بۆچى پارێزگه‌ها دهۆكێ باجا هه‌ر تشته‌كى بده‌ت؟!
پشتى سه‌رهلدانا بهارا سالا 1991 و تا نوكه پارێزگه‌ها دهۆكێ د چه‌ندین قووناغێن جودا جودا دا برینه و ل هه‌ر قووناغه‌كێ باجه‌كا زۆر یا دایى ب هه‌مى ره‌نگان! و ل به‌رامبه‌ر وان كاودان و مه‌ترسیان و كێشا خۆراگر بوویه، به‌لێ مخابن وان قوربانیدانان چ پوویته و بهایه‌ك نه‌بوویه ل ده‌ف سه‌ركرداتیا كوردى! به‌لكو قه‌ده‌را ڤێ پارێزگه‌هێ راده‌ستى هنده‌ك جۆره كه‌سان كر كو خه‌لكێ ڤێ پارێزگه‌هێ په‌شیمانى هه‌ر تشته‌كى ببیت كو كڕى!! و خوه ببینیت كێم ل دووڤ هه‌مى پێڤه‌ران و دوبه‌ره‌كى و سێ به‌ره‌كى كه‌ته د ناڤ دا و بوو جڤاكه‌كێ ته‌خ ته‌خى و به‌رده‌وام به‌ر ب لاوازبوونێ ڤه دچیت بۆ هه‌مى پرسان! و ئه‌ڤه مه‌ترسیه‌كا مه‌زنه ل سه‌ر دۆزا كوردى تایبه‌ت د ڤێ قووناغێدا.
قووناغا ئێكێ ژ هه‌لبژاتنێن سالا 1992 و دامه‌زراندنا كابینا ئێكێ یا حوكمه‌تا هه‌رێمێ حه‌تا سالا 1995 و ده‌رچوونا بریارا 986 ژ جڤاتا ئێمناهیێ یا گاز ل به‌رامبه‌ر خوارنێ سه‌باره‌ت عیراقێ! د ڤێ قووناغێ دا شه‌ڕێ براكوژیێ د ناڤبه‌را پارتى و ئێكه‌تیێ و د ناڤبه‌را پارتى و په‌كه‌كێ و باجا هه‌را مه‌زن خه‌لكێ سنۆرێ پارێزگه‌ها دهۆكێ دا ژ هه‌مى لایانڤه! ئه‌ڤه سه‌ره‌رایى دۆرپێچێن ئابوورى یێن جیهانێ ل سه‌ر عیراقێ و یێن عیراقێ ل سه‌ر هه‌رێما كوردستانێ.
قووناغا دووێ ژ سالا 1996 هه‌تا سالا 2003 و رۆخیانا رژێما به‌عس د ڤێ قووناغێ دا گه‌نده‌لیێ سه‌رهلدا و گه‌نده‌لى ژ ناڤ دام ده‌زگه‌هێن میرى چو ناڤ باره‌گایێن حزبى و هه‌تا رێكخراویێن بیانى ژى ڤه‌گرتین و بوو گه‌ف و مه‌ترسیه‌كا مه‌زن ل سه‌ر ژیانه‌كا خه‌لكى و هه‌مى سنۆر به‌زاندن! ئه‌و بوو سه‌رۆكێ هه‌رێمێ ل سالا 1998 سه‌ردانا دهۆكێ كر و ب تایبه‌ت ل سه‌ر كێشا گه‌نده‌لیێ راوستیا و هیڤیه‌كا مه‌زن بۆ خه‌لكى دروستكر كو ئه‌ڤ دیارده نه‌مینیت و ب دروستى خزمه‌تا خه‌لكى بهێنه‌كرن! به‌لێ مخابن نه كێشه چاره‌سه‌ر بوون و نه دیارده بنبڕ بوو، به‌لكو به‌ره‌ب خرابتر چوو ! دیسا هه‌ر باجا ڤێ چه‌ندێ خه‌لكێ دهۆكێ دا!!
قووناغا سیێ ژ سالا 2003 و گه‌فێن توركیا بو به‌زاندنا سنۆران و داگیركرنا كورستانێ هه‌تا هه‌لبژارتنێن سالا 2005 و په‌سه‌ندكرنا دستوورێ عیراقێ یێ نوى د ڤێ قووناغێدا سه‌ره‌رایى مه‌ترسیا به‌لێ هیڤى و ئۆمێدێن مه‌زن بۆ خه‌لكى دروست بوون كو ئێدى ترس و شه‌ڕ نامینن و ژیان دێ به‌ر ب خۆشیێ و ئارامیێ ڤه چیت و ئه‌ڤ چه‌نده بوو ئه‌گه‌ر كو پارێزگه‌ها دهۆكێ بلندترین رێژا پشكداریێ د هه‌لبژارتنێن ئه‌نجوومه‌نێ نوونه‌رێن عیراقێ و ئه‌نجوومه‌نێ پارێزگه‌هان دا تۆمار بكه‌ت، هه‌روه‌سا بلندترین رێژه د ریفراندوما وێ سالێ دا تۆمار بكه‌ت و ل وى ده‌مى بێژیت به‌لێ بۆ سه‌ربه‌خوه‌یا كورستانێ، به‌لێ دیسا چاڤ ڤێ هه‌ستا نه‌ته‌واتى و قوربانیدانێ ب دروستى خزمه‌تا ڤێ پارێزگه‌هێ نه هاته‌كرن!!
