بۆچی دەمێ زەلام تۆرە دبیت پویتە ب ھەڤژینا خوە نادەت؟
ئه‌ڤرۆ نيوز:
دبیت ژن ھەست پێ بکەت کو دەمێ ھەڤژینێ وێ تۆرە دبیت و بزاڤێ ناکەت د گەل ئاشت بیت، ئەو یەک د ناڤ زەلامان دا بەربەلاڤە و گەلەک ئەگەر ھخەنە، د ڤی بابەتی دا دێ وان ئەگەران دیار کەین و رێیا سەرەدەریکرنێ ژی د گەل زەلامی دەمێ یێ تۆرە شرۆڤە کەین؟
بۆچی زەلام ل دەمێ تۆرە دبیت پویتە ب ھەڤژینا خوە ناکەت؟
پشتی شەر و قەرقەشەکا درێژ د ناڤبەرا ھەوەدا، زەلام دێ بۆ دەمەکێ ھەڤژینا خوە پشتگوە ھاڤێژیت ژبەرکو ئەو ناخوازیت ئاریشە مەزنتر لێبھێن، ئەو وەسا ھزر دکەت بێدەنگی باشترە ژ ئاخفتنێ کو دبیت د وی دەمی ئاخفتن یا ب ئازار بیت و ئاریشە بەردەوام بن.
ھەکە ئەگەرێ تۆرەبوونێ ژ بەر ھندەک داخوازیێن تە بیت، دێ خوە بێدەنگ کەت و تە پشتگوە ھاڤێژیت، دا نەبێژیت ئەو نەشێت داخوازیێن تە بجە بینیت، بێگۆمانە ئەو ژی یێ پۆسیدەیە بەس نەشێت بێژیت.
دبیت سروشتێ زەلامی یێ گرتی و ڤەشارتی بیت و یێ دەم دەمی بیت، لەورا دێ نەچار بیت ژنێ پشتگوە بھاڤێژیت ژبەرکو نەشێت دەربرینێ ژ وێ بکەت یا ئەو دخوازیت و نەڤێت بکەڤیتە دوبەرەکیان د گەل ھەڤژینا خوە. ھەکە زەلام ژ وی جۆری بیت پێدڤیە یا ھشیار بی و بزانی دێ چاوا سەرەدەریێ د گەل دا کەی.
دێ چاوا وێ پشتگوهـ ھاڤێتنێ چارە کەی؟
نەھێلیە دەمێ ئاریشان د ناڤبەرا ھەوەدا درێژ بیت ژبەرکو د بەرژەوەندا ھەوەدا نینە، بزاڤێ بکە ب رێیەکا جوان د گەل باخڤە و خوە نێزیک بکە.
ھەکە تە نەڤێت دەستپێشخەریێ بکەی و گاڤا ئێکێ بھاڤێژی، ب تنێ ھندەک لڤینێن سڤک بکە دا دەرگەھێ ئاخفتنێ د گەل تە ڤەکەت، وەکو بەرھەڤکرنا شیڤەکا خۆش یان ژی بمینە ل ژڤانێ دا پێکڤە قەستا ژوورا نڤستنێ بکەن.
دەمێ دەرگەھێ پێکھاتنێ د ناڤبەرا ھەوەدا ڤەبوو گەلەک نەئاخڤە ژبەرکو دێ ئاریشە زڤرنەڤە، لەورا یا باش ئەوە دەلیڤێ بدەیە ھەستێن خوە دا وان ئاریشان چارە بکەن.
گۆتنێن رەق نەبێژی کو تو پشتگوە ھاڤێتی دەمێ تو یا تۆرە، بەلکو بزاڤێ بکە ب نازداریان ھزرا خوە بگەھینێ کو تو ژی دێ وی پشتگوە ھاڤێژی دەمێ تۆرە دبی وەکو وی کری، ب وێ یەکێ دێ د گەل تە پێکھێت.
بزاڤان بکە ھەموو دەمان گوھۆرینان بێخە پەیوەندیا خوە، ژبەرکو رۆتین ھەردو ئالیان بێزار دکەت و وەدکەت ھەردو ھەڤژین ئێک و دو پشتگوە بھاڤێژن.