بۆچی ڕژێما توركیا و ئیرانێ دهستبهرداری سووریێ نابن؟
شهوكهت ئامێدى
دهمێ مرۆڤ بهرێ خوه ددهته دیرۆكا كوردان و ددهته بهر دیرۆكا ههر مللهتهكی، چ ئهو مللهت یێ ئازاد بیت، یان یێ سهربخوه بیت. مرۆڤ شهرمێ ژ خوه دكهت ژ شاشی و دهستدانا ههل و دهرفهتان. یا ژ ههمیان مهزنتر و تالتر، دوبارهكرنا شاشیێن دیرۆكی ل سهر ئاستێ نهتهوهیی.
ئهم باش دزانین دهسههلاتێن ئیرانیان و توركان، د هێچ دهمهكی دا گورمژینهكا دۆستایهتی ل گهل ئێك نهكریه و ناكهن، ئهگهر كێش و پرس و لاوازی و ژ ناڤبرنا كوردان تێ نهبیت.
یا ڕۆهن و ئاشكهرابوو، دهمێ داعش هاتیه دروستكرن، ب ناڤ، ئهو دژی سهفهویان بوون. لێ ئهو گورزێن وان ل سوننان داین چارێكهكا وان ل شیعان نهدایه! ههر وهسا نه ڕاستهخوه یان ڕاستهخۆ، زۆربهی چهتێن داعشان د ڕێ یا توركا ڕا تاتنه ناڤ ئاخا عیراق و سووریێ. ههڤپهیمانێن مه ل گهل ڕۆسیا و ئامریكا پێ د ئاگههدابوون.
نوكه ژی توركیا و ئیران یێ ڤێ بزاڤا مهزن دكهن ژ بۆ داڕژتنا پلانهكا ههتا ههتایێ دژی كوردان، ل جڤینێن ئاستانا و سووشی، مهبهستا وان ژی ئهوه وهك پهیمانا سایكسپیكۆ یا ڕهش، ب ڕهشی دوبارهكهنهڤه، ئهو ژی باوهری ئینان ب دهسههلاتا سووری و نڤیسینا دستووری كو ئهم یێ ل گهل دهولهتا سووری هندی یا ئێك پارچه بیت. ئهگهر نه بۆ مه ههیه بێ هێین و وهبهكن ههر وهكی مه دڤێت، واته پشتی سهد سالێن دی كوردێن ڕۆژئاڤا بهحسێ سهربخوهیهكێ بكهن، توركیا و ئیران ڕێگرن، ههر وهسا ژ بۆ ئیرانێ، مانا دهسههلاتا شیعی و ڕێخۆشبوون ژ بۆ حهسهن نهسروڵلایێ ل لوبنانێ. ئهوا نوكه ئهز شهرمێ ژ خوه دكهم، ئهڤهیه! هێشتا ئاگرێ ب مالێن كوردان ڤه یێ دئێنه كوشتن و دهربهدهركرن، ب سهدان هزاران عهرهب و خهلكێ بیانی ل سهر ئاخ و مولكێن كوردان ئاكنجیكرن. دهستدرێژی یا مۆڕالی یا ل سهرمه دئێتهكرن، شوونا ئێك بگرن و ببنه دهستهك دژی پلانێن دوژمنان، وهك جاران هندهكێن د بێژن سووچێن ئهڤان و ئهوێن دی نه. ئهڤهیه دلئێشی، نهزنی، دزین ژ ڕاستیان و مللهت و نشتیمان پارازیێ. ب بۆچوونا من ژ بۆ كوردێن ڕۆژئاڤا نوكهژی نه درهنگه، ئهگهر ئێكاتیهكا وان ههبیت ل سهر ئاستێ نهتهوهیی و نشتیمانی.
