بۆچى كوردستان د هه‌وارا كه‌ریمۆلا ته‌وه‌حودى ناچیت؟؟
كوردێن خۆراسانێ ژ به‌ره‌بابێن ڕه‌سه‌نێن كوردانن و كه‌ڤناتیا وان بۆ هزاران سالێن به‌رى نوكه دزڤڕیت و ژێده‌رێن دیرۆكى ب هنده‌ك نه‌وێره‌كى و خه‌مساری ڤه گه‌له‌ك ژ دوینده‌هێن كوردان یێن كو ده‌ستهه‌لات بده‌ستێ وان بوویه د سه‌رده‌مێن جودا جودایێن دیرۆكى دا بۆ وان دزڤڕینن. هه‌تا كو دهێته گۆتن ئمبراتۆریا ساسانى، یا كو نێزیكى چارسه‌د سالان ده‌ستهه‌لاتا وه‌لاتێن ئارییان و ده‌ڤه‌رێ دگێڕا ب ڕه‌چه‌له‌ك كوردێن خۆراسانێ نه و ژ ناڤدارێن دی ژى ئه‌بو موسلمێ خۆراسانی یه، كو ب ژناڤبرنا خه‌لافه‌تا ئه‌مه‌وییان ده‌رگه‌ه بۆ خه‌لافه‌تا ئالێ عه‌باس و عه‌باسییان ڤه‌كر، لێ عه‌باسییان پشتى وێ قه‌نجیا مه‌زن وه‌كى گه‌له‌ك كه‌س و جارێن دی نمه‌ك حه‌رامى كر و مه‌نسۆر خه‌لیفێ وى سه‌رده‌مى ئه‌و ب شێوه‌یه‌كێ دڕندانه و ژ پشتڤه و ب خه‌نجه‌ران پارچه پارچه كر. هه‌رچه‌نده كورد ل وێرێ كه‌ڤنن، لێ د سه‌رده‌مێن جودایێن دیرۆكى دا. پشتى هینگێ گه‌له‌ك كورد یێن ژلایه‌نێ ده‌ستهه‌لاتا پاشایه‌تى بۆ وان جهان هاتینه ڤه‌گۆهاستن و دبیت ئێك ژ وان گه‌ڕان كوردێن ده‌ڤه‌را به‌هدینان و بۆتان بن كو ل سه‌رده‌مێ سه‌فه‌وییان هاتینه راگوهاستن بۆ خۆراسان. دبیت مه‌به‌ستا سه‌ره‌كى ژ وێ چه‌ندێ خوه قورتالكرن ژ شۆڕه‌ش و ڕاپه‌ڕینێن وان بن، چونكى هۆزێن شه‌ڕكه‌ر و مێرخاس بووینه و زۆلم ژ كه‌سێ قه‌بیل نه‌كریه و ژ لایه‌كێ دی ڤه ئه‌و وه‌كى مه‌تالان بۆ به‌رسینگێ تۆرانیێن به‌رده‌وام هێڕشى وه‌لاتێ ئیرانێ دكر و ب باشترین پێگهۆڕ هاتینه زانین.
ل (3/11/2016) ل كه‌نالێ ئه‌سمانیێ ڕووداو و ل ده‌مژمێر (6)ى ئێڤارى د ناڤ نووچه‌یێن كوردستانا ڕۆژهه‌لات دا ئاماژه ب كه‌سه‌كى ب ناڤێ (كه‌ریم الله توكلى) هاته‌دان، كو وه‌ك كورده‌كێ ڕه‌سه‌ن و خه‌مخۆر ب سه‌دان چالاكى و به‌رهه‌مێن كورده‌وارى كه‌لتۆرێ زه‌نگین و جوانێ كوردیێ ل ده‌ڤه‌رێ یێ پاراستى.
ناڤبرى چه‌نده‌ها پرتووك ده‌رباره‌ى كوردان و دیرۆكا وان ل سه‌ر خه‌رجییا خوه چاپ و به‌لاڤ كرینه. ئه‌وى ب ده‌هان سالان ژیانا خوه بۆ ڤێ چه‌ندێ و مه‌به‌ستێ ته‌رخان كریه. د ته‌له‌ڤزیۆنێ دا من ب چاڤێن خوه هه‌مى (باغێ كوردان) به‌رهه‌مێ نالبه‌ندێ هۆزانڤانێ ده‌ڤه‌را مه د تاقچكا وى دا دیتن. وى ئاماژه ب هندێ دایه كو ب چه‌ندین سالان د ناڤ گوند و كوونێن ده‌ڤه‌رێ دا و ل ناڤ خه‌لكى و پیره‌ژن و پیره‌مێرێن كو نه زمانێ توركمانى و نه یێ فارسى نزانن و تنێ ب كوردیا كرمانجى دئاخڤن گه‌ڕیایه، دا بشێت فه‌رهه‌نگه‌كا زمانێ كوردێن خۆراسان بنڤێسیت.
