بوچی یاریگەھا سانتیاگو بێرنابیو وەکی خوە نەمایە؟
ئەڤرۆ نیوز:
یاریگەھا سانتیاگو بێرنابیو ل وەرزێ ئەڤ سالە د چەندین یاریان دا پشتەڤانێن وێ وەک وەرزێن بوری ئامادەی دیتنا یاریان نابن پشتی چوونا ستێرا وێ یا پرتوگالی کرستیانو رونالدوی.
وەک د وێنەیێ دا دیار یاریا ریال مەدرید و رایوڤالیکانو ژ خولا ئسپانیا ئەوا ل شەڤا بوری ھاتیە کرن و یانا مەلەکی سەرکەفتن ب گۆلەکێ بێ بەرامبەر دەستڤە ئینای تێدا ھژمارا پشتەڤانێن ڤێ یانێ ئامادەبووین گەھشتە ٥٥ ھزار و ٦٣٦ کەسان.
د دوازدو یاریێن ئەڤ سالە یاریگەھا سانتیاگو بێرنابیو مێڤان کری تنێ د حەفت یاریان دا زێدەتر ژ ٦٠ ھزار کەسان ئامادەبوویە دیسان یاریا دێربیا مەدرید ژی ٧٨ ھزار کەس ئامادە بووینە و د یاریا کاسا شاھێ ئسپانیا دا بەرامبەر یانا مەلیلە ٥٥ ھزار و ٢٤٣ کەس حازربون و د یاریا بەرامبەر سیسکا موسکو ژی ئەوا یانا مەلەکی ب سێ گۆلان خوسارەت بووی د ڤێ یاریێ دا ٥١ ھزار و ٦٣٦ کەس حازربون ئەڤە د دەمەکی دایە یاریگەھا بێرنابیو جھێ ٨١ ھزار و ٤٤ کەسان تێدا ھەیە.
چەندین ئەگەر ل دۆر ڤێ چەندێ ھەنە ئەو ژی ئاستێ خراب یێ یانێ دیسان گوھۆرینا راھێنەری دگەل گرانکرنا بھایێ پلێتا چوونا ناف یاریگەھێ دا بۆ دیتنا یاریێ کو ب رێژەیا ١٠% زێدەبوویە زێدەبار فروتنا ستێرا یانێ کرستیانو رونالدوی ژی ئەگەرەکێ سەرەکی یێ ڤێ پاشڤەزڤرینێ یە، ئەڤ چەندە بەرامبەر وەرزێ بوری ژی کو ل دوازدە یاریێن دەسپێکا خولێ بۆ ھەر یاریەکێ زێدەتر ژ ٦٨ ھزار و ٢٩٧ کەسان بۆ ھەر یاریەکێ ئامادە دبوون.