بڕیارەک ل دۆر بلندکرنا پلێن پۆلیس و کارمەندێن ناڤخوە دھێتە دەرخستن
ئەڤرۆ نيوز:
پلەبلندکرنا پشکەکا ھێزێن پۆلیسێن وەزارەتا ناڤخوە یا حوکمەتا ھەرێما کوردستانێ ھاتیە راگرتن و ئەندامەکا لیژنا ئاسایش و ناڤخوە ژی ل پەرلەمانێ کوردستانێ دیار دکەت کو ھەر پۆلیسەکێ باوەرناما وی ژ یا ناڤەندی کێمتر بیت پلێن وی ناھێنە بلندکرن.
ئاواز حەمید ئەفەندی، ئەنداما لیژنا ئاسایش و ناڤخوە ژی ل پەرلەمانێ کوردستانێ ئاشکرا کر، ب بڕیارەکا وەزیرێ ناڤخوە یێ حوکمەتا ھەرێما کوردستانێ ھەر پۆلیسەکێ باوەرناما وی ژ یا ناڤەندی کێمتر بیت پلێن وی ناھێنە بلندکرن و بۆ باسنیوز گۆت: “ژ ئەگەرێ ڤێ بڕیارێ، ھژمارەکا زۆر یا پۆلیسان، سەرەڕای وێ چەندێ کو پشکداری خۆلان ژی بووینە، لێ ژ بەر کو باوەرناما سەرەتایی یا ھەی، لەو بلندکرنا پلێن وان یا ھاتیە راگرتن”.
خویا ژی کر، ئەو ل گەل جڤاتا وەزیران ل دۆر وی بابەتی ئاخڤتینە کو پلێن وان پۆلیسان بھێنە بلندکرن و گۆت: “گەلەک پۆلیسان پشکداری د خۆلێن مەشق و راھێنانان دا کرینە و پاشی خۆلا بڕیارا وەزیرێ ناڤخوە دەرکەفتیە، لەو مە داخواز کریە کو ئەو بڕیارە وان پۆلیسان ڤەنەگریت، لەو ھیڤیەکا مەزن یا ھەی پلێن وان بھێنە بلندکرن”.
ئاواز خانێ ئاشکرا ژی کر، وەزیرێ ناڤخوە گۆتیە وان، ئەو پۆلیسێن باوەرناما ناڤنجی یان ئامادەیی ھەبیت، ئاریشە د بلندکرنا پلێن وان دا نابیت و پلێن وان دێ ھێنە بلندکرن، لێ ژ بەر ئاریشا میلاکی جارێ ئەو نەشێن یێن وان پۆلیسێن باوەرناما سەرەتایی پلێن وان بلند بکەن.
ل دووڤ پێزانینان، ئەو پۆلیسێن باوەرنامێن سەرەتایی ھەین، پلێن وان ناھێنە بلندکرن، لێ ئەوێن باوەرناما سێیێ ناڤنجی و سەردا ھەبیت، پشتی پشکداری د خۆلێن مەشق و راھێنانان دا کربن، پلێن وان دێ ھێنە بلندکرن.
