بچووکاتی دا شوو… شەڤەکێ زەلامێ خوە ھێلا و چوو
ئه‌ڤرۆ نيوز:
پارێزەرەکا دادگەھا دھۆکێ بۆ ئەڤرۆ راگەھاند، کو دایک و بابێن کوڕەکێ دڤیا ژنێ بۆ کورێ خوە یێ سنێلە بینن، کچەکا بچووک بۆ ئینا و ب دلێ کچێ نە بوو شوو پێ بکەت، لێ مالا وێ رازی کر ھەتا شوو پێ کری، سالەکێ نەمانە ل گەل ئێکدو شەڤەکێ کچێ کوڕ ھێلا و چوو، چاڤدێرەکێ جڤاکی دبێژیت: ژن ئینان و شووکرنا بەروەخت کارتێکرنێن خوە یێن نەرێنی ھەنە، چونکی کچ و کوڕ ل ڤی دەمی سنێلەنە و نەشێن بریارا ھەڤژینیێ بدەن.
پارێزەر ئاواز مەجید ل دادگەھا دھۆکێ بۆ ئەڤرۆ دیارکر کو دایک و بابێن کوڕەکی دڤیا ژنێ بۆ کورێ خوە بینن بلا یێ بچووک بیت و گۆت: “رابوون بۆ کورێ خوە یێ سنێلە کچەکا بچووک ئینا، ب دلێ کچێ نە بوو، لێ مالا وێ رازی کر بوو ھەتا شوو پێ کری ، پشتی ڤەگوھاستنێ سالەکێ نەمانە ل گەل ئێکدو.
پارێزەرێ گۆتژی “کورَکی زانی کو ھەڤژینا وی یا ل گەل کوڕەکێ دی د ئاخڤیت ب تەلەفونێ، بەلێ نە دشیا باخڤیت ژ بەر دایک و بابێن خوە ب بھانەیا وێ چەندێ کو دا نە کەڤنە تایێ شەرمێ، پشتی ھینگێ شەڤەکێ ژنکێ کوڕ ھێلا و چوو، کوڕی ژی کۆتە بابێ خوە و چوونە مالا بابێ کچێ.
پارێزەرێ ئاشکرا کر کو کچێ گۆت، ھوون من ب سوژن ب کوژن ئەز نازڤرم چونکی من نەڤیا مالا من ئەزا دایمێ، مالا کوڕی گەلەک ھەولدان ئەڤ کچە ب زڤریت، لێ کچ یا رژد بۆ کو نەزڤریت”.
ھەروەسا ئاوازێ گۆت: “ل دووماھیێ ھەردو بنەمالا ب رێیێن عەشیرەتێ ل سەر ھندێ پێکھاتن کو ب چ رەنگان نەشێن ل گەل ئێکدو بژین، لەوا ژێک ھاتنە بەردان و کچێ و کوڕی چ ژ مافێن خوە داخواز نەکرن، ھەر ئێک چوو مالا خوە.
ئاوازێ دا دیارکرن کو ئەڤە ھەموو ڤەدگەریت بۆ ھندێ کو ژیێ کوڕکی و کچێ یێ بچووک بوو و کچ ژی ب زوری دا بوو شوو، ھەردوو نە ل ئێک ئاست بوون ھزرێن کچێ گەلەک دوورتر بوون ژ یێن کوڕی و ھندەک خێزان خودان باوەرنامەنە، بەلێ ھزرێن وان د کەڤنارن و بۆ خوە ئاریشا پەیدا دکەن.
حاجی رەمەزان بێسکی، چاڤدێرێ جڤاکی دبێژیت: ژن ئینان و شووکرنا بەروەخت کارتێکرنێن خوە یێن نەرێنی ھە نە دبیت چە ند مفایەک ھەبن، لێ کارتێکرنێن خراب پترن دبیت باش بیت بۆ پارستنا رەوشتی و ھەر زوو بشێن رابن ب ئەرکێن خێزانی مینا ھەبوونا زارۆیان، بەلێ ھەکە بەرێ خوە ب دەینێ نەرێنیێن ڤێ چەندێ پترن یێن جڤاکی و ساخلەمی و دەروونی چونکی کچ و کوڕ ل ڤی دەمی سنێلەنە و نەشێن بریارا ھەڤژینیێ بدەن.
بێسکی گۆتژی ” ھەروەسا کچ نەیا بەرھەڤە ژ لایێ ساخلەمیێ ڤە بۆ زارۆ بوونێ یان زارۆیێن وان دێ نە سروشتی بن، ھەروەسا دێ گەلەک ئاریشە ھەبن دبیت بگەھتە بەردانێ یا باش ئە وە کچ و کوڕ بگەھنە ژییەکێ گونجای بۆ پێکئینانا خێزانێ و ئەو بریارێ بدەن بێ مایتێکرن دا خێزانەکا بەختەوەر پێک بینن”.
