بۆچی کەنالێن (DTV) جار ھەنە و جار بەرزەدبن؟
ئەڤرۆ نیوز:
ئامیرێن ڤەگۆھاستنا کەنالێن ئەردی یێن سیستەمێ (DTV) ماوەک بۆ ھاتینە بڕین، ھەر دەم بۆ دەمی ژی دچن و جارەکا دی ڤەدگەرنەڤە، لێ ل دووڤ زانیاریان چوون و ھاتنا وان ژ بەر ھاتنا بەفرێ بوویە. فرۆشگەھێن ڤان ئامیران دیار دکەن کو کرینا ڤان ئامیران د زێدەبوونێ دایە و کارتێکرن ل کرینا کارتێن سەتەلایتان کریە. کۆمپانیا ڤان ئامیران ئاشکراکر کو د پلان دایە ئامیرێن کەڤن ھەموو بھێنە لادان و ل گۆرەی سیستەمێ نوو دێ ھندەک ئامیرێن نوو کەڤنە بازاری.
تالب بەندی ل بازارێ سیکا سەتەلایتان ل سەنتەرێ قوچ ژ سالا 2012 وەرە ڤان ئامیران دفرۆشیت و تاکە بریکار بوویە ل دھۆکێ ئەڤ ئامیرە ئینان گۆت: ئێکەم کەس بووم من ئەڤ ئامیرە ئینایە دھۆکێ و ب کت و کوم من فرۆتن، پشتی ھەشت ھەیڤان ژ نوو ئەڤ ئامیرە بەربەلاڤ بوو د ناڤا خەلکی دا، ئامیرە مە ژ (چینێ) دئینان و مە دفرۆتن، ئامیرێن کۆمپانیێ گەلەک دگران بوون و ھەکە مە فرۆت بان ب 45 ھزار دیناران بوون، ئەڤێن چینی ئەڤێن مە دئینان ب 35 ھزاران مە فرۆتن، ل دەسپێکێ رۆژانە من 400 ئامیرە دفرۆتن.
تالبی ئاشکراکر ژی کو کومپانیا (ماکس میدیا) ھەولێرێ یە و بەری ئەڤ ئامیرە بھێـتە دھۆک ل ھەر دو پارێزگەھێن ھەولێر و سلێمانیێ ھەبوویە، ل دەستپێکێ ھەشت کەنال بوون و نوکە 42 کەنالن و ھەموو ناڤخونە و ھەر ھەموو تشتێ خێزانێ دڤێت دناڤا ڤان کەنالان دا ھەیە، وەرزشی، گیانەوەران کارتوون و زنجیرە ھەر تشتێ دڤێت، ڤان ئامیران گەلەک کارتێکرن ل کرینا کارتان کریە بۆ دیتنا یاریان و دبێژم 70% خەلک ڤان ئامیران دکریت و پتر بکار دئینن، پتریا خەلکێ دھۆکێ حەز ژێ دکەت و ئەڤ ئامیرە ل دھۆک و سێمێل و خانکێ و و شاریا و مسیریکێ، ئاکرێ، شێخان، تلکێف و سکرێ مووسل و نیڤەکا مووسل دھێـنە بکارئینان.
دەربارەی چوونا ڤان کەنالان ل رۆژێن بۆری ناڤبری گۆت: برجێ کۆمپانیێ ل سەر چیایێ کورەک و ژبەر ھاتنا بەفرێ ل رۆژێن بۆری ئەڤ کەنالە چوو بوون، دیسا برجەک ل چیایێ زاوایە و ل دووڤ پێزانینان دێ بورجەکی ل زاخۆ ژی دانن و ئەڤە دێ بیتە جارا ئێکێ ئەڤ ئامیرە بچیتە زاخۆ ژی، لێ دێ ب سیستەمەکێ نوو بیت و ب تنێ دێ ئامیرێ کومپانیێ کار کەت و دیسان پارەکی ژ کەنالان ژی وەرگریت، دیسان سیستەمێ دھۆکێ ژی دێ ھێتە گوھۆرین و دێ ئەو ئامیرە ھێنە دھۆک ژی و دبیت ئەو ئامیرێن نوکە دھێنە بکارئینان نەمینن.
پتریا گەنجان حەز ھەیە ڤان ئامیران بدانن، چونکە وەرزش تێدا ھەیە و دیسا پتریا کەنالان د زەلالن، رۆژانە خەلکێ وان کەنالان دکریت و ب تنێ ب ئەریالی کار دکەت و چو پەیوەندی ب تلستارێ ڤە نینە، ھەر کەسەکێ ئامیرەک کری ئێدی پارەی و کارتان ھەیڤانە ئەڤە نینە و ھەما ب دووماھی ھات و ئەڤە بازرگانی نینە و چو کەنالێن نەباش تێدا نین و ھەموو کەنالێن خێزانی و نافخویی نە.
ھیوا مستەفا رێڤەبەرێ کومپانیا (ماکس میدیا) یا فرۆتنا ڤان ئامیران دیار کر، چوونا ڤان کەنالان ل رۆژێن بۆری ژ بەر ھاتنا بەفرێ بوو ل چیایێ کورەک، وێستگەھێ مە ل وی چیایی ژ کار کەفت بوو و ئەم نەشیاین بچین چارەکەین ژ بەر بەفرێ، ب ھاتنا ڤان ئامیران نوکە 75% خەلکێ ھەرێمێ ئەڤ ئامیرە ھەنە، ب ھیڤی نە زووترین دەم ھەموو کوردستانێ ڤەگریت و خالا داھاتی کاری ل سەر دکەین گەھاندنا ڤی ئامیرەیە بۆ باژێرێ زاخۆ.
رێڤەبەرێ کۆمپانیا ناڤبری گۆت: ھەیڤانە پارەک ژ ڤان کەنالان دھێتە وەرگرتن بەرامبەر ڤێ خزمەتا بۆ دھێتەکرن کو کەنالێن نافخۆیی دگەھینە ھەر مالەکێ ل کوردستانێ، ھەر کەنالەکێ پارێ خوە نەدەت ناچارین وی کەنالی نەھێلینە د ناڤ ئامیرێ خوە دا.
ھەمبەر زێدەبوونا کەنالان د ناڤا ڤان ئامیران دا ل ھەر دو پارێزگەھێن ھەولێر و سلێمانی کو 60 کەنالان دکێشیت و ل دھۆکێ 40 کەنال ھیوا گۆت: ئەڤە گرێدایی گرێبەست و مۆلەتا تەلەڤزیۆنانە و ھەنە دڤێت ب تنێ ل ھەولێرێ پەخش بیت و ھەنە دڤێت ب تنێ ل سلێمانیێ پەخش بیت و ئەڤە گرێدایی تەلەڤزیۆنانە.
