بۆچی هنگاڤتن د ناڤ رێزێن تیما دهۆكێ دا زێدەبووینە؟
ئەڤرۆ
پشتی د یاریا بۆری دا ژ كۆپا ئیراقێ ئەوا ل شەڤا شەمبیا بۆری بەرانبەری ئەلقاسم ل باژێرێ كەربەلا هاتیە كرن نێزكی 11 یاریزانێن تیما یانەیا دهۆك د ناڤ رێزێن پێكهاتی و شاندێ تیمێ دا نەبوون ژبەر ئەگەرێن جودا كو كارڤەدان دناڤ جەماوەرێ یانێ دا پەیدابوویە و بوویە جهێ حێبەتیێ، ژبەركو بەری نوكە چو جهان نە هاتبوو راگەهاندن ئەو پشكداریێ ناكەت و ئەگەرێن نە پشكداریێ ژی نوزانن.
ل دووڤ ژێدەرێن نێزیك ژ یانەیا دهۆك ئەوێن بۆ رۆژناما ئەڤرۆ دیار كری راهێنەرێ تیمێ ب نەچاری نەشیا چەند یاریزانان دگەل شاندێ تیمێ بۆ یاریا ئەلقاسم بەرهەڤ بكەت ژبەر ئەگەرێن جودا ئەو ژی، محەمەد نیزال، ژیار گۆڤەند، نۆرۆ سۆلێ، محەمەد سەعید، عیماد عیسا ژبەر هنگاڤتنێ بوون، سەرباری چوونا هەرئێك ژ حسێن نەجم، رێوان ئەمین و ئەحمەد بەشار دگەل شاندی لێ پشكداریا وان د گۆمانێ دایە ژبەر هنگاڤتنا سڤك، ژلایەكێ دووڤە ژبەركو تیما خولا كوردستانێ د مەترسیا داكەفتنێ دایە ئەوان پێدڤی ب سێ یاریزانان هەبوون ئەوێن رۆژا ئەینیا بۆری یاریا خوە دگەل ئارارات كری ئەو ژی سیابەند عەگید، بەیار ئەبۆبەكر و زیاد ئەحمەد، لێ پیشەكارێ كۆتیڤۆاری یانیك زاكێری دەستیری وەرگرتیە و چوویە وەلاتێ خوە و بریارە دڤێ حەفتیێ دا ڤەگەڕێت.
ل دۆر ئەگەرێن ئەڤان هنگاڤتنان هاتیە دیار كرن هەر ژ دەستپێكا وەرزێ نوو یا خولا ئیراقێ بوویە و ئەگەرێ سەرەكی یاریگەها تارتان بوویە ئەوا رۆژانە راهێنانێن خوە تێدا دكەن كو كارتیكرنەكا نەرێنی ل سەر ئاست و چەستەیێ یاریزان كریە و بوویە ئەگەر ئەڤ هژمارا مەزن تووشی هنگاڤتنێ ببن.
