بوویه عه‌یبه‌كا مه‌زن
ل باشوورێ كوردستانێ ئێدی په‌یدابوونا زارۆیا یا بوویه “عه‌یبه‌كا مه‌زن”. ل ساڵا 2006 ئه‌ز ژ ئه‌ڵمانیا ڤه‌گه‌ریام بابێ من پیكه‌مه‌ك هه‌بوو، ب تنێ تێرا پێنج نه‌فه‌ران دكر. ده‌ما دا ده‌ركه‌ڤین ئه‌م حه‌فت كه‌س بوون ژ مالا مه، جهێ مه هه‌میان تێدا نه‌دكر، ئه‌ز ژی دابێژمه بابێ خوه: باشه ما وه هزر نه‌دكر كو ئۆتۆمبێل تنێ بۆ پێنج نه‌فه‌رانه، هه‌وه بۆ زارۆكێن زێده چێكرن.. . ئه‌و ژی دا بێژیته من: هه‌كه ته ژیانا هاوسه‌ریێ پێكئینا تۆ گه‌له‌ك بچووكان چێنه‌كه و چاڤ ل مه نه‌كه.
من ل 1/6/2006 ژیانا هاوسه‌ریێ پێكئینا و نوكه هه‌یڤا نیسانا 2015یه خۆدێ پێنج زارۆ هه‌تا نوكه ب رزقێ مه‌كرینه، دووماهی زارۆ ل 31/3/2015 بوویه، هه‌ر كه‌سێ زانی كو مه ئه‌و زارۆكه بوویه و ژمارا زارۆیێن مه بووینه پێنج عه‌جێبگرتی دمینیت و دبێژیت بابا چ ده‌عوه‌یه. چ نه‌مایه ئه‌ز بخوه دا بچم و بێژم ب ڕاستی دیاره من شاشیه‌كا گه‌له‌ك مه‌زن كریه، ئێدی بوونا زارۆیان ل هه‌رێما كوردستانێ هه‌كه ژ دوویان زێده‌تربن بوویه پاشكه‌تن. ته‌نانه‌ت ب سه‌رسۆرمانیڤه دبێژن “دێ خودێ بهێلیت یان خۆدێ هاریكارێ ده‌یكا عه‌یالی بیت”. هنده‌ك ژن و زه‌لامێن ته‌مبه‌ل دبێژن دێ چاوا ڤێڕا گه‌هی؟، یان دنیا گرانیه دێ چاوا بخودان كه‌ن، یان هه‌ڤژینا ته‌یا هه‌ژار و په‌ریشان ته سه‌رێ وێ ئێخستیه به‌ر خودانكرنا زارۆیان.
براده‌ره‌كی دی دێ بێژیت دیاره هه‌ڤژیناته خه‌لكا گۆندایه و عه‌شیرن واته پاشكه‌فتینه و ئه‌م خه‌لكێن باژارانه و وه‌سا دزانن رۆشنبیری د وێ چه‌ندێ دایه ته ئێك زارۆ هه‌بیت یان گه‌له‌ك گه‌له‌ك بكه‌نه دو!! ب راستی ئه‌م نه پاشكه‌فتینه، به‌لكو مه باوه‌ریه‌كا ته‌مام هه‌یه كو خێزانه‌كا به‌رفره‌هـ دروست بكه‌ین. بۆ خه‌لكێ ژی دیار بكه‌ین ژن ته‌مبه‌ل نینه و شیان هه‌نه پتر ژ دو زارۆیان و ب په‌روه‌رده‌یه‌كا باش خودان بكه‌ت.
كاك سالح ل گه‌ل مه ل هه‌فته‌نامه‌یا رووداو كار دكه‌ت و ده‌ما زانی كو من ئه‌ڤ نڤێسین ئاماده‌دكر گۆتی تو د زانی دایكا من 13 زارۆ بخۆدانكرینه و د ئێك ده‌م دا سێ زارۆ خودانكرینه، ئێك د زكێ وێ دابوویه و ئێك ل لاندكێدا بوویه و ئێك ژی ل به‌ر سینگێ وێ بوویه و چ كێشه ژی نه‌بووینه. ئه‌وا ئه‌ز دزانم مالباتا سالحی ماڵباته‌كا گرانن و په‌روه‌رده‌یه‌كا زۆر باش ژی هه‌نه.