قووناغا چارێ ژ سالا 2005 هه‌تا سالا 2011 د ڤێ قووناغێ دا دیسا گه‌نده‌لى ب شێوه‌كێ نه‌چاڤه‌رێكرى به‌لاڤبوو و د ململانیه‌كا حزبیا توند دا كه‌ته دهۆكێ دا تایبه‌ت پشتى دروستبوونا ئوپوزسیۆنێ ل هه‌رێمێ ل سالا 2009 و دیسا خه‌لكێ دهۆكێ د هه‌ر دو هه‌لبژاتنێن سالا 2009 یێن په‌رله‌مانێ كوردستانێ و سه‌رۆكاتیا هه‌رێمێ و هه‌لبژارتنێن ئه‌نجوومه‌نێ نوینه‌رێن عیراقێ ل سالا 2010 بلندترین رێژا پشكداربوونێ تۆماركر و بوو ئه‌گه‌ر به‌لانسا سیاسى ل هه‌رێمێ و عیراقێ بێنه راگرت، به‌لێ هه‌ر ب دروستى خزمه‌تا خه‌لكى نه هاته‌كرن و گه‌نده‌لیێ ده‌ست حه‌فكا خه‌لكى گرت و داموده‌زگه‌هێن حوكمه‌تێ ئیفلیج كرن!.
قووناغا چارێ ژ سالا 2011 تا سالا 2014 و په‌یدابوونا داعش د ڤێ قووناغێ دا كێشا د ناڤبه‌را هه‌رێمێ و به‌غدا سه‌رهلدا و رۆژ بۆ رۆژێ توندتر لێهاتن و كێشێن سیاسى یێن ناڤخوه‌یا هه‌رێمێ چاره نه‌بوون و چوونه د قووناغه‌كا مه‌ترسیدار دا و خۆنیشادان ل سلیمانیێ هاتنه كرن و هێرشى باره‌گایێن حزبى كرن و گه‌فێن روخاندنا حوكمه‌تا هه‌رێمێ هاتنه كرن و داخوازا ده‌ست ژ كاركێشانێ ژ سه‌رۆكێ هه‌رێمى دهاته كرن و كاوده‌نه‌كێ زۆرێ ئالۆز په‌یدا بوو و قه‌یرانه‌كا سیاسى یامه‌زن ل دووڤ خوه دا ئینا و گڤاشتنێن مه‌زن كه‌فتنه ل سه‌ر حوكمه‌تا هه‌رێمێ و سه‌ركرداتیا سیاسى ئه‌ڤه زێده‌بارى وان كاودانێن رۆژهه‌لاتا ناڤین گرتین و خوه‌نیشادانێن جه‌ماوه‌رى ل چه‌ندین وه‌لاتێن عه‌ربى هاتینه كرن و بوویه ئه‌گه‌ر رۆخیانا ده‌ستهه‌لاتداران ل وى وه‌لاتى و هاتنا رێژه‌كا مه‌زنا ژ ئاوارێن سوورى بۆ هه‌رێمێ و ل سنۆرێن پارێزگه‌ها دهۆكێ هاتنه ئاكنجیكرن، دیسا راگرتن و به‌رسینگگرتنا ڤێ قه‌یرانا سیاسى و یا هاتنا ئاواران هه‌ر پارێزگه‌ها دهۆكێ بوویه، سه‌ره‌رایى هه‌مى وان كاودانێن به‌رته‌نگ یێن كو خه‌لكێ ڤێ پارێزگه‌هێ تێدا ده‌رباز دبوو!
