بو ئێكه‌م جار كاره‌با نیشتیمانی گه‌هشته دو گوندێن دێره‌لۆك
ئامێدیێ، مه‌حمود نهێلی
پشتی چه‌ندین سالان د تاریێ دا بۆ ئێكه‌م جار كاره‌با نیشتیمانی گه‌هشته گوندێ مێرگێ و گوندێ بێخیرێ یێن سنورێ ناحیا دێره‌لۆك. پرۆژه ب تمامی ب داوی هاتیه و كاره‌ب گه‌هشتیه به‌ر ده‌رگه‌هێن مالێن وان و هه‌كه ئێك دو مال مابن ئه‌و ژی ئه‌م دێ ب ستویێ خوه‌ڤه گرین كاره‌بێ دێ گه‌هینیه هه‌موو مالان .
ئێك ژ ئاكنجیێن گوندێ مێرگێ بناڤێ عه‌بدولره‌حمان ئه‌حمه‌د بو رۆژناما ئه‌ڤرۆ دیار كر، پشتی گوندێ وان ژلایێ حكومه‌تا عیراقێ ڤه هاتیه سوتن و ئاواره‌ی توركیا و ئیرانێ بووی جاره‌كا دی پشتی سه‌رهه‌لدانێ ئه‌و ڤه گه‌ریانه سه‌ر گوندێن خوه و خویاكر، ئه‌ڤه بۆ ده‌مێ 30 سالایه ئه‌و ڤه‌گه‌ریانه سه‌ر گوندی و تا نوكه كاره‌با نیشیتمانی نه‌گه‌هشتبوو گوندێ وان و گۆت: چه‌ندین جاران مه بزاڤ كربوون كو كاره‌با نیشیتمانی بگه‌هیته گوندێ مه و ب رێكا ناحیێ و هه‌روه‌سا رێكا ده‌زگه‌هێن راگه‌هاندنێ بتایبه‌تی ژی رۆژناما ئه‌ڤرۆ چه‌ندین جاران ئه‌ڤ بابه‌ت ئازراندیه ولایه‌نێن په‌یوه‌ندیدار ئاگه‌هدار كرینه كو جهێ سوپاسیێ نوكه كاره‌ب گه‌هشته گوندێ مه ل مێرگێ.
ناڤهاتی ده‌ست خوه‌شی ل حكومه‌تا هه‌رێمێ كر بو ڤێ پێنگاڤا پیرۆز و گۆت: سوپاسیا رێڤه‌به‌رێ ناحیا دێره‌لۆك و قایمقامێ ئامێدیێ دكه‌ین كو گه‌له‌ك خوه ماندی كری بو وێ یه‌كێ رازیبوونێ بینن كو كاره‌بێ بگه‌هینه گوندی.
سه‌نعان حه‌سه‌ن هه‌لبژێرێ گوندێ بێخیرێ بو رۆژناما ئه‌ڤرۆ خویا كر، ب سوپاسی ڤه پشتی بزاڤێن زۆر ژلایێ حكومه‌تێ و كارگێری یا ده‌ڤه‌رێ ڤه نوكه كاره‌ب گه‌هشته گوندێ مه ل بێخیری و جهێ ده‌ست خوه‌شیێ یه بو هه‌ر لایه‌ن و كه‌سه‌كی خه‌م د ڤی بابه‌تی دا خاری ب تایبه‌تی ژی رۆژناما ئه‌ڤرۆ و گۆت: ئه‌ڤه دورێن 30 سالایه ئه‌م ل گوندی و تا نوكه مه كاره‌ب نه‌بوویه نه موه‌لیده و نه‌ژی كاره‌با نیشتیمانی و ئه‌م ب هیڤیا كاره‌با تیشكا رۆژێ ڤه بووین ئه‌و ژی ڤه دو ساله‌ك هنده‌ك مالان بو خوه دانای.
ناڤهاتی ئاشكرا ژی كر، نوكه كار یێ ل جاده‌یێ دا دهێته كرن كو جادا گوندی ژی بهێته چێكرن و گۆت: ب تنێ مه ئاریشا ئاڤێ یێ مای و ئه‌م ب تانكه‌ران ئاڤێ ل دێره‌لۆكێ د ئینینه گوندی تانكه‌ر ب 20 هزارا دیناران بتنێ تێرا چه‌ند رۆژان دكه‌ت و هیڤی خوه‌ستن ئه‌ڤ ئاریشا وان ژی بهێته چاره‌سه‌ركرن بو وێ یه‌كێ ئه‌و بشێن ب دروستی ل گوندی بژین و ڤه‌ژاندنه‌كا باش دناڤ گوندی دا دروست بكه‌ن بتایبه‌تی ژی د وارێ چاندنێ دا.
ئارام جه‌لال رێڤه‌به‌رێ به‌لاڤكرنا كاره‌با ئامێَدیێ بو رۆژناما ئه‌ڤرۆ دیاركر، ئه‌ڤه ئێك ژ وان پرۆژایه ده‌مێ جه‌نابێ مه‌سرۆر بارزانی سه‌رۆكێ حكومه‌تا هه‌رێما كوردستانێ سه‌ره‌دانا ده‌ڤه‌رێ كری رازیبوون ل سه‌ر كری و گۆت: گوندێ مێرگێ و گوندێ بێخیری دو گوندێن ئاڤانه و چه‌ندین ساله د بێ كاره‌بن و رازیبوون هاته كرن ل سه‌ر پرۆژێ گه‌هاندنا كاره‌بێ بو ڤان هه‌ر دو گوندان كو دوگوندێن نێزیك ئێكن و كوژمێ 136 ملیون دینار بو هاتینه ته‌رخانكرن.
ئاشكرا كر، نوكه كاره‌با نیشتمانی گه‌هشتیه هه‌موو گوندێن سنورێ رێڤه‌به‌ریا وان، ژبلی هند گوند نه‌بن كو بتنێ بو وه‌رزێ چاندنێ دهێنه بكار ئینان و ئه‌و ژی ئه‌م بزاڤێ دكه‌ین كاره‌بێ بگه‌هینیه هه‌موو گوندان و ل ڤێ داویێ ژی رازیبوون هاتیه كرن ل سه‌ر گه‌هاندنا كاره‌بێ بو دو گوندێن دن ژی ل سنورێ ناحیا كانی ماسێ.