هه‌ر كه‌سێ كو نۆكه مرۆڤ ل دووڤ ژیانا وی بگه‌رێت دێ ده‌ركه‌ڤیت خه‌ڵكێ فلان گۆندیه. ئه‌ری بۆ خه‌لكێ گۆندان ب عه‌یب دزانین؟ باپیرێ من ناڤێ وی حه‌جی سه‌لمان بوو، ل گۆندێ مێرگه‌شیشێ ل ده‌ڤه‌را سندیان ل زاخۆ مه‌زن بۆیه، بابێ خوه نه‌دیتیه، به‌لكو ب تنێ بووه‌و چ برا ژی نه‌بووینه، به‌لێ هه‌تا كو وه‌غه‌را دووماهیێ كری ئێك ژ عاقلترین خه‌لكێ ده‌ڤه‌رێ بوویه و شه‌ش كووڕ هه‌بووینه، نها ژی خه‌ڵك دبێژنه باب و مامێن من هوون كوورێن حه‌جی سه‌لمانینه و ماشه‌ڵڵا ل وه‌بیت. بابیرێ من نموونه و سه‌دان باپیرێن دی ل گۆندان مه‌زن بووینه و به‌رهه‌مێن وان عاقلترین زارۆ ژێ دروست ده‌ركه‌فتینه و نها ل مه‌یدانا خه‌باتێ نه. بۆ خه‌لكێ گۆندان نها بووینه خه‌ڵكێن پاشكه‌فتی. !
كێم ژ خێزانێن كوردان هه‌نه كێمتر ژ حه‌فت زارۆیان نه‌بن و دایك و بابێن وان زارۆیێن خوه ب هه‌ژاری و ده‌ربه‌ده‌ری یێن مه‌زنكرین و هه‌موو ژی ل سه‌ر په‌روه‌رده‌كا باش هاتینه په‌ردوه‌رده‌كرن. ئێ بۆ نۆكه ئه‌م نه‌شێن! به‌لكۆ نها ره‌وشا ژیانێ زۆر پێشكه‌فتیتره ژ یاسه‌رده‌مێن باب و باپیرێن مه.
زارۆیێن من نها پێكڤه گه‌وره‌بووینه و بۆینه براده‌ر و زیكا فێری ئاخفتنێ دبن و ل شوونا ده‌مێن خوه ل جاده و كۆلانان ببنه سه‌ر بۆینه براده‌رێن ئێك و به‌رده‌وام دگه‌ل ئێك یاریان دكه‌ن. خۆشترین ده‌م ل ده‌ف من ئه‌وه ده‌ما دچمه ماڵ و زارۆیێن من به‌ریكانێ دكه‌ن و كی زووتر دێ هێته به‌راهیا من. ب راستی زارۆ خۆشترین خه‌لاتێ خۆدێ یه بۆ دایك و بابا.
ل وه‌ڵاته‌كێ وه‌كو ئه‌لمانیا كو هه‌ژمارا روونشتڤانێن وێ پتری 80 ملیۆن كه‌سانه، هه‌تا نۆكه ده‌ما زارۆیه‌ك ل وێرێ ژدایكدبیت ده‌یك و بابێن وی زارۆی ژ لایێ حوكمه‌تێ ڤه دهێنه خه‌لاتكرن.
دڤێت حوكمه‌تا هه‌رێما كوردستانێ وان دایكان خه‌لات بكه‌ن كو پتری سێ زارۆیان په‌یدا دكه‌ن و هه‌تا چه‌ند ساڵان ژی هه‌ر چو نه‌بیت وه‌كو هاریكاریه‌ك بۆ خۆدانكرنا وان زارۆیان خه‌رج بكه‌ن. چونكو كورد ل ڤێ ده‌ڤه‌رێ كێم نه‌ته‌وه‌ن و هه‌ر ده‌ما كو تو كه‌مینه بی به‌رده‌وام هه‌ڕه‌شا ده‌ورووبه‌ران ل سه‌ر ته زێده‌تره. بوویه به‌لێ بۆ دروستكرنا زارۆیان.
