بۆچی زاخۆ ناسناڤێ خولا عیراقێ ب ده‌ستڤه نه ئینا.!
زاخۆ،عه‌لی حاجی:
راهێنه‌رێ تیما باسكت بۆلا یانا زاخۆ یا تازه‌پێگه‌هشتیان بۆ رۆژناما ئه‌ڤرۆ دیاركر ده‌ست نیشانكرنا رێزا سیێ ژلایێ ئێكه‌تیا عێراقێ ڤه ل دیڤ یاسایا ئێكه‌تیا جیهانی بوویه و هزر د وێ چه‌ندێ دا نه هاتبوو كرن ب جیاوازیا رێژا خالێن دهێنه تۆماركرن دێ قاره‌مانا خولێ دیاركه‌ن .
زێده‌تر مه‌روان عه‌بدولجه‌بار گۆت: ده‌ستنیشانكرنا قاره‌مانێن خولا نایابا عێراقێ ل سه‌ر ئاستێ تازه‌پێگه‌هشتیان ل دویڤ رێنما و یاسایا ئێكه‌تیا جیهانی بوویه و تیما مه رێزا سیێ ب ده‌ستخوه‌ڤه ئینا و ژ وێ بریارێ د رازینه، چو جاران مه هزر د وێ چه‌ندێ دا نه‌كربوو كو دێ هه‌ر سێ تیمێن ده‌ستپێكی ب خالان وه‌كهه‌ڤ بن و رێژا تۆماركرنا خالان د تۆرا تیما هه‌ڤڕك دێ قاره‌مانێ خولێ ئێكلا كه‌ت، له‌ورا زوربه‌یا یاریان دا مه هزر د ئه‌نجامه‌كێ مه‌زن دا نه‌كر گه‌له‌ك یاریا جوداهی یا كێم بوو و یاریا ئێكێ یا خولێ كارتێكرنه‌كا نه‌رینێ ل سه‌ر مه هه‌بوو كو ئه‌و یاری بۆ ئه‌گه‌ر ناسناڤێ خولێ ژ ده‌ست بده‌ین.
ژلایه‌كێ دیڤه ناڤهاتی ئه‌وچه‌نده ژی دیاركر گه‌شبینه یاریزانێن وی به‌ره ب ئاسته‌كێ باشتر بچن و گوت: ئه‌و ده‌مێ هه‌لبژارتیێ عێراقێ بهێته پێكئینان بێی گومان دێ سێ بۆ چار یاریزانێن تیما مه دناڤ دا بن و گه‌شبینم كو باژێرێ زاخۆ بوویه پێگه‌هێ ب هێزێ یاریا باسكت بولێ ل كوردستانێ و عێراقێ و هه‌موو سالان ژی یاریزانێن باش دهێنه پێگه‌هاندن.
