بوچی کەس ژ نوچەیێن مرنێ ناترسیت
ئەڤرۆ نیوز ، نەوزاد ھلۆری:
روودانێن مرنێ و گیان ژ دەستدانێن ژ نیشکەکێڤە ، و کوشتن و مرنێن ب کومێن ژ ئەنجامێن شەر و وێرانکاری و تیرورێ ژ رەنگەکێ بەرچاڤ ل رۆژھەلاتا ناڤەراست زۆر بوینە ، ئەڤ یەک ژی بوویە سەدەم کو ورە کەھی بوونەک لدەف وەلاتیان پەیداببیت و کەس ژ مرنێ نەترسن و ب نورمال ببینن ئەگەر کەسەک بھێتە کوشتن و بمریت.
محەمەد جیھاد قوتابیەکێ زانکویا دھۆکێ یە لسەر تەوەری بۆ ئەڤرۆ نیوز گۆت : ( شەر و ئالوزیێن جیھانێ ب گشتی و رۆژھەلاتا ناڤەراست ب تایبەتی بوویە سەدەم کو مرن لدەف خەلکی ببیتە تشتەکێ نورمال و رۆژانە دەھان روودانێن مرنێ و کوشتنێ دھێنە بھیستن و وەلاتیان جورە گەھی بوونەک لدەف پەیدا بوویە ، ئەڤ یەک ژی بووی سەدەم کو ئێدی کەس نەترسیت و نورمالترین نوچە نوچەیێن مرنێ بن ب تایبەتی ژی یا کەس و کار و نیاسێن نێزیک)
شارەزایەکێ جڤاکی دیارکر ھزرا مرنێ جودایە ژ نوچەیێن مرنێ و بۆ ئەڤرۆ نیوز گۆت: ( پرانیا وان ئالوزیێن کو نھا ل جیھانێ ھەنە بو جوداھیێن ئاینی و نەتەوەیی و ئایدولوژی دزڤریت ، ئەڤە د دەمەکێ دایە کو ھەبوونا ئاین و نەتەوە و ئایدولوژیان نورمالە و تشتەک جوان و ئەرێنی یە ژ بەرکو ئەڤ یەک دبیتە سەدەم کوپ تر ھەڤدوو نیاسین درۆست ببیت ، ژلایێ ئابووری ژی ڤە پتر بارزگانی و کرین و فروتن درۆست ببیت ، بەلی َنھا ب رەنگەکێ گشتی ئەڤ یەک ئەگەرا سەرەکی یا ھەبوونا ھەموو جورە ئاریشەیانە ل جیھانێ ب تایبەتی ل رۆژھەلاتا ناڤەراست )
زێدەتر گۆت: (ھەر روودانەکا دھێتە روودان و مرنەک ل پەی درۆست دبیت پێدڤی یە بو کەسانێن دەوروبەر ببیتە وانە و ئێدی ئەو ژی وەکو وی نەکەت ئەگەر دێ ب سەری وی ژی ھێـن بو نموونە کەسەکێ بلەز ترومبێل ھاژوت و پێگری ب رێنمایێن ھاتن و چونێ نەکر و پااشن ترومبێلا وی وەرگەریا و گیانی َخوە ژ دەست دا پێدڤی یە دەروبەرێن وی ھزر بکەن ئەو ژی وە بکە تدێ ئەڤ یەک ب سەرێ وی ژی ھێت ، بەلێ نھا ھەزاران رودانێن ھاتن و چونێ درۆست دبن و وەلاتی ب نورمال دبینن ئەنجامێن ئەوان روودانان)
دکتور ئەیوب عەبدوللا ئەو شارەزایێ جڤاکی یە زێدەتر گۆت : (ئەو کەسانێن کو بەردەوام مرنێ ل پێش چاڤێت خوە ددانن ژیان ل دەڤ وان چ بھایێ خوە نابیت و ئەڤە ھەند ژلایێ ئاینی ڤە تشتەک شاشە و دڤێت مرۆڤ ھندەک جارا خوشیا بخوە ژ ڤێ ژیانێ وەربگریت و ژلایەکێ دنڤە دێ کارتێکرنێن جڤاکی و دەرونی ل سەر پەیوەندیێن مرۆڤی کەن ، ژبەرڤێ گرنگە مرۆڤ ھزرا مرنێ بکەت و بکەتن وانەیەک بو ژیانا خوە ، ژبەرڤێ گرنگە دەزگەھێن ئەمن و ئاسایش زێدەتر رولێ خوە ببینن بو پاراستنا سەر و مالێن وەلاتیان ، و ژلایەکێ دنڤە وەلاتیێن مە ب تایبەتی لسەر تورێن جڤاکی وەسا روودانێن مرنێ بەرچاڤ نەکەن کو تشتەک نورمالە بەلکو تشتەک مەزنە و دڤێت بو مەرەما سەربور وەرگرتنێ بھێنە بەلاڤکرن )