قووناغا پێنجێ ژ هه‌لبژارتنن سالا 2014 و په‌یدابوونا داعش و هه‌تا نوكه ئه‌ڤ قووناغه ب دژوارترین و نه‌خۆشترین قووناغ د ژیانا خه‌لكێ هه‌رێما كوردستانێ دا ب گشتى و یا پارێزگه‌ها دهۆكێ دا ب تایبه‌تى دئێنه هژمارتن! د ڤێ قووناغێ دا برینا بۆدجا هه‌رێمێ و مووچێن فه‌رمانبه‌ران ژ لایێ به‌غداڤه و قه‌یرانا دارایى و ئابوورى و شه‌ڕێ داعش و داگیركرنا چه‌ند ناوچه‌كێن هه‌رێما كوردستانێ كو زۆربه‌یا شه‌رێ ل گه‌ل داعش ل سنۆرێن پارێزگه‌ها دهۆكێ یه و رێژا هه‌را مه‌زنا شه‌هید و برینداران یا دهۆكێ یه!! و هاتنا رێژه‌كا ئێكجار مه‌زن یا ئاواران بۆ پارێزگه‌ها دهۆكێ ئه‌ڤه زێده‌بارى ناكۆكیێن سیاسى د ناڤبه‌را لایه‌نێن سیاسى كو بوو ئه‌گه‌ر په‌رله‌مان ژ كاركه‌فت و ب ئاشكرایى به‌حس ل دو ئیداره‌یێ و جوداكرنا سلێمانیێ هاته‌كرن! و د ڤێ قووناغێ دا بریارا هنارده‌كرنا پترۆلا هه‌رێمێ ب شێوه‌كێ سه‌ربه‌خوه هاته دان و پتریا پترۆلا د هاتنه هنارتن یا سنۆرێن پارێزگه‌ها دهۆكێ بوو ! به‌لێ خه‌لكى ئه‌ڤ كاودانه هه‌تا راده‌كێ مه‌زن ب بهێنفره‌هی و هه‌ستا خوه یا نه‌ته‌واتى ده‌ربازكرن، لێ مخابن هه‌ر ئه‌ڤ قوربانیدانه نه هاتیه ل به‌رچاڤوه‌رگرتن و چ خزمه‌ت ل ئاستێ پێدڤى بۆ ڤێ پارێزگه‌هێ نائێنه‌كرن !! و هه‌ر ئه‌و مێشكێ ل قووناغێن بۆرى ئیدارا دهۆكێ دكر هه‌ر ئه‌و جۆره مێشكه نوكه بالا ده‌ست و كونترۆلا هه‌ر تشته‌كى كرى د ڤێ پارێزگه‌هێ دا!
ئه‌ڤه هه‌كه بزانین كو سه‌ره‌رایى ڤان شه‌ر و نه‌هامه‌تى و قه‌یرانان و هه‌مى كاودانان دهۆك ئارامترین پارێزگه‌ها سه‌رانسه‌رى عیراقێ یه و ئه‌ڤ چه‌نده بۆ هشیار و خۆراگریا خه‌لكى دزڤریت و پاشى ده‌زگه‌هێن ئه‌منى ئه‌ڤه ژ لایه‌كیڤه ژ لایه‌كێ دیڤه پشتى پیلانێن دوژمنان بۆ ئالۆزكرنا بارودۆخێ هه‌رێمێ و تایبه‌ت پارتى شكه‌ستن ئینایى ل هه‌ڤلێرێ و سلێمانیێ نوكه پیلانان دارێژن كو ئالۆزیا ل دهۆكێ بكه‌ن چونكى دیاربوو كو دهۆك ستوونا دۆزا كوردیه.
به‌غدا ب رێیا ئاواران و حه‌شدا شیعى ب هه‌مى شیانێن خوه یا هه‌ولده‌ت كو كێشه و گرفتان ل سنۆرێ دهۆكێ دروست بكه‌ت، ژ لایه‌كیڤه په‌كه‌كه یا دئێنه پالدان بۆ هه‌لكرنا شه‌ره‌كێ دیتر ل گه‌ل پارتى، چونكى ده‌ستهه‌لاتا په‌كه‌كێ هه‌مى یا ل ده‌وروبه‌رێن ڤێ پارێزگه‌هێ! و باش دزانن كو خه‌لك ژ ئه‌گه‌رێ قه‌یرانان و ناكۆكیێن سیاسى و پشتى سێ سالێن به‌رده‌وام یێن شه‌ڕێ ل به‌رامبه‌ر داعش زۆر بێزار و لاواز بوویه و ڤالاتیه‌كا مه‌زن كه‌تیه د ناڤبه‌را خه‌لكى و ده‌ستهه‌لاتێ دا!! له‌ورا هنده‌ك لایه‌نێن سیاسى و ب هاریكاریا دوژمنێن دۆزا كوردى هه‌ول دده‌ن كو مفایى ژ ڤان كاودانان ببینن و ئالۆزیان دروست دكه‌ن و پارتى ل ڤێ پارێزگه‌هێ لاوازكه‌ن و خۆیابوو كو هاوسه‌نگیا سیاسى یا هه‌رێمى و عیراقێ ل دهۆكێ دئێنه راگرتن و یێ هه‌مى هه‌ولا ده‌ن كو ئه‌ڤ پاریزگه‌هه ژ بن كونترۆلا پارتى ده‌ركه‌ڤیت و ب ده‌ركه‌فتنا دهۆكێ ژبن ڤێ كونترۆلێ ئێدى دۆزا كوردى چ بنیات و سه‌نگ نامینیت و بدروستى كوردستان د دابه‌ش بیت!
له‌ورا فه‌ره سه‌ركردایه‌تیا پارتى هه‌مى سه‌نگا سیاسى د ڤێ پارێزگه‌هێ دا بكاربینیت بۆ راگرتن و خزمه‌تكرنا خه‌لكى هه‌كه نه، بارودۆخ و كاودانێن كوردستانێ ب گشتى و دهۆكێ ب تایبه‌تى به‌ر ب نه‌مان و هه‌لوه‌شیانێ ڤه دبه‌ن.
