بۆچی له‌زاتیا ئه‌نترنێتێ یا كێمه ده‌ما پلا گه‌رماتیێ یا بلند بیت؟
ئه‌ڤرۆ، زانست:
هه‌ر ئامیره‌كێ دهێته چێكرن، وه‌سان هاتیه به‌رهه‌ڤكرن خوه ل به‌ر هنده‌ك كه‌شوهه‌وایێن ده‌ستنیشانكری بگریت، بۆ نمۆنه پلا بلند و نزم یا گه‌رمێ، رێژا شه‌هێ و هنده‌ك جاران له‌زاتیا بای ژی، ژ به‌ر هندێ ژی ل ده‌مێ تشته‌ك ژ ڤان نه‌یێ سرۆشتی بیت، ئانكو زێده‌یی وێ رێژا بۆ هاتیه ده‌ستنیشانكرن بیت، تشته‌كێ نورماله وه‌كو حاله‌تێن نورمال كار نه‌كه‌ت.
دبیت تشته‌كێ نامۆ بیت پلا گه‌رما بلند یا هه‌ر گوهۆڕینه‌كا كه‌شوهه‌وایی كو كارتێكرنێ ل ئاستێ تۆڕا وای فای بكه‌ت یان ژی ئه‌نترنێتێ ب گشتی.
ل پتریا جهان ل هه‌رێما كوردستانێ، ل هاڤینێ پلێن گه‌رمێ دچنه د سه‌ر 40 پله‌یێن سلیزی دا و ئه‌ڤه ژی دبیته ئه‌گه‌ر كو مالێن مه ژینگه‌هه‌كا گه‌رم بن، تایبه‌ت ژی ژ به‌ر نه‌بوونا كاره‌با گشتی یا به‌رده‌وام و پشت به‌ستن ل سه‌ر كاره‌با موالیدان، نه‌شێین وه‌كو پێدڤی سه‌قایه‌كێ ل بار بۆ ئامیرێن خوه یێن ئه‌نترنێتێ دابین كه‌ین و ب تایبه‌ت ژی ل جهه‌كێ ڤه‌ده‌ر هاتینه دانان دا كو ل مالێ هه‌موویێ ب هه‌ڤسه‌نگی بهێته به‌لاڤكرن، ژ به‌ر هندێ پتریا جاران جهێ لێ دهێته دانان یێ دووره ژ ئامیرێن ته‌زاندنێ.
وه‌كو مه گۆتی ئه‌ڤ پلا گه‌رمێ یا زێده نه ب تنێ كارتێكرنێ ل مرۆڤان دكه‌ت، به‌لكو ل گه‌ل ئامیرێن ته‌كنۆلۆژی ژی دكه‌ت و هێلا ئه‌نترنێتێ ژی ئێك ژ وانه، مه دڤێت ل ڤێره بۆ هه‌وه دیار كه‌ین ژی كو پلا گه‌رماتیێ كارتێكرنێ ل سه‌ر نیشانا وای فای ب ره‌نگه‌كێ ئێكسه‌ر ناكه‌ت، به‌لكو كارتێكرن ل سه‌ر وان ئامیرێن ئه‌نترنێتێ یه یێن خوه ل به‌ر پله‌كا بلند یا گه‌رمێ نه‌گرن.
ئه‌ڤا مه گۆتی ل سه‌ر پلا گه‌رمێ گه‌له‌ك ب ئاسایی ل سه‌ر پلێن نزم و هه‌وای و بارانێ ژی د گۆنجن، ئانكو ب ره‌نگه‌كێ گشتی گوهۆڕینێن سه‌قای كارتێكرنێ ل ئاستێ كوالێتی و خرابیا ئه‌نترنێتێ دكه‌ن.