هه‌روه‌سا دگۆت ئه‌ڤ مرۆڤه باشترین ژێده‌رن بۆ ده‌ینانا ڤێ فه‌رهه‌نگا چه‌ند به‌رگى ب شێوه‌كێ زه‌لال و دروست. دیاره ئه‌ڤه هه‌مان ئه‌و هزره ئه‌وا خودێ ژێ رازى مه‌لا مه‌حموودێ دێرشه‌وى د پرتووكا خوه دا ” مشتاخا چیا ژ گۆتنێن پێشیا” و ژ میرێ بۆتان “جه‌لاده‌تێ به‌درخان به‌گى” ڤه‌دگێڕیت. دیاره ل وێ پارچا كوردستانێ ژى كه‌سه‌ك یێ هه‌ى دڤێت هیڤیا ڤان نه‌مران و گه‌له‌ك دوستێن كوردان و كرمانجان و باب و باپیرێن مه بجه بینیت، لێ وه‌كى وى ب خوه دگۆت ژبه‌ر نه‌بوونا شیانێن پاره‌ى ئه‌ڤ كاره یێ مایه نیڤه‌رۆ، هه‌ر چه‌نده وى ئه‌وێن پێشكشى كوردستانیان و پێشمه‌رگه‌ى كرین. چه‌وا كه‌سه‌ك یان حكوومه‌تا كوردستانێ ڤێ خه‌ونا مه‌زن بجه نائینیت و خوه ل وى ناكه‌ته خودان و ب ئینانا قه‌چاغى یا به‌رهه‌مێن وى وان ژ ناڤچۆنێ ناپارێزیت، نه‌خاسمه حكوومه‌تا ئیرانێ ڤێ گاڤێ وه‌كى مارگه‌ستیه‌كى و ژ كه‌ربێن سه‌ركه‌فتنێن كوردان دبیت نه‌شێت ده‌ستێ خوه بگه‌هینیته كوردستانێ، به‌لێ دشێت تۆلا خوه ل كه‌ریمۆلاى و به‌رهه‌مێن وى ڤه‌كه‌ت. بۆچى ل كوردستانێ هنده‌ك خوه ب خه‌مخۆرێن كوردستانێ و زمانێ كرمانجى و هۆزان و ئه‌ده‌بیاتا كوردى دزانن و دوهى نان نه‌بوو بخۆت، نوكه دێ شێت بۆ كۆڕێ خوه یێ ساڤا ترۆمبێله‌كا فوول مۆدێل بكڕیت، به‌لێ نه‌شێت چه‌ند پرتووكا بۆ خزمه‌تا وى زمانى چاپ و به‌لاڤ بكه‌ت؟ پا ئه‌ڤه چ كوردپه‌روه‌ریه؟ پارێ ڤى وه‌لاتى بۆ خزمه‌تا ڤى نه‌ته‌وه‌یه نه‌كو بۆ زارۆكه‌كى ب تنێ. پا كه‌نگى ئه‌ڤ توخمه مرۆڤه دێ ڤێ دیاریا بۆ كوردستانیان و پێشمه‌رگه‌ى هاتیه پێشكشكرن گه‌هینیته وان؟ هه‌كه به‌ڕێز ته‌وه‌حودى مر و دوژمنان ده‌ستنڤیسێن وى دزین و ڤه‌شارتن و سۆتن؟؟!! تو خودێ نه‌مخابنى پارێ وان وه‌كى یێ سه‌دامێ گۆڕ بگۆڕ و ژ كیستێ خه‌لكى كۆم ببیت و پاشى وه‌كى یێ وى ل بن ئاخێ و ل جهێن ڤه‌شارتى و ل به‌نكێن ئورۆپى بمینن و به‌رزه ببن و یان سوبه‌هى بچووكێن وان نه‌دلسۆز و نه‌كوردپه‌روه‌رێن دره‌وین ب ڤى پاره‌ى بسه‌ر دا بچن و ببنه فه‌لیته و یاریا ب كوردستانیان و كۆڕێن شه‌هیدان بكه‌ن، ئه‌وا هوین ئه‌ڤرۆ ب بابێن وان دكه‌ن، و سامانێ كه‌لتۆرى و فه‌رهه‌نگا مه هۆسا ل به‌ر پێیان بچیت و زانایێن مه ژ به‌ر پاره‌ى نه‌شێن چاپ و به‌لاڤ بكه‌ن و خزمه‌تا كوردستانێ بكه‌ن؟ بخودێ شه‌رمه و هه‌تك به‌ریه و زۆرداریه و ژ زۆرداریا به‌عسێ كێمتر نینه!
* بسپۆرێ زانستێن پێداگۆگى و په‌روه‌رده‌یى/فاكۆلتییا په‌روه‌رده/ زانینگه‌ها زاخۆ