بۆرینا سالێ و توندیا زهمانى!..
د. سالار عوسمان
من نهڤیا ڤێ سالێ، ب ڕابۆرین تێبپهرم و ئاوریهكێ لێ نهدهم، مانێ پشكهكا ژیانێ پێكهاتیه ژ ئاوردانهڤێ، ئاوڕدانهڤه ژ تشتێن نههاتینه گۆتن، ژ وان نهێنیێن كهفتینه د ناڤ دیالۆگێ دا، ژ وێ ڕۆناهیێن ب گهردنا تاریێ ڤه دبرسقیێن. زهمهن ههر پێكهاتى نینه ژ سهحكرن و ئافاتا ههژمارتنێ، ب قهدهر وێ ئێكێ پێكهاتیه ژ ئاوریلێدانێ، ئاوریلێدان ب تێگههشتنا زهحمهتیا پرسیاران، ئهو پرسیارێن بهردهوام ل سعهتێن ئاورلێدانهڤێ، مه دادننه ههمبهر گومانێ، كو ههموو د ڕهونهقینه، مانێ ئینسان زیندهوهرهكێ گومانى یه، لهوا بهردهوام ب ڕهونهقى ڤه باوهشا ژیانێ دكهت، ژیانهك، كو زهمهن تێدا پرسیارێن زهحمهت، ئهو پرسیارێن ب زهحمهت پڕن ژ قهساوهتێ!.. ئهو تێگههشتن یا شاشه، یا كو دبێژیت زهمهن تێرا ههموو تشتان دكهت، نه وهنینه، دڤێت وێ تێگههشتنێ بههلوهشینین، ههر ب تنێ زهمهن ژى نه، دڤێت زۆر ژ تێگههان بههلوهشینین، پشتراستم پشتى ههلوهشاندنێ ژیان ڕهونهقهكا دیتر وهربگریت، ل ناڤا واند ژى دا زهمهن، كهواته، ئهم نها د وێ چركێ دا بهحسێ ههلوهشاندنا زهمهنى دكهین، بهحسكرنهكا ئاراستهی كێمكرنا قهساوهتیێن وێ!..
بهلێ، ئهو تێگههشتن یا شاشه، كو دبێژیت زهمهن تێرا ههموو، یان پتریا ژیانێ دكهت، ژیان زۆر ژ وێ چهندێ بهرفرههتره و كووتره ژ هندێ كو دهستكورتیا زهمهنى ڤێرا بگههیت، زهمهن یێ بهرتهنگه ل بهرامبهرى ژیانێ، لهورا زوو، د ڤى ماوێ كورت دا ههموو قهساوهتیێن خوه دسهپینیت و بێڕهحم، ڕۆحا مه ماندى دكهت!..
دماندینه، بهلێ ئهم ئینسان دماندینه و شهكهتین و ڕۆحا مه بێ ئارام ل بهرامبهر پرسیاران دا سهحا وێ قهساوهتێ دكهت، كو پێ دهێته گۆتن، قهساوهتا زهمانى، ژ ڤى لایى ڤه ژى بهرتهنگیا زهمهنى و ژیانێ ژى حهتا دێ فرههتر و جوانتر بیت!.. نهخێر، زهمهن تێرا ژیانێ ناكهت و ژیان ژى حهتا كو جوانتر ببیت، هیلاكین، ماندینه ڤێڕا ناگههین، حهتا نها نهشیایمه زارۆیێن خوه كۆم بكهمهڤه، نه شیایمه ببینمه ڤه، تێر ب دلێ خوه سهحا پێل و شهپۆلێن خوه نهكریه، نهشیایمه ب كیژ دلى ژ ئهسمانێ بهفرا و ئهورێ خوه ژى د ناڤ بارانێ ڕابمینم، ژ عهیش و عهیشا عهزیزان تێر نهبووم و جهمعا جانان تێر ب چاڤێن خوه نهبینی و تهنانهت نهشیایمه د گهل كورێن خوه ژى پیاسهكا درێژ بكهم، ههڤژینا من، حهتا نها ژى ب نیازا تهمامكرنا سوحبهتا خوهیه، ئهو سهوحبهتا بهرى سی سالان هێلای و مه سهر لێ نهدایهڤه، ههموو پرتووكێن من د سوچێكا كتێبخانا من دا، تووڕه تووڕه سهح دكهنه من و ڤێرا نهگههشتیمه بخوونم!.. ئهم یێن د زهمهنێ نڤیسینێ داینه نهك خووندنێ، لهورا حهتاكو نڤیسهر زۆر دبن و خوینهر كێم، د جڤاكهكى دا خوینهر ل قاتیا بیت، دڤێت ههر ل دۆرا كولێرێ دا رابوهستین، ژ وان ژى باشترین ناڤ بۆ جڤاكێ من، جڤاكێ كولێرا بیت، چونكو دارا و نهدار، زانا و نهزان ل گهرا كولێرى نه و ئێك ژى ژ وێ بهرى، تووڕهتر ژ قهساوهتا زهمهنى هاوار دكهت: (لهزێ بكهن، دهرگههێن مزگهفتان دابئێخین، لهزێ بكهن و ب ئیمانێ را بگههن!..)، ئهز بهردهوام ڤێ پرسیارێ ژ خوه دكهم و ناگههمه چو بهرسڤهكێ: بهخشینا ئیمانێ چ رامان و ئهم دۆره بۆ كولێرا حهتا كهنگی؟!.. دلێ من نههات ب چهند پهیڤهكێن سار و دوباره سالهكێ بهڕێ ڤهبكهم و ل ناڤ قهرهبالغێ دا بهرزه بووم، ئاخر ئهم بۆ بهرزهبوونێ نههاتبووین، قهرهبالغ چهند غهدار بیت، دڤێت گۆژیهكێ ههر پهیدا بكهین بۆ پرسیارێ، پرسیارا قهساوهتا زهمهنى، كو دئێت و تیژ تێدپهریت، كو دئێت و پرچا مه ماش و برنج دكهت و ڕۆناهیێ ژ دێمێ مه ڤهددهت و پهنجێن مه ب لهرزۆكى ژ ناڤ قهلهمى دا بجهدهێلیت!.. نهخیر، زهمهن تێرا ژیانێ ناكهت و من ب سهدان ژڤان ب جه هیلان، سهدان شعر تهمام نهكرینه، ب سهدان بانێژهی پهڕهنگ و ب سهدان قههوا من یا گهرم مایهڤه من نهڤهخواریه، من یا نها سهرێ خستیه ناڤ كۆشا گهرما ژیانێ و من دڤێت ژ ستێران، ژ بارانێ، ژ گولیێن گهنمى و ژ وێنێ ئیرۆتیكی ناڤ فیلم و ڕۆمانان دا سهحكهمێ و شهڤان ڕهونهقێ و ڕۆناهیێ ببینم، تازه ب نیازم ل گهل دۆستێن نێزك گهشت بكهم و بێژمه كاپتنى: دوور ههڕه، دوور دوور، حهتا دگههیته وێ مێرگا پر ژ دۆنكیشۆت، پڕ ژ حهمهدۆك، پڕ ژ سهمائێ یاخیبوونێ، پر ژ جوانیێ، پر ژ راستیێ، پر ژ ماچێن تهڕ، پر ژ خوه!.. خوه، كو قهساوهتا زهمهنى نهگههیت ههبم و .. نها، ل ناڤ وێ قهرهبالغا بێ ڕهنگ دا نهبییهك بۆ ههوه باغڤیت، نهبییهك، ڕێك وهك دارا ئهنفال، ڕێك وهك سهرێ هۆجام و مهمكێ خودامێن داعش!… ببۆرن، نهبییهك بۆ ههوه باغڤیت و كابرایێ تووڕهی بهرامبهر مزگهفتێ ژى ههر هاوار دكهت: (لهزێ بكه، دهرگههێن مزگهفتان دابێخین، لهزێ بكهن و ب ئیمانێ را بگههن!..)، ببۆرن، نهبییهك بۆ ههوه باغڤیت، نهبییهك، كو قهساوهتا زهمهنى نهگههیت ب كۆمكرنا ئیمانێ د ناڤ مزگهفتان بكهت، لهورا نها ل ناڤ ئیمانێ و كولێرێ دا، سهداسهرى دووماهیهاتنا بارانا هوور دا دگهڕێم!..
