بۆچوونا كەسێ ب كێم نەزانە
عزەت یوسف
هەر سەرەك هشەكە، ئاقلەكە، هەر مرۆڤەكی هزر و دیتنێن خۆ یێن تایبەت هەنە و یێ پێ باوەرە، بلا ل هەر ژییەكی و پۆستەكی و ئاقلەكی ژی بیت، چونكی مرۆڤ مرۆڤە خۆدان هەستە و هەلوەستە، گوه نەدان ل دیتنا وی یان پاشڤەبرنا وی هەستێ وی دئێشینیت، یان بێ مۆرال دكەت.
پتر دڤێت مرۆڤ د دیتنا خۆ دا یێ ئەرێنی بیت، ب ئاوایەكێ دی بۆ هەر كێشەیەكێ ل چارەسەرییان بگەڕیێت، نەك بۆ هەر چارەسەریەكێ كێشەیان پەیدا بكەت..چونكی هەموو دشێن ب دەهان ئاریشەیان یان هێجەتان ژ بن ئەردی بخولقینن، لێ بۆ هەر هێجەتەكێ و ئاریشەكێ ژی ب دەهان چارەسەری هەنە، ل ڤێرە دڤێت دیتن و بۆچوون پشكەك ژ چارەسەریێ بن.
بۆچوونا كەسێ ب كێم نەزانە، یا من دڤێت بێژم هزرا قوتابیەكی یە.
قوتابخانەكێ گەشتەكا مەیدانی بۆ قوتابیێن خۆ رێكخست، د ڕێ دا تونێلەك دكەتە بەرسینگی، شۆفێرێ پاسێ یێ لێ شارەزا بوو، چونكی گەلەك جاران پێشتر یێ تێدا دەرباز بووی، ل سەر هاتبوو نڤیسین بلنداهی سێ مەترە، شۆفێر نەراوەستیا چونكی بلنداهیا پاسێ ژ سێ مەتران كێمتر بوو.
لێ سۆپرایزا ڤێ جارێ یا مەزن بوو، چونكی پاس بەر بانێ تونێلێ كەت و د دەری دا ئاسێ ما.
شۆفێرێ پاسێ پرسیار كر: ئەز سالانە بێ هیچ كێشە دناڤ ئەڤێ تونێلێ دا دەرباز دبووم، ئەرێ خێرە چ روودایە؟
زەلامەك ژ خەلكێ لێ ڤەجەمیای بەرسڤا وی دا: ڕێ سەرژنوو یا هاتیە قێركرن و ئاستێ جادێ چەندەكێ یێ بلند بووی.
شۆفێری پاسێ وەریسەكێ موكم ب ترۆمبێلەكێ ڤە زەپ گرێدا دا بكێشیتە ژ دەرڤە، لێ ژبەر گرانیا پاسێ وەریس دپچیا.
هندەكان پێشنیاركرن ترۆمبێلەكا بهێزتر بۆ راكێشانێ بینن.
هندەكان ژی پێشنیاركرن تەخا قێری بكۆلن و بشكێنن.
دناڤا پێشنیارێن جودا دا كو دبێ مفا بوون، ئێك ژ قوتابیان ژ پاسێ پەیا بوو و گۆت: من چارەسەری هەیە!
گوهداریا وی كرن، گۆت: سالا پار مامۆستایێ مە ئەم فێری وانەیەكێ كرین و گۆتی: دڤێت ئەوێ دفن بلندیێ و خۆپەرستیێ و رق و چاڤبرساتیا دناڤا خۆ دا ڤالا بكەین، كو مە ل بەر چاڤێ خەلكی پف پفە وێنە دكەت، ئەوی دەمی قەبارێ مە دێ ڤەگەڕیتە ئەوی سنورێ سروشتیێ ئەم پێ دروست بووین، رەنگە هەكە ئەم ئەڤێ گۆتنێ ل سەر پاسێ بجهبینین و پیچەكا بای ژ تایرێن وێ ڤالا بكەین، وەسا ژ بانێ تونێلێ ناگریت و دێ ب سلامەتی دەركەڤین، وەسا هزرا وی كار كر و ب سلامەتی دەرباز بوون.
