بڕیارا لێبوورینا 15% یا كریا ئاڤێ ب دووماهی هات
ئه‌ڤرۆ، ئه‌میر ئه‌ترووشی:
په‌یڤدارێ وه‌زاره‌تا شاره‌وانی و گه‌شت و گۆزاری راگه‌هاند، حۆكمه‌تا هه‌رێما كوردستانێ رازه‌مه‌ندی ل سه‌ر خه‌رجكرنا حه‌فت ملیار و 654 ملیۆن دیناران دایه، بۆ هندێ هژماره‌كا زۆر یا بیرێن ئاڤێ بهێنه لێدان و كۆلان ب مه‌به‌ستا به‌رهنگاربوونا هشكه‌سالیێ و دابینكرنا ئاڤا ڤه‌خوارنێ و كۆلانا 138 بیرێن ئیرتیوزای و گۆت: نها سالانه ب كۆژمێ دوو ملیار و 684 ملیۆن مه‌ترێن ئاڤێ یێن سێجا بۆ هاوولاتیان دهێنه دابینكرن.
بڕیاره ئه‌ڤرۆ رۆژا ئێكشه‌مبی 17/4/2022، بڕیارا لێبوورین و داشكاندنا 15% ل سه‌ر كریار ئاڤێ یا هاوولاتیان بهێته لادان و دووماهی رۆژ بیت و ناهێته درێژكرن و پێدڤی بوو ئه‌و هاوولاتیێن به‌ری نها حه‌زا دانا كریار ئاڤێ هه‌ی زووتر بده‌ن. وه‌زاره‌تا شاره‌وانی و گه‌شت و گۆزار ژی رادگه‌هینیت كو ئه‌ڤه ماوه‌یه‌كێ درێژه ئه‌ڤ بریاره د وارێ بجهئینانێ دا وه‌كو هاریكاری بۆ وان هاوولاتیێن پاره‌كێ زۆر یێ چه‌ند هه‌یڤ و سالان ل ده‌ڤ مای وه‌كو ده‌ین، قه‌رێ خوه پێ بده‌ن و بێگومان ژی هژماره‌كا زۆر یا خه‌لكی ژ ڤێ بڕیارێ مفادار بوون.
كوردو شابان، په‌یڤدارێ وه‌زاره‌تا شاره‌وانی و گه‌شت و گۆزاری یا حۆكمه‌تا هه‌رێما كوردستانێ بۆ ئه‌ڤرۆ راگه‌هاند، بۆ ئه‌ڤ ساله یا 2022، حۆكمه‌تا هه‌رێما كوردستانێ رازه‌مه‌ندی ل سه‌ر خه‌رجكرنا حه‌فت ملیار و 654 ملیۆن دیناران دایه، بۆ هندێ هژماره‌كا زۆر یا بیرێن ئاڤێ بهێنه لێدان و كۆلان ب مه‌به‌ستا به‌رهنگاربوونا هشكه سالیێ و دابینكرنا ئاڤا ڤه‌خوارنێ و كۆلانا 138 بیرێن ئیرتیوزای و پتریا وان دێ ل ده‌وروبه‌رێن پارێزگه‌ها هه‌ولێر بن، چونكو هه‌تا نوكه بۆ سه‌نته‌رێ هه‌ولێرێ چو پرۆژه‌یێن پیچگوهر بۆ دابینكرنا ئاڤا ڤه‌خوارنێ نینن.
ئاشكرا ژی كر كو هه‌موو رێكارێن ڤی پرۆژێ مه‌زن بۆ لێدانا بیرێن ئیرتیوازی ب دووماهی هاتینه و ل نێزیكترین ده‌م دێ پرۆژه بۆ ته‌نده‌رینكێ هێته ره‌وانه‌كرن و گۆت: نها سالانه ب كۆژمێ دوو ملیار و 684 ملیۆن مه‌ترێن ئاڤێ یێن سێجا بۆ هاوولاتیان دهێنه دابینكرن و ل سالا بۆری ژی كۆژمێ 128 ملیار و 699 ملیۆن دینار ل دابینكرنا ئاڤه‌كا پاقژ بۆ خه‌لكێ هه‌رێما كوردستانێ هاتینه خه‌رجكرن.
شابان ئاشكرا ژی كر، ل سنوورێ حۆكمه‌تا هه‌رێما كوردستانێ 14 رێڤه‌به‌ری و 118 فه‌رمانگه‌هێن ئاڤێ هه‌نه و سالانه دوو ملیار و 684 ملیۆن مه‌ترێن ئاڤێ یێن سێجا بۆ هاوولاتیان دهێنه دابینكرن، به‌لێ داهاتێ ئاڤێ ب تنێ 42 ملیار و 102 ملیۆن دیناره.
په‌یڤدارێ وه‌زاره‌تا شاره‌وانی و گه‌شت و گۆزاری یا حۆكمه‌تا هه‌رێما كوردستانێ خویاژی كر، نوكه ل هه‌رێما كوردستانێ 81 پرۆژه‌یێن ستراتیژی یێن ئاڤێ هه‌نه و پتری پێنچ هزار و 787 بیرێن ئیرتیوازی و نێزیكی ئێك ملیۆن و 14 هزار و 706 پشكدارێن ئاڤێ ل هه‌رێمێ هه‌نه و هه‌تا نوكه ژ ڤی سه‌رجه‌می 70 هزار هاوولاتیان پیڤه‌رێن ئاڤێ گرێداینه و هێشتا 310 هزار هاوولاتیان ژی پیڤه‌ر نه‌گرێدایه.
ئه‌و یه‌ك ژی نه ڤه‌شارت، ب تنێ د ماوێ دوو هه‌یڤێن ده‌ستپێكێ دا ژ ئه‌ڤ ساله، داهاتێ ئاڤێ ل هه‌رێما كوردستانێ نه‌هـ ملیار و 770 ملیۆن دینار بوون و و ل سالا بۆری ژی داهات گه‌هشتبوو 42 ملیار و 102 ملیون دیناران.
