بۆچی عه‌بدوللا هه‌ركی ل وار تیڤی بۆ پێشكێشكار؟
ئه‌ڤرۆ، هه‌رهین:
سترانبێژێ ده‌وات و شه‌هیانا عه‌بدوللا هه‌ركی، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: وار تیڤی دیت ئه‌ز سترترانبێژه‌كم سترانێن فلكلۆری دبێژم یێن هه‌ر چار پارچێن كوردستانێ و هه‌تا راده‌كی ژی من هزر ل سه‌ر فولكلۆرێ كوردی یێ مه یێ هه‌ی و دبیت ژ به‌ر هندی ژی بیت خودان باوه‌رنامه مه و ده‌رچوویێ كۆلیژێ مه و گه‌له‌ك حه‌ز ژ خواندنا ده‌ركی دكه‌م و من پێزانین و شیان هه‌نه و هه‌لبژارتنا به‌رنامه‌ی ل گه‌ل هه‌ڤالان ئه‌م رێكه‌فتین و به‌ری نوكه ژی به‌ری بمه پێشكێشكار من ل وار تیڤی ستران گۆتینه و دبیت بۆ وان دیار بیت من شیان هه‌نه و دێ شێم پێشكێشكاریێ ژی كه‌م.
هه‌ركی ل دۆر نووترین ده‌نگ و باسێن خوه یێن هونه‌ری گۆت: نوكه من سترانه‌كا نوو بناڤێ (دل كه‌تمێ) كو ژ په‌یڤ و ئاوازێن من بخوه نه و ل ئیسته‌مبولێ ل ستودیۆیا رێناس كورداخ هاتیه تۆماركرن و ناڤه‌رۆكا وێ ل سه‌ر كوره‌كی یه و حه‌ز ژ كچه‌كێ دكه‌ت و چاڤێن وی بتنێ وێ كچێ دبینن و نوزانیت چه‌وا دێ بێژیتێ حه‌ز ژ ته‌دكه‌م و پاشان ئه‌ڤینا خۆ بۆ وێ كچێ دیاردكه‌ت و ئه‌ڤ كلیپه ل دهۆكێ هاتیه كلیپ كرن و ژ ده‌رهێنانا (كاوه عادل) و جوداهیا ڤێ كلیپێ ل گه‌ل كلیپێن من یێن دی من ڤیایه تشته‌كێ كورده‌واری بیت.
هه‌روه‌سا عه‌بدوللای گۆت: ل ڤێ دووماهیێ گه‌له‌ك سترانبێژ ده‌ركه‌تینه و نه‌بتنێ زارڤه‌كرنێ دكه‌ن دبیت ئاوازه‌كا سترانا من دبه‌ن و دبیت هنده‌ك په‌یڤێن دی ب دانن و هه‌ر ئه‌و په‌یڤه نێزیكی په‌یڤێن منن و گه‌له‌ك ده‌ركه‌فتینه زارڤه‌كرنا من دكه‌ن، به‌لێ بۆ من جهێ خوه‌شحالیێ یه، من چو خرابی و زیان نه‌گه‌هاندینه چ كه‌سان هه‌تا كو من دوژمن هه‌بن و په‌یوه‌ندیێن من ل گه‌ل هه‌موو هونه‌رمه‌ند و كه‌سێن نورمال یا خوه‌شی و باوه‌رناكه‌م من دلێ چو كه‌سان هێلابیت هه‌تا كو ل من ببنه دوژمن.
