بۆچی فه‌تلاوی مول هه‌بن و من بۆسته‌كا زه‌ڤیێ نه‌بیت
بێگومان ل گۆر قانوون و ده‌ستووری و كه‌تواری ژی هه‌رێما كوردستانێ پارچه‌كه ژ عیراقا فیدرال، له‌ورا هه‌می عیراقی د ماف و ئه‌ركان دا وه‌كهه‌ڤن و ل گۆر ده‌ستوورێ عیراقێ هه‌ر عیراقیه‌كی ماف هه‌یه كو مولكی ل هه‌ر باژێره‌كێ عیراقێ بكڕیت و ل سه‌ر ناڤێ خوه تۆمار بكه‌ت، لێ د هه‌می قانوونان دا هنده‌ك تایبه‌تمه‌ندی هه‌نه، هه‌تا كو د قانوونێن ئاسمانی دا تایبه‌تمه‌ندی هه‌بووینه، هه‌روه‌كو هنده‌ك تشت تایبه‌ت بوون ب پێغه‌مبه‌ران ڤه.
حه‌نان فه‌تلاوی كو ئه‌نداما په‌رله‌مانێ عیراقێ یه ژ لیستا پارێزگه‌ها بابل و پشتی ژ ده‌وله‌تا قانوونێ جودا بووی بزاڤه‌ك بۆ خوه دروست كریه ب ناڤێ (بزاڤا ئیرادێ) و ئه‌نداما لیژنا په‌یوه‌ندیێن ژده‌رڤه‌یه د په‌رله‌مانی دا، ئه‌م هه‌می دزانین و دبینین هه‌ر هه‌یام هه‌یام مه گولێ دبیت كو ل دژی كوردان و سه‌ركرده و وه‌زیرێن كوردان داخویانیان دده‌ت، هه‌تا كو ل ڤێ دووماهیێ ره‌خنه ل هشیار زێباری وه‌زیرێ دارایی یێ عیراقێ گرتین و د هه‌مبه‌ر دا نڤیسینگه‌ها زێباری رۆنكرنه‌ك دا و دیار كربوو كو نیڤه‌كا مولێن هه‌ولێرێ ل سه‌ر ناڤێ فه‌تلاوی نه!! شاشی نه‌ئه‌وه كو فه‌تلاویێ مولك ل كوردستانێ هه‌بیت و ئه‌م چ ره‌خنێ و گازندا ژێ ناكه‌ین، چونكی وه‌كی مه ل سه‌ری ئاماژه پێ كری ل گۆر ده‌ستوورێ عیراقێ دروسته، لێ گازندا مه ژ حوكمه‌تا مه‌یه، چونكی ئه‌و تایبه‌تمه‌ندیا مه به‌حس كری به‌رچاڤ وه‌رنه‌گرتیه، هه‌رچه‌وا بیت وه‌لاتیێ كوردستانی فه‌رتره ژ فه‌تلاوی و غه‌یری فه‌تلاویێ پارچه زه‌ڤی و مولك ل كوردستانێ هه‌بیت، باشه بۆچی بۆ فه‌تلاویێ حه‌لاله و بۆ مه حه‌رامه، ئه‌ڤه ژ سالا 2012ێ وه‌ره ب هزاران ناڤ هاتینه كو پارچێن عه‌ردی وه‌ربگرن و هێشتا وه‌رنه‌گرتینه! جار دبێژن عه‌رد نینه و جار دبێژن عه‌ردێ چاندنێ یه و وه‌زاره‌تا چاندنێ رازی نابیت ژ عه‌ردێ چاندنێ بۆ یێ ئاكنجیبوونێ بهێته ڤه‌گوهاستن!! ئێ باشه هه‌كه عه‌رد نه‌بیت دێ بۆچی خه‌لكی ئازرینن؟ ئه‌رێ پا ئه‌و چی یه مرۆڤی ب ئاخا وه‌لاتیڤه دگرێده‌ت هه‌كه چ بۆ مرۆڤی نه‌بیت و به‌رۆڤاژی بلا عه‌ره‌ب بهێن مولكی ل كوردستانێ بكڕن، هه‌تا وه‌كو جوهیان سوباهی بێژن ئه‌ڤه عه‌ردێ مه‌یه و نه‌یێ كوردایه! نه‌مازه هه‌رۆ ئه‌م یێ به‌حسێ ده‌وله‌تبوونێ دكه‌ین، هه‌كه دێ هه‌ر ده‌وله‌ت بۆ عه‌ره‌بان بیت، هه‌ما نوكه یا عه‌ره‌بایه و مه نه‌هه‌وجه‌ی چ ده‌وله‌تایه. ئه‌رێ ما ئه‌م ژ فه‌تلاویان فه‌رتر نینین كو مه مولك ل وه‌لاتێ خوه هه‌بیت؟ ئه‌رێ بۆچی فه‌تلاویێ دێ مول ل كوردستانا من هه‌بن و من بۆسته‌كا عه‌ردی نه‌بیت؟ و ژ بلی فه‌تلاویێ نوكه ب سه‌دان فه‌تلاویێن دی ژی هه‌نه! ئه‌رێ ما نه‌پێدڤیه حوكمه‌تا مه تایبه‌تمه‌ندیێ بده‌ته وه‌لاتیێن كوردستانی، ئانكو وه‌لاتیێن خوه ب زه‌ڤی بێخیت، بێگومان مه‌به‌ستا من ئه‌و وه‌لاتیێن كادر و فه‌رمانبه‌رن، لێ ب دیتنا من هه‌كه هنده‌ك كه‌سێن خودان شیان و ده‌ستهه‌لات هاریكار نه‌بن ئێكا وه‌كی فه‌تلاوی نه‌دشیا مولكی ل كوردستانێ بكڕیت، به‌لكو به‌رۆڤاژی پێدڤی بوو ده‌مێ دژایه‌تیا كوردان كری هنده‌ك پێرابوون ل گه‌ل هاتبانه‌كرن.
