بکوژێن ھرچا گارەی ھاتنە دەستەسەرکرن
ئەڤرۆ:
رێڤەبەرێ گشتی یێ پۆلیسێن دارستان و ژینگەھا ھەرێما کوردستانێ دیار کر کو دو کەس ب تۆمەتا کوشتنا ھرچا چیایێ گارەی ھاتینە دەستەسەرکرن و بۆ دادگەھێ ھاتینە ھنارتن.
لیوا مستەفا عەلی، رێڤەبەرێ گشتی یێ پۆلیسێن دارستان و ژینگەھا ھەرێما کوردستانێ خویا ژی کر، وان ھەردو کەسان ل چیایێ گارەی مێشێن ھنگڤینی ھەبوون و ئەو ھرچە ژی ھاتبوو ھنگڤینێ وان خوار بوو، لەو وان تەلی ل بەر ڤەدابوو و ھرچ ژی کەفتبوویێ و و کوشتبوو و بۆ رووداو گۆت: “دو کەس ب تۆمەتا کوشتنا وێ ھرچێ ھاتینە دەستەسەرکرن و بۆ دادگەھێ ژی ھاتینە ھنارتن”.
ژ لایەکێ دیڤە سلێمان تەمەر، نۆشدارێ ڤێتێرنەری و بەرپرسێ رێکخراوا کوردستان بۆ پاراستنا گانەوەران بۆ رووداو ئاشکرا کر، ھرچ ھەر سێ سالان جارەکێ دزێت، دیسا ژ ئەگەرێ رەوشا نەباش یا کوردستانێ د دەمێن بۆری دا، ئەڤ جۆرە ھرچە کێم بووینە و مەترسیا ژناڤچوونێ یا ل سەر ھەی.
وەکو دیار ل رۆژا 22-7-2017 ھرچەک ل گوندێ گیزێ یێ دەڤەرا بەرێگارێ ژ لایێ دو کەسان ڤە ھاتبوو کوشتن و وێنێن وێ ل تۆرێن جڤاکی ھاتبوونە بەلاڤکرن، ڤێ چەندێ ژی کارڤەدان د دووڤ خوە دا ئینان.
