بڕیارا جامڕەشكرنا ترۆمبێلان ل زاخۆ كەڤتە د وارێ بجهئینانێ دا
زاخۆ، دلۆڤان هالۆ:
مقەدم محەمەد سلێمان، بەرپڕسێ ڕاگەهاندنا ڕێڤەبەریا هاتنوچوونا ئیدارەیا سەربخوە یا زاخۆ، بۆ ڕۆژناما ئەڤرۆ دیار كر كو بڕیارا جامڕەشكرنا تڕۆمبێلان ل زاخۆ كەڤتە د وارێ بجهئینانێ دا و هەر كەسەكێ بڤێت جامێن تڕۆمبێلا خوە ڕەش بكەت دشێت داخوازیەكێ پێشكێشی بەشێ تۆماركرنێ ل ڕێڤەبەریا هاتنوچوونا زاخۆ بكەت، دێ تڕومبێلا وی هێتە لۆگۆكرن و كارتا جامڕەشكرنێ ژی دێ ب وی شۆفێری هێتەدان.
بەرپڕسێ ڕاگەهاندنا ڕێڤەبەریا هاتنوچوونا ئیدارەیا سەربخوە یا زاخۆ، ئاماژە ب وێ چەندێ ژی كر كو تێچوویێ جامڕەشكرنا تڕۆمبێلان ڕێژەیی یە، ئەگەر ڕێژا جامڕەشكرنێ 50% بیت و دو جام بهێنە ڕەشكرن تێچوویێ وێ 200 هزار دینارن و ئەگەر هەر چار جام بن تێچوویێ وێ 300 هزار دینارن، ئەگەڕ ڕێژە 80% بیت و دو جام بهێنە ڕەشكرن ب 400 هزار دینارانە و ئەگەر چار جام بن ب 600 هزار دینارانە، ئەڤ پڕۆسا جامڕەشكرنێ بۆ دەمێ سالەكێ كار پێ دهێتە كرن، ئانكو دڤێت هەر سال بهێتە نووكرن.
گۆتژی:»ئەگەر ژڤانێ سالەكێ بۆری و مامەلە نەهاتە نووكرن، بۆ دەمێ هەیڤەكێ دەلیڤەیە و ئەگەر نەهاتە نووكرن، ئەو شۆفێرە ب گۆژمێ 500 هزار دیناران دێ هێتە سزادان و تڕۆمبێل ژی دێ هێتە ڕاگرتن و لسقا وێ ژی دێ هێتە ژێڤەكرن».
زێدەتر گۆت ژی:» پشتی دەربازبوونا سالەكێ، هەر شۆفێرەكێ بڤێت دشێت بۆ جارا دویێ مامەلا نووكرنا جامڕەشكرنا تڕۆمبێلا خوە ب هەلوەشینیت».
