بھایێ نشتەرگەریان ل نەخۆشخانێن حوکمەتێ دێ ھێتە کێمکرن
ئەڤرۆ نيوز:
وەزارەتا ساخلەمیا حوکمەتا ھەرێما کوردستانێ رادگەھینت کو وان پلانەک دانایە بۆ کێمکرنا بھایێ نشتەرگەریان ل نەخۆشخانێن حوکمەتێ یێن سپێدی و ئێڤاران، بۆ ھندێ زێدەتر خەلک ژێ مفادار ببیت.
موەفق عەبدوللا، شیرەتکارێ دارایی ل وەزارەتا ساخلەمیا حوکمەتا ھەرێما کوردستانێ بۆ ئەڤرۆ دیار کر، ئەنجامدانا نشتەرگەریان ل نەخۆشخانێن حوکمەتێ ل دانێ ئێڤاری ژ سالا 2016 وەرە یا بەردەوامە و ب پارەکێ گەلەک ئەرزانتر ژ نەخۆشخانێن تایبەت و ئەھلی و گۆت: “بەری قەیرانا دارایی د سەر حوکمەتێ دا بھێت، بۆ ھەر نشتەرگەریەکێ حوکمەتێ 80% بھایێ نشتەرگەریا ئێڤاران ل نەخۆشخانێن ئەھلی ددا، بەلێ ژ بەر قەیرانا دارایی نھا حوکمەت ب تنێ 20% ژ وی پارەی ددەت و 80% خەلک پارێ نشتەرگەریێ ددەت”.
ئاشکرا ژی کر، بھایێ نشتەرگەریان ژ 50 ھزار ھەتا 500 ھزار دیناران دەستپێدکەت و ئەڤ پارێ ژ وان نشتەرگەریان دھێتە وەرگرتن 80% بۆ ستافێ کاری نە و 10% بۆ کڕینا دەرمانان و 10% ژی دبیتە داھاتێ حوکمەتێ و گۆت: “نھا بزاڤا وێ یەکێ دھێتە کرن کو حوکمەت ب رێژەکا پتر بھایێ نشتەرگەریان ب ستوویێ خوەڤە بگریت و پتر خزمەتا خەلکی بھێتە کرن”.
شیرەتکارێ دارایی ل وەزارەتا ساخلەمیا حوکمەتا ھەرێما کوردستانێ خویا کر کو نھا لیژنەک بۆ پێداچوونێ د بھایێن نشتەرگەریێن حوکمەتێ یێن ئێڤاران دا ھاتیە پێکئینان و دێ ھەموو بزاڤ ھێنە کرن ئەو بھایە ئەرزانتر لێ بھێت.
