بوردێ كاروبارێن مرۆڤایه‌تی وركشوپه‌ك بۆ 65 رێكخراوێن لوكال ڤه‌كر
ئەڤرۆ نیۆز،تۆڤی:
ژ پێخه‌مه‌ت پێشخستنا كارێ رێكخراوێن لوكال یێن نافخوەیی و نه‌خاسمه دبیاڤێ ئاماده‌كرنا پروپوزه‌لێن پرۆژان دا،بوردێ كاروبارێن مرۆڤایه‌تی یێ پارێزگه‌ها دهوكێ ب هه‌ڤكاری ل گه‌ل رێكخراوا (UNDP) ئه‌ڤرۆ سپێدێ 31-7-2017 ل هولا كونفرانسا ب ئاماده‌بوونا ئیسماعیل محەمەد ئەحمەد هاریكارێ پارێزگه‌رێ دهوكێ بۆ كاروبارێن ئاواره وپه‌نابه‌ران وركشوپه‌كا تایبه‌ت بو هژماره‌كا رێكخراوێن نافخوەیی و ئه‌وێن خزمه‌تا ئاواره وپه‌نابه‌ران و جڤاكێ سڤیل دكه‌ن ڤه‌كر.
درێورسمێن ڤه‌كرنێ دا هاریكارێ پارێزگه‌رێ دهوكێ بۆ كاروبارێن ئاواره وپه‌نابه‌ران ده‌ست خۆشی ل رێكخراوێن نافخوەیی كر هه‌مبه‌ر ئه‌و خزمه‌تا پێشكێشدكه‌ن و ئاماژه دا ئارمانجا ڤه‌كرنا وركشوپێ و گۆت: ئه‌ڤ وركشوپه بۆ هندێ یه كارێ هه‌ر رێكخراوه‌كێ بهێته پێشخستن تایبه‌ت ده‌مێ ئه‌و رێكخراو پروپوزه‌لا بۆ پرۆژا به‌رهه‌ڤ و پێشكێشدكه‌ن.
هه‌روه‌سا گۆت،پشتی ڤێ وركشوپێ خۆلێن دی یێن پێشكه‌فتیتر دێ هێنه ڤه‌كرن ویا فه‌ره هه‌ر رێكخراوه‌ك ل دووڤ تایبه‌تمه‌ندیا خوە پرۆژا به‌رهه‌ڤ و پێشكێشكه‌ت بۆ بده‌ستڤه‌ئینانا بوودجا و بجه ئینانا پرۆژان و خزمه‌تكرنا ئاواره و په‌نابه‌ران و خه‌لكێ ده‌ڤه‌رێ.
هه‌ژی گۆتنێ یه کو 65رێكخراوێن نافخوەیی پشكداری وركشوپێ بووینه و بۆ ده‌مێ ئێك رۆژ دێ به‌رده‌وامبیت و وانه وبابه‌تێن ئاماده‌كرنا پروپوزه‌لان ژلایێ كه‌سانێن شاره‌زا و تایبه‌تمه‌ند دهێنه گوتن.
ل دووڤ ئامارێن بوردێ كاروبارێن مرۆڤایه‌تی (740) هزارئاواره و په‌نابه‌ر ل سنورێ پارێزگه‌ها دهوكێ هه‌نه و هنده‌ك دناڤا كه‌مپان دا و هنده‌ك ژی ل ده‌رڤه‌ی كه‌مپان دا ژیانا خوە ده‌رباز دكه‌ن.