجەیێن بۆ پارێزگەهـ و وەزارەتان هاتینە دەستنیشانكرن دهێنە خەرجكرن، بەلێ نە د ئاستێ پێدڤی دایە و ئەو كوژمێ د 6 مەهێن دەستپێكا ئەڤ سالە دا هاتیە خەرجكرن 47 ترلیۆن دینارێن ئیراقی نە.
ئاماژە دایە ئەوێ چەندێ ژی، د شەش مەهێن دووماهیێ ژی یێن ئەڤ سالە دا ئەو كوژمێ دێ هێتە خەرجكرن ژ بودجەیێ دێ گەهیتە 70 ترلیۆنان و ب ڤێ چەندێ ژی دیاردبیت بۆ سالا بهێت كورتهێنان د بودجەیێ دا نابیت.
موعین كازمی ئەندامێ لژنا دارایی یا پەرلەمانێ ئیراقێ دیار ژی كریە، كۆما گشتی یا پارەیێن دێ هێنە خەرجكرن د ئەڤ سالە دا دێ بیتە 117 ترلیۆن ژ كوما 199 ترلیۆنان كو دبیتە رێژەیا 58٪ێ كو هاتیە بناڤكرن ب مەزنترین بودجە د دیرۆكا ئیراقێ دا.
